Proverbs8
1Maci qu bam meni? Kecikecet pe kwa sahbak gai meni?2Kideutudung ga lampui kuung ga, puihaidung ga, maci pe sap tei luda.3Herieki dwaga namdi kenlüt kimui ga, namdi kimuidung ga, pa qu bam.4“Minadung, Ih nnuide qu bam; a kwa au kideu ga mina pelane ziemne.5Nnui kemangmedung, maci lu, nah nnui kemiemedung, nnui kecikecet lungcet bamlu kera tei maisia.6Kingnei lu, kedanemene Ih sam keyitubedung rangzeu; nah a mui ngkei kegaidau Ih kemzuibedung rang zie.7Kedanemene a mui nlumlu kebuibe rangla, nah makesiabe au a mui ngkaula.8A mui samdung pelane au kemzuibe; cidungde ga kenret mede puisau tei maukedi magede gah.9Kecikecet kebambe dade au cidung pelane mzui bam; maci ngaukelume ziemne a samdung au mzui.10Rangkanggeu swade Ih marang kelia debe luulu; kecak yitube swade maci be luulu.11Kedanemene maci au hegadung swade yiki; mahei kette pecu keda gailak.12Ih, Maci, lungcet teu eh lunghla, nah a da maci nah keyi kesia cet keci bam.13RAMPAUBE mie kehing au kesiabe de ngkau kera da. Ih ngang kecu nah pecu mning kemdi ngkaula, kesia lampui, nah kenret sam kerang Ih cidungde ngkaula.14Ada keledeu keyi nah maci kesangbe bam; Ih au kecibe; kengkieng ada bam. 15A ziemne hegwangmedung hegwang teulu bam, nah muiteumedung hezai keyibedung tei lula.16A ziemne hegwangpeidung kengking teulu bam, kedimedung nah kemzuibe teu eh kedi keteime pelane de.17Ih acu hung kelame de hungla, nah acu lungsang tei peei kelame acu ngau lubui.18A da ketwa nah maheidung bam, mahei keyi nah kesamsangbe.19A da kebam tsi au kecak swa yiki, kecak yitube swade; a dade ngau kelube au rangkanggeu yitube swa yiki.20Ih makesang lampui ga tetla, kemzeube lampuidung kakga.21Cine, Ih acu hung kelamede peu mahei gum luzie; Ih penui mabam kidung tei pui beuzie.22RAMPAUBE raitu gade acu damgai, pe batadung gade raitube.23Ndaa gede acu teilu, raitu gade, kideube teikelu dwa gade.24Duididung bam kemak dwa acu mna lu, duilet duilwa pet kemak dwa.25Lamlwadung de teigai kemak dwa, nah kideutudung dwa, acu mna lu. 26RAMPAUBE kideube mede luhdung teigai kemak dwa acu mna lu, mede kideu ga rebui raitube dwade.27Pa tinggimdung ketei dau gade Ih la dida, pa dui kecok reu gage ting teukezang kegaidau gade.28Pa nreu lege hemwadung tei kegaidau de Ih cika bam nah duilet dui pesing ga pebam tei keludau de.29Pa jaaidi penli tei kegai daude, Ih la dida, ciu eh duidung pa rangkegai gwale zangdi melu kerane, nah kideu bangbeu kedwa ziemne penli kaikebeu dau de.30Ih pe taiga la, heciemta tei kecibe nzwa; tingnaige cai tingnaige Ih au pe suiyibe, pe dwa de renga eh bammui la.31Ih pe kideu pelane de suiyi bamla, nah a suiyi au minadung da bam.32Cu, a namedung, a kwa kingnei lu, kedanemene lampuidung kainzeu kelumedung samlam ngau luzie.33Ih marang kelia de kingnei lu nah mriak lu; cide mlai diso.34A kwa kingnei kelume samlam ngau luzie. Pa a kikamdung ga tingnai ramsangne kwabam zie, a kikam tsiadung taiga de kwa eh.35Kedanemene acu peei kelume keheibe, kering ngau luzie, nah pa RAMPAUBE suiyi ngau luzie.36Dede acu ngaulu kemakme, pe teilung rezam dila; acu ngkau kelame pelane ketsai pesui la.”
Bridge Connectivity Solutions Pvt. Ltd.