Song of Solomon4
1Oh, nang au hezuyi lie, a kubepoe; nang au hezuyi lie. N miakdung au tamhaudung nzwa lie n peuzui cai gade. N peutam au hemeu haudung nzwa da Gilead deutu gade nghung kela nzwa.2N geidung au meurün hau penui mai cune bit lwe kebam de nzwa da, hui kecu ni gade nghang kela. Peciakne de nedui ge bam, nah penui kakga petau kemak ge de gah.3N muileu au helangria kegie ge nzwa; n mui au hezuyi. N biadung au kuraletsi pempie nzwa n peuzui cai gade.4N nggwang au tangtsudung le teipwa kebam David gu renei nzwa, cika hegeu pecang gwak pung bam, reugwame pelane gu hegeudung.5N hekakrak kena de au hetina kena, helung nedui kena, teizuine padung kakga ma peei tyei kela de nzwa da.6Tingcang gwang di kemakne nah kemuibedung gah di kemakne, Ih myrrh lamlwatu ga mie zie nah perim kehengui kideutu ga.7Nang au maleune gade de hezuyi, a kubepoe nah ma kesia ge de n da gah.8Lebanon gade acu nzang gwanglu, a lakciubepoe. Lebanon gade acu nzang gwanglu; Amana deutu gade gwanglu, Senir nah Hermon deutu gade, hingho bam gade, kaudaunadung kideutudung ga lungh kebam gade.9Nang ne a mlung luu pwa dida, a tipui, a nau; nang ne a mlung luu pwa dida, n miakpie ge gade, n heteiria ga jewel ge ne.10N keku daikenzwa ge de hezuyi no, a tipui, anau! N keku au zau swa yiki, nah n rim kehengui de au mosala swa yiki.11N muileu gade, anau, heliadui zau mie; heliadui nah tungdui n mleu kangga bam; n painidung rim au Lebanon rim keyi de nzwa.12A tipui, anau au kengkiem gurie ge, kengkiem gurie ge, duilet nkiem pwa kebambe ge.13N kiakdung au kuraletsi bangdung lungh kebam luh ge nah petsi yitube buila, nah henna nah nard bangdung de si eh,14Nard nah saffron, calamus nah cinnamon nah mosala leune de si eh, myrrh nah aloe nah mosala yitubedung.15Nang au hegurie duilet ge, dui kemci tekwa ge, Lebanon gade lwa mie kebam reuceunadung.16Mraklu, tingtünle tingkai; gwanglu, tingbangle tingkai; a gurie gage gui gailo iciu eh peu pe mosala rim keyi kehenguidung gui mpetlu kerane. A kubepei de peu pe gurie ga gwanglu nah peu matsi yitubedung tyei lo.
Bridge Connectivity Solutions Pvt. Ltd.