Psalms68
Kenlang leibungkekwame ziemne, David gu lei ge, lei ge.
1Tinggwang depeu cuhlu; pe ngauraumedung de peu zangra di; pecu ngkau kelame de liede peu pe dwa gade pak dila.2Mika de guipung tetti kela nzwa, penuide de mzia dilu; mi dwa gade maca lwadi kela nzwa, ciu eh kesiame de peu Tinggwang dwa gade ngkap dilu.3Dede kesangme de peu pesuiyi lu; Tinggwang dwa gade peu penui suiyi süt lu; penui de peu renga nah suiyisüt bamlu.4Tinggwang da lei teilu! Lei tei pezi twalu! Jordan Reuki langkam ga langkiedung ga tetka gwang kecube de twalu! Pe zi au RAMPAUBE! Renga bamlu pe dwaga de!5Pa au pe pei kegahme pei, hemipuidung de gumbeu kelabe, Tinggwang au pa lungh kebam kemci ni ga bam6Tinggwang peki kegaime de lungh kera ki peula; pa lei tei eh hebaangme dungde ngngwa mpet; dede hangdeu kecangh ga ngngwa kesia bamla.7Tinggwang, nang n minadung dwaga tetpet kecudau, nang hetaideu ga tetka kegwang dau, Selah8Kideube mbeu di; Tinggwang kebam ga tinggimdung liede tingrui gai, Tinggwang kebam gade pa Sinai ga kegwang dau, Tinggwang kebam ga, Israelme Tinggwang. 9Nang, Tinggwang, tingrui kekieege langgai; nang n mapwa de tei ngkieng beu cide keherei kebam dau.10N minadung cika lungh; Nang, Tinggwang, n keyidung gade kegahme de peu.11Rampaube ne ajadungde kaibeu, nah penui dage reci ndulia kegaime au reugwa kenlangme.12Ngauraume gwangpeidung nah penui reugwame, penui pakdi, nah mipuidung kilung ga kwa kebamme sütkelu de mzi lu:13tamhaudung rangkanggeu ne kezuilu hesiudung kecak kenzim ge. Nnui mina kangge meurünkidung kakga bam kecudau, nnui daitei eh cide teino?14Ngkiengtube Tinggwang ne hegwangmedung de teizang gai, cide au Zalmon Lamlwa ga buising kei kegai nzwada.15Kengking lamlwatu au Bashan kideutu deudi deda; lamlwatu kehu ge au Bashan kideutu deudi.16Hengim eh daitie piebam no, nnui deudi kideutu kehube, lamlwatu ga Tinggwang pa lungh kera hengim kebam heni de? Kesang, RAMPAUBE cika kelungta lungh zie.17Tinggwang bagidung au cang ngkai, pecang reu pecang; Rampaube au penui kakga kemci ni ga bam, Sinai ga nzwa.18Nang kecehu ga; nang hebaang tei kebamme de lungmpet beu; nang minadung dade mapeudung ngaulu, ncu ngngwa regi eh renia kelame dade bai, ciu eh nang, RAMPAUBE Tinggwang, cika lungh lu kerane. 19Anui reidung cuibeu kelabe, Rampaube depeu samlam pung kelube tei lulo, anuide kelikebeube Tinggwang. Selah20Anui Tinggwang au kelikebeu Tinggwang; RAMPAUBE Tinggwang au ketsai gade anuide keli beulu kelabe.21Dede Tinggwang pe ngauraume peudung dangdi zie, pe zaisia eh pecu renia kera tetgwang kelame de pepeudeu mai gade teirezam zie.22Rampaube rang eh, “Ih Bashan gade a ngauraume de ngngwa cailigwang zie; Ih penuide jaaidi kecok gade ngngwa cailigwang zie23ciu eh nang n ngauraume de teingkap, n pi hejai ga dau mie lu, nah ciu eh n teudung de penui qwa n ngauraumedung dade ngaulu kerane.”24Tinggwang, penui nang tet gwang kela ngau da, a Tinggwang tet gwang kela, a hegwangpei, kemci ni gade.25Lei keteime mie raidi, hecinglei keteime pecaisui, nah sumbe ga releimedung leibungdung dap eh la.26Recakidung gade Tinggwang de samlam lu; RAMPAUBE de twalu, nnui Israel dui lwa kebam gade kegwangme.27Cika Benjamin raitu bam, heleuh ceutube, pecai Judah muiteume nah penui maadung, Zebulun muiteume nah Naphtali muiteume.28Nnui Tinggwang, Israel, nnuide tei ngkieng beu; n kengkieng anuida keulia lo, Tinggwang, nang gwang kedi tingbazie dau keulia kecu nzwa.29N kerecaki Jerusalem gade n kengkieng de anuida keulia gailo, hegwangme nda mapeudung pwagwang kecu ga.30Ceheiziu ga kebam renaam kaudung de kesiu dilu. Minadung reu, hetumseudung nah hetumnadung de tei ngkiee kegai. Penuide hengam teigai nah peu mapeudung n da pwagwang lu; mina hereu teineu kelame de teu zangra dilu.31Hegwangnadung Egypt gade mpet zie; Cush pe ba Tinggwang da gwangcang kerane kelwa zie.32Tinggwang da lei tei gailu, nnui kideube hegwangram; Selah RAMPAUBE de ketwa lei teigai lu.33Tinggimdung reu tinggim ga rwa kela pe dage, ndaa tingdau gade kebam de; pielo, pa pe kengkieng pwa sahbak gai.34Tinggwang dage n kengkieng sahgai lu; pe kedi au Israel reu, nah pe kengkieng au tingkamdung ga.35Tinggwang, n kemci ni gade nang au ngau kehing ge; Israelme Tinggwang, pe kengkieng nah kedi kengkieng minadungde peula. Tinggwang da samlam bamlo.Bridge Connectivity Solutions Pvt. Ltd.