Psalms69
Kenlang leibungkekwame ziemne; Shoshannim ga teleilu. David gu lei ge.
1Acu kelibeulo, Tinggwang; kedanemene duidung ne a teilung kerehim gage kai dida.2Ih tangnia kecok ga nlim mie, sap gai kera bam kegah ga; Ih dui kecok ga gwanglu, cika dui a reu puinlim di.3Ih hap kecu dene keherei bam; a rwak canghdi; a miak hema dida a Tinggwang nha kei eh kwa kebam dau.4Pekie kegah gade acu ngau nghetme kecume au a peu ga peutamlei dung swade kieeki; caugame acu teitset zie bi, pekiedung cimau delwe acu ngaurau kelame, cipaume ngkieng; Ih rega kemakpe, Ih peu caili maisia. 5Tinggwang, nang Ih maang keladung cibam, nah a maudung nda de kebai gailak.6A ziemne nda keregui kebamme dungde peu hengam tei diso, Rampaube reugwame reu RAMPAUBE; Ncu peei eh kelame de peu a ziemne herütpeu kemak ge tei diso, Israel Tinggwang.7N ziemne acu mina ki lala; delwe hengamle ada puila dida.8Israel a sinamedung dade Ih sangme ge dida, a pui dade Ih sangme ge dida.9N ki de hengim kecu dene acu tyei nggah dida, nah ratadung ncu herata kegaide ada kaumie zeu.10Ih mmwang eh matyei me ge, penui acu rangmsia.11Ih rosopai ne a pai tei keludau, Ih penui ziemne macisam ge dida.12Namdi kirie ga kwa eh bam kecume a ha rangdi; Ih au zausak kemieme lei ge.13Dede a ziemne au, a kekie de n ziemne, RAMPAUBE, cipau tingdau nang acu luulu zie; nlumlu kebui n kelikelu gade acu keligai lo.14Tangnia gade acu teumpet beulo, nah acu peu nlim diso; acu ngkau kelame dade acu ngngwa tetti beulo nah duidung kecok gade acu kelibeu lo.15Dui kedi ne peu acu hacim diso, mede kecok dene peu acu nggum teu diso. Acu peu hekwaki mui dene ngkui teu diso.16Acu keli lo, RAMPAUBE, kedanemene n samkak kesamsang au yi kecune; n ngaugiadung ada kieesüt bam kelane, ada nreu gwanglu.17N kilabe dade n zu kebaidi so, kedanemene Ih pumteihbe rei bam; zette acu keligai lo.18Ada gwang delwe acu kelibeu lo. A ngauraume ziemne, acu keli beu lo.19Nang a rata cibam, a ngngam, nah herütpeu kemak; a ngauraumedung pelane n dwaga bam.20Rata ne a nlung teipang dida; A püt kerüt ne kepui teibam; Ngaunggia kera Ih mina de peei, dede migede gah; Alung tei relui kera Ih peei, dede Ih ngaulu ma.21A taktyei ga penui acu heiring kai; Ih hereu luge penui acu kehiadui sak kera peu. 22Penui dwaga kekairak kebam de peu hebai ge dilu; penui kwak eh bam lie kecu cet kebam dau, peu cide hetak ge dilu.23Penui miakdung peu mui dilu ciu eh penui ngau ta dilu kerane; nah penui kiadung peu nlai la muilu. 24N rata kedi penui reuga ruigai lu, nah n rata süt kecu dene penui reu tetkah lu. 25Penui gu kelungh bam de peu ngkap dilu; penui paikidung ga peu migede lungh so. 26Kedanemene nang tei ngkau kedime de penui tei keherei la. Nang tei rezam kegaime ha penui mpau daila. 27Kemau teikedi caide kemau tei dai dai kecune penuide mmaulu; penuide peu n kelikelu ga magede penui qwa bam so.28Peu penui de Kering Laisiukwak gade tei nggah dilu nah kesangme de ngngwa kerau ga ncüt so. 29Dede Ih au magah nah lungrei ne pui; n kelikelu ne peu, Tinggwang, acu kehu gage teucuh beulo.30Ih lei ge teu Tinggwang zi de twa lazie nah suiyi teu pecu kendu peu zie.31Hetumseu reca swade cide be RAMPAUBE pesui yiki gwa zie mede hetumseu pekiidung nah pe ngienglwakdung kebam swade.32Kenciepme cide ngau nah pe sui yila; nnui Tinggwang de peei kelame, peu nnui nlung ringbam lo.33Kedanemene RAMPAUBE rei kebamme kwa kingnei nah pe baangketeime de masipei tadi lama.34Peu tinggim nah kideube de pecu twalu, jaaididung nah cika pelane mlai eh kebam leune.35Kedanemene Tinggwang Zion de kelibeu zie nah Judah namdi teucuh dai beuzie; minadung cika lungh zie nah cide penui madung teilu zie.36Pe kilame leuhdung cide gumlu zie; nah pe zi de hung kelame cika lungh zie.Bridge Connectivity Solutions Pvt. Ltd.