Psalms49
Lei kempwakme muiteube ziemne. Korah namedung gu lei ge.
1Aide kingneilu, nnui mina leune; siulu, kideu ga lungh kebam leune,2kehenah nah kecehu kenanah de, kehei nah kegah pelane.3A mui macisam rang zie nah a lungcet au maci luzie.4Ih macisam de cet mning zie; Ih macisam de teu eh rang mcilia gai zie leibung kwa eh.5Kengngi gwang kecu dau Ih daitei hinglai, ngauraume acu twagwa kelu dau?6Ih daitei mina penui mahei de nlum kelame nah penui mahei ziemne ngang kelame de hingla lai?7Migede pe sinabe de rilu gailak kesang mede Tinggwang de pe teilung mi ha gailak,8kedanemene mina teilung rilu kera au pemi hungham kecune nah anui peu kera de migede ruicang gailak.9Iciu eh peu pe paube de timrimdi mene kelungta lungh bamlu kerane.10Kedanemene timrim kedi de mina ngau zie. Makecime tsai bam; kemieme de nah kemangme gah dizie nah penui mabam kedame de kaidiak dila.11Penui lungning au penui kibaume kelungta lungh kera cet lala, nah penui kelungh henidung de, ceuheu pelane ga; penui penui zidung dele penui kideube zi qula.12Dede mina, mahei kebambe, kelungta ringbam lula ma; pa au tsaidi kela teikuu nzwa da.13Aide, penui lampui, au kemie; dede minadung au penui kerangdung de suizwa lala. Selah14Meurünna ge nzwa penuide au Sheol gage kaidi la, nah ketsai ne penuide kekwabe zie. Makesangme ne penui reu tingcang ngking luzie, nah penui pumdung Sheol gade ngkap dizie, penui lung kera heni ge de gah dizie.15Dede Sheol kengkieng gade Tinggwang a teilung keli beuzie; pa acu lulu zie. Selah16Mige mahei keludau ngngi diso, nah pe ki kemdu kiee pet kedidau de.17Kedanemene pa tsai kedidau pa magede keu tet swa kelakne; pe kemdu pecu pecai nzang nghung lak.18Pa lungh kebamdau pe teilung de samlam pung lie cetla, nah nang nkatei nziemne lungh kegaidau minadung ncu hetwa peula,19pa pe peime ceheu ga mie dizie nah penui madaude kebaa de ngaudai silak.20Mige mahei bam dede maci gah kecume au tsaidi kela teikuudung nzwa da.Bridge Connectivity Solutions Pvt. Ltd.