Keuliakegai20
1Pecai Ih tinggim gade tinggimgwame ge hungkela ngau. Pa penli kegah hekwa kecok cabi nah hegeuria kedi ge pe ba gala.2Pa neidi, ndaa henei, cide herakesiabe mede satan de tuilu delwe pecu mmi cang ge ziemne kangzeudi.3Pecai pa pecu penli kegah hekwa kecok gage kelien gaidi, nah cide ngkuidi delwe cide giaknam di, iciu eh mmi cang cangdi kemaktane pa heleuhdung de cwa si melu kerane. Cipaucai, kaknage ziemne pecu lungmpet dai gai maisia.4Pecai Ih hegwangbamdung ngau. Cidungde reuga—Jisu ha zierang ketei ziemne nah Tinggwang sam ziemne penui peu dang kedime nah teikuu de mede pe mie de reca kemakme nah kaugiak de penui sipie gage mede penui ba gage de giak kemakme rabedung bam—nah penuide hetutiak kera kengkieng peu. Penui ring cuhlu delwe Khrista de ngngwa mmi cang ge hegwang teidi.5(Tsai kedi kedame pelane mmi cang ge cangdi kemaktane ringcuh dai ma.) Aide au ketsaime ringcuh kecu raitube da.6Ketsaime ringcuh kecu keraibe ga kencütme au samlam kepung nah kemcimedung delie! Aidungde reu ketsai pekenabe kengkieng gah, dede penui Tinggwang nah Khrista cingkume tei dizie, nah pecu ngngwa mmi cang ge hegwang teizie.7Dede mmi cang ge cang kedi cai, Satan de pe baangki gade lungmpet gaizie.8Pa kideu kung mdai ga kebam heleuhdung de cwa kera mpet zie—Gog nah Magog—penuide keregi kera teugwang ngkwa luzie. Penui riak au jaaidi ga heciang kieege zie.9Penui kideu kemza langkie ga tet nghanglwe kemcimedung kebam ramzeuki nah hungkela namdi de twagwalu. Dede tinggim gade mi cakmie eh penuide rudi.10Pecai herakesiabe, penuide cwa kedibe de kelien pwa teikuu penai kenret caihakecibe kebam mijaai, sulfur ru kebam gage kelien gaidi. Penuide tingmui tingba kelungta tei keherei zie.11Pecai Ih hegwangbam keha kedi ge nah cika kebambe de ngau; pe dwade ting nah kideu pakdi, dede penui ziemne heni gede ngaulu tadi.12Pecai Ih ketsaime kedi keceu de ngau, hegwangbam dwa ga sap bam eh, nah laisiukwakdung de let pwabam. Pecai laisiukwak keda gede let pwabam, cide Kering Laisiukwak. Ketsaime de penui bata rehi gade laisiukwakdung gage raupwa keladung gade penui tutiak.13Jaaidi de peda kebam ketsaime de lungmpet beu. Ketsai nah Hades penai da kebam ketsaime de lungmpet beu, nah keheibe de penui tei kegai rehi gade penui tutiak.14Pecai Ketsai nah Hades de pwa mijaai gage kelien gaidi. Mijaai aide au ketsai pekenabe.15Keheibe de Kering Laisiukwak gage pezi raupwa bam eh ngaulu kemakbe de mijaai gage kelien gaidi.
Bridge Connectivity Solutions Pvt. Ltd.