Psalms89
Ezrame Ethan gu maschil ge.
1Ih kelungta RAMPAUBE samkakkelu samsang tadung lei tei zie. Ih n samsang ha de lunghgwang kera ceheudung de rang zie.2Kedanemene Ih rang dida, “Samkak masangbe au kelungta ziemne teilu; N kesamsang nang tinggimdung ga teikelude.”3“Ih kedetkelu gede ngngwa samkak ge tei pwabam, Ih a kilabe David dage sampet tei pwabam.4‘Ih n leuhme kelungta ziemne tei beuzie, nah Ih ceuheudung pelane gade n hegwangbam telei beuzie.” Selah5Tinggimdung nang miswa kegah batadung tei kegai de twala, RAMPAUBO; kemcime gwang ngkwakelu ga n kesamsang de twa bam.6Tinggim ga RAMPAUBE de keukeda kera cau bamno? Rabe namedung kakga cau RAMPAUBE zwa bamno?7Pa au kemci medung kangbau gade hetwa peusüt kecu Tinggwang ge nah pecu twagwa kebamme dade yisüt. 8RAMPAUBE Tinggwang, cauge nang nzwa ngkieng no, RAMPAUBO? N kesamsang de ncu twagwa bam.9Nang nswak kebam jaaidi reu di; duicuidung nswak cuh kecudau, nang penuide kezeu lula.10Nang Rahab de teitakcai di ketsaime ge nzwa. Nang n ba kengkieng dene n ngauraume de teuzang di. 11Tinggimdung au n gu, nah kideube liede. Nangne kideu teigai nah cika kebam pelane. 12Nang ne nreule nah ngkangle de damgai. Tabor penai Hermon lamlwa n zi gade pe suiyi bam.13N da kengkieng ba ge bam nah heba kengkieng ge, nah n ba zetle au huzu.14Kesangbe nah kemzuibe au n hegwangbam gu bandwabe. Samkak kelu samsang nah nlumlukebui n dwaga gwang.15Mina ncu reca au samlampung lie! RAMPAUBO, penui n keba ga tet la.16Tingbazie pelane n zi gade penui suiyi bamla, nah n samsangbe gade penui ncu hetwa peula.17Nang au penui kengkieng ditube, n kengha ne anui ngkieng luda.18Kedanemene RAMPAUBE nang anuide kegumbe; anuide anui gwangpei Israel kemcime Tinggwang peu da.19Nang ndaa ge ncu nlum kelame dage marengei gade rang; nang rang eh, “Ih kengkieng ge reu peurwa ge telei beu dida.” Ih minadung kakgade hangge de kedet luda.20Ih a kilabe David de kedet luda; agu kemci maca le Ih pecu keniak luda. 21A ba pecu ngha zie; a ba pecu teingkieng beuzie.22David ge ngauraume migede pecu cwa gailak; kesiabe name migede pecu teikeherei gailak.23Ih pe dwa gade pe ngauraume de teitakcai dizie; Pecu ngaurau kelame de Ih teitset dizie.24A lungsangbe nah a samkak kesamsang peda lazie; a zi gade pa ngkieng luzie.25Ih pe ba keu jaaidi reu gage kaizie nah pe ba zetle hereukidung gage.26Pa acu qu pet zie, ‘Nang au a Pei, a Tinggwang, nah a kelikelu tsurabe.’ 27Ih pecu a neraibe nzwa eh tei luzie, kideu gade hegwangdung reu ditube.28Ih a samkak kesamsang de pe da kelungta lazie; nah a samkak pe da kela de gumla luzie.29Ih pe leuhme depeu kelungta bammui zie nah pe hegwangbam de tingkamdung nzwa bammui zie,30Magade pe name a zai de gi dicai nah agu ajadung ga tet luta dicai,31magade penui a zaidung gikah nah agu ajadung kainzeu lu mecai,32iciu cai Ih penui mau ziemne saja peu zie nah penui samzai tei kemak ziemne peu keherei zie.33Dede Ih pe dade a keku de bammui kelade keugi lak mede a sampet gade samsang tadi lak.34Ih a samkak teipang dilak mede a mui gade kepet a samdung keli dilak.35Piage nah pelane ziemne Ih a kemci gade sampet gaila, Ih David dade kenret lak:36pe leuhme kelungta bammui zie nah pe hegwangbam, tingnaimiak a dwaga kebamtane. 37Cide au hekei nzwa kelungta bammui zie, tinggim ga samsang zierangbe nzwa. Selah38Dede nang mneilu ma nah mlai di; nang n gwangpei keniak kelube de n rata bam.39Nang n kilabe samkak de gi dida. Nang pe peurwa keumpet hangdeu gage kai dida.40Nang namdibe kiriedung pelane teingkau dida. Nang pe kudadung teingkap dida.41Tetkah kegwang kela mileune pegu rega. Pa pe kidame dade mingkau kepung ge dida.42Nang pe ngauraume ba zetle teucuh gai; nang pe ngauraume pelane suiyi teidi.43Nang pe kingtie keu kemta tei dida nah nang pecu hereu tei kecu dau ngha raudi44Nang pe keyi de penli gage teugwang dida; nang pe hegwangbam de hangdeu gage teu nghung dida.45Nang pe rehangting de teindui dida. Nang hengam ne pecu teicim dida. Selah46Dai tiege, RAMPAUBO? Nang nkatei ncu kebai pwabam zieno, kelungta? Dai tiege n rata mih nzwa heu bam zie no?47Oh, a ting dai duige bi cet gailo, nah dai kemta ge ziemne nang n namedung pelane de damgai bi!48Cauge tsaidi mene ringlubui bi, mede Sheol ba gade pekatei pe teilung kelilu buino?49Rampaubo, daiga n samkak kesamsang tadung de bamno nang David dage n samsangbe gade sampet kebeude?50Nsung gailo, Rampaubo, n kilame dage kemneu tatei kegai nah dainzwa Ih heleuhdung dade kemneudung kekieege lialu dibi.51N ngauraume kemneudung kelien gai, RAMPAUBO; penui nangne keniak kelube pipadung rangmsia.52RAMPAUBE de kelungta samlam punglo. Amen nah Amen.Bridge Connectivity Solutions Pvt. Ltd.