Philippime3
1Kekambe, a sinamedung, Rampaube gade nnui sui yilu. Ma aidungde nnui dage raugaidai kera au a ziemne magede kenang gah, nah nnui ziemne kwakki lu kera ge.2Heteu kenzwame dade mriaklu, heta kesia teikelame dade mriaklu, miteih dang kelamedung dade mriaklu.3Kedanemene anui au anui hegeurum kelume da, Tinggwang Rabe gade reca kelame, nah Khrista Jisu gade hegie la, nah pumteihbe ga kenlum gah.4Iciu liede, Ih akatei a pumteihbe dede nlum lubui. Mi kedame ge pa pumteihbe ga kenlum lalie cet lacai, Ih nlum kieeki lu kebui bam.5Acu mna kelucai, lang hesetne benai a geu rumlu, Israelme ge, Benjamin leuhme, Hebrewme ne mna kelu Hebrewme ge; Jewme hezaibe lamde cai, Phariseeme ge,6siering lamde cai, ngqwabe de teikeherei kecume ge; hezaibe kangga kesamsang lamde cai, mmau gailakme ge.7Dede makeheibe a ziemne kemmi ge lie keladungde, Ih Khrista ziemne cidungde kemta gelie la dida.8Dede kesangbe au, cu Ih ma pelane de kemta lie la dida, kedanemene a Rampaube Khrista Jisu de cikelu pe keyi bamki kecune. Pe ziemne Ih ma pelane püt dida, nah Ih cidungde kemta lie la dida, iciu eh Ih Khrista de ngaulu kerane9nah pecu ngngwa ket teilu kerane, hezaibe gade akatei a masang kebamde be mene, dede Khrista de kenlum gade—Tinggwang dade nah kenlum gade kegwang masangde bam dida.10Iciu eh Ih pecu nah pa ringcuh daikelu kengkieng de cilu kerane nah pe reidung ga ncütlwe pa nzwa tsailu kerane,11iciu eh teilu buicai Ih de ketsai gade ringcuh daikelu ngaulu kerane.12Ih ma aidungde ngau lu, mede Ih yicang dida de kecube ma, dede Ih de cide pwa agu teilu kera ziemne gwa sui jüja gwangla, kedanemene Khrista Jisu acu pwa pegu teilu delu.13Sinamedung, Ih cide pwa agu teilu delie cetla mereu. Dede Ih mage teila: a caile kebamde nsungtadi eh a dwale kebambe gage tet gaila,14Ih kakegai de gage tet gaila, iciu eh Khrista Jisu gade Tinggwang nreule ge qukegai ziehi de ngaulu kerane.15Ciziemne anui pelane ngkieng kedime ainzwa cet lugo; dede nnui kangge nnui lungning tsam lacai, Tinggwang cide nnuide keulia beuzie.16Iciuliede, anui ngau kelude, anui cide teu lungh lugo.17Sinamedung, acu reli kelame tei lulo. Nnui ziemne anui puisau teilia kegaide nzui kelamede piesiakte lulo.18Ih ndaa aide nnui dage ma kekie ranglia dida, nah Ih cide a miakdui lwa eh ranggai daila, mina kekiee Khrista cross ngauraume tei lungh la dida.19Penui nli au kengkap, kedanemene penui tinggwang au penui za, nah penui hegie au penui hengam ga la, nah penui kideube gudung cetla.20Dede anui au tinggim peupeime ge dida, cikade anuide kelikelube, Rampaube Jisu Khrista de regui eh kwabam.21Ma pelane pekang gage kaipwa kebam kengkieng de teu eh pa anui pum kemnei dungde tei ntsam pwa pe pum kendu de nzwa tei dizie.
Bridge Connectivity Solutions Pvt. Ltd.