Psalms34
David gu lei ge; pa Abimelech dwaga kemie ciem ketei eh Abimelech ne pecu gwa kedi dau.
1Ih RAMPAUBE de twa muila zie, pe ketwa a mui ga lamui zie.2Ih RAMPAUBE de twa zie! Keherei kelame de peu siulu nah penui sui yisütlu.3Acu ngngwa eh RAMPAUBE de twalo, anui nzang eh pe zi teucuh lugo.4Ih RAMPAUBE da kie nah pa a sam keli beu, nah Ih hingkela leune reuga pa acu kengkieng peu.5Pecu pie kebamme au baaha dila, nah penui zu au hengam teidi lama.6Keherei kela mipei aide RAMPAUBE dage mragai nah pa pe sam siulu nah pe keherei leune gade pecu kelibeu.7Pecu rüt kelame da RAMPAUBE tinggimgwame twagwa pung bamla nah penuide makehung gade kelilu la.8RAMPAUBE de kedak peilo delwe pe keyi de ci lulo. RAMPAUBE da nsiu kelabe de samlam pungtu. 9RAMPAUBE de rütlu, nnui pe kemci minadung. Pecu rüt kelamedung ziemne made kenrum gah.10Madau ge heri heret hinghodung ketyeipok gah dila nah mzeu lala, dede RAMPAUBE sam mzai kelame makeyibe magede camdi lak.11Gwanglu, a napeimedung, a kwa kingneilu. RAMPAUBE de herüt peu kecu Ih nnuide ledeu lia zie.12Cauge teilung luuneu lano nah tingba kekiee ge pesui lano, pa ma keyi ngaulu kerane?13Kesiabe gade mleu kezeu lulo nah kenret kerang gade kezeu lu. 14Makesia ketei gade nreu dilu nah makeyi teilu. Lungciep peeilu nah pecai zuilu. 15RAMPAUBE miak au kesamsangme reuga bamla nah pe kwen au nra kegai lam bamla. 16RAMPAUBE makesia keteime de ngkau la, kideube gade peu penuide nsungta di kerane. 17Kesamsangme penui nggia kiela nah RAMPAUBE siu lula nah penui reidung leune gade kelibeu la.18RAMPAUBE au mi pe sui sia kelame taiga lala, nah pa mina penui keregui gah kedime pelane de keli lula.19Kesamsangme da keherei kekiee bamla, dede RAMPAUBE cidungde leune gade penuide keli beula. 20Pa penui radung kainzeu pwa bamla, ketde peu cumdi lama. 21Kesiame kemaume de daptset zie. Kesamsangme de ngkau kelame de saja peuzie.22RAMPAUBE pe kilamedung de kelibeu la. Peda nsiu kera kegwangme leune migede mmau dilak.Bridge Connectivity Solutions Pvt. Ltd.