Psalms104
1Ih a teilung pelane teu RAMPAUBE de twa, RAMPAUBE a Tinggwang, nang daikenzwa ge dino! Ncu kerüt nah kemdu le bah pwa bam;2kebaa le ncu gumpwa bam pai bah kecu nzwa eh. Nang tinggim de paiki kehezuipai nzwa lim lu.3Nang n ki hesum hemwa reu gage kai lu, Nang hemwa teu n bagi teilu; nah tingkai hesiudung ga tet la.4Pa tingkai depeu samgwabe teila, mide pe kila teila.5Pa kideube bangdwa kai luda, nah cide madaude mlai lak.6Nang duikedi pwa kideube de pai nzwa gumlu da; dui ne kideutudung gum luda.7Nang dui de kesiu kegaidau penui lwa dila; nsam sah kegai kwa siu luge penui lwa renia tet dila.8Penui kideutudung reu lwahang nah langkam dung ga lwahung la, nang penui ziemne heni tei kegai ga.9Nang penui ziemne tetkah kelak herai kai dida, penui kideube de gumdai lakta.10Pa duiletdung depeu langkamdung ga lwa kera teigai; hereukidung lamlwadung kakga lwa.11Penui renaam kaunedung de dui peu la; gadadung penui hereu kap lula.12Hereuki kungga nruinedung penui ciepdung teila; penui pekiakdung gade lei teila.13Tinggim gade pa lamlwadung gage ting teirui gai beula. Kideube n samlamdung le pui lula.14Pa hekaune ziemne ceheidung peu lunghgai nah mabang mina de peu tahtyei lu kerane ciciu eh mina de peu kideube gade ketyeipok tatyei lu kerane.15Mina suiyi tei kerane pa zau teilu, olive ca, pe zu tei mbaa lu kerane, nah taktyei, pe teilung tei ngkieng lu kerane.16Lebanon ga cedar bangdung tingrui ngausüt lu; RAMPAUBE gu tsingbangdung, pa ling kegaidung de.17Cikage nruinedung penui ciep teu lula. Duirui heleibang gage pe ki tei lula.18Helungdung kideutu kehu ga lungh la, tangtsu kaunedung hetia ga mbai lula.19Pa hekeizie pei kera hekei teigai beu; tingnaimiak mpet nlüt kera peting ci bam.20Nang tingmui teigai beu, ting kemui dau renaam kaune pelane pet la.21Hinghonadung mlai kepetdau mra la nah penui ketyeipok Tinggwang dade peila.22Tingnaimiak cuh dige, penui caili dai dila nah gwang penui ki ga zip dila.23Pecai minadung penui ta ga mie la nah tinghegi kecang ma teila.24RAMPAUBO, nang ma ketsamtsam nah kekiee ge teigai da! Nang maci le cidungde pelane teilu; kideu au n kaunedung le pui luda.25Cika jaaidi, cok nah mza süt bam, peeikap gai kelak makaune lungh bam, keceu nah kedi.26Heliemdung cipau reu ga tau la, nah cika Leviathan de bam, nang ne tei kegai dui ga nggwa kera kaune da.27Cidung pelane n dade lungh bam penui de ketyeipok peting ga peulu kera.28Nang penuide cide kepeu dau, penui gwang ngkwa la; nang n ba ngkei kegai dau, penui nggei lula.29Nang nreutet dige, penui ngngi dila; nang penui cuingi keugi dicai, penui tsai dila nah penui rebui mmi caili dai dila. 30Nang penuide penui ngicui peu eh, penui de teilu; nang kideube de teilung keheci peu la.31RAMPAUBE kendu de peu kelungta bam kelube tei lulo! RAMPAUBE de peu pe bata ngau pesui yi kelube teilo!32Pa kideu ga pie gai, ge cide mbeu di; pa lamlwatudung tung gaige, penui mika mmi dila.33Ih a teilung pelane teu RAMPAUBE dage lei tei gaizie; Ih ring kebamtane ketwa lei tei a Tinggwang de twazie.34A lungcet de peu ge pecu pesui lulo, Ih a sui yizie RAMPAUBE gade.35Kemaume de peu ge kideu ga gahdi lulo, nah peu kesiame de la sita lulo. Ih a teilung pelane teu RAMPAUBE de twa zie, RAMPAUBE de twa lu!
Bridge Connectivity Solutions Pvt. Ltd.