Psalms103
David leidung.
1Ih RAMPAUBE de twagai a teilung pelane teu eh, nah a lung ga kebam pelane pezi kemci de de twagai.2Ih RAMPAUBE de twagai a teilung pelane teu eh, nah Ih pa bata keyi tei kegai leune nsunggai.3Pa n mau pelane gibeu; pa n mateei pelane tei ngkeibeu.4Pa n teilung kengkap gade kelibeu; pa keku na ngaugia teu ncu samlambeu.5Pa ma keyibedung pwa a teilung tei mnung beu, iciu eh helie ge nzwa n heriheret ting teiheci dailu. 6RAMPAUBE kenzuibe tei beula nah keherei kebamme pelane de tutiak kenzuibe tei beula.7Pa Moses dage pelungningdung peuci gai, Israelme de pe batadung ngau gai.8RAMPAUBE au mide ngaunggia nah mide ku la; pa au pelung tie; nah pa au samkak kelu kesamsang le pui. 9Pa mide kesiu eh bam lama; pa au kelungta perata eh bam lama.10Pa anui ngaulu kebui saja anuide peu lama mede anui maudung nah bata kesia ziehi peudai lama.11Kideu reuga tinghu kecu huge nzwa, pecu rüt kelame dade pe samkakkelu samsang au disüt.12Naimiak kepetle de naimiak kenlütle deige nzwa, cikenzwa deige RAMPAUBE anui dade anui mau keugi dida.13Mipei ge pe namedung dade pezai keyi nzwa, RAMPAUBE au pecu rüt kelamedung de cinzwa eh ngaunggia la.14Pa anuide daizwa teilubi ci bam; anui au rebui lie kecu pa cibam.15Anui teilung au cehei nzwa; anui luh ga mapa nzwa lungh yi cuh lula;16cide de tingkai guilwa, ge cide gah dila nah migede cide ndaa daiga lungh bi kecu ranggailak dila.17Dede RAMPAUBE de rüt kelame ziemne au, pe keku bam muila. Pe kesamsang ceheu pelane da la muila.18Penui pe samkak de kaizeu lula nah pe keledeusamdung de nsung lula.19RAMPAUBE tinggim ga pe hegwangbam bam tei luda, nah pe hegwangram au pelane reu hegwang.20RAMPAUBE de twalu, nnui pe tinggimgwame, nnui kengkingme, kengkieng nah pe sam mzai kelame, nah pa kerangbe kingnei kelame.21RAMPAUBE de twalu, nnui tinggim ga kengkiengme pelane, nnui pe kilamedung pe lungningbe tei kelame!22RAMPAUBE de twalu, pa damkelu pekiene, pane hegwang ketei heni leune ga. Ih a teilung pelane teu RAMPAUBE de twazie.Bridge Connectivity Solutions Pvt. Ltd.