Philippime2
1Ciziemne, Khrista gade mide kecunglu kela, milung tau mlalu kela keku, Kemci Rabe gade ngngwa kekangbau kecu, mide keku nah kenggia kecu bam liecai,2iciucai nnui ngngwa lungge, keku ge, rabe gade ngngwa ket tei nah kelungzwa eh a suiyi teicang gailo.3Nnui ziu ci mede ngang eh magede teiso, dede henah eh kedame nswa yiki lie cetlu.4Keheibede de nnuikatei nnui suibe rünne teiso, dede mikedame suibe de tei lulo.5Khrista Jisu da kela zaireli de peu nnui dade la lulo,6pa au Tinggwang rehi nzwa liede, Tinggwang de ngngwa nsamlie süt kera cetma.7Meliene, pa pekatei pecu tei mtaklu kilame ge nzwa eh, pa mina nzwa lungh gwang, nah mina rehi nzwa miakngau tei gwang,8pa pekatei pecu tei henah delwe ketsai kecang de samzai tei gwang, nah cross gade ketsai kecang de!9Ciziemne Tinggwang de pecu tei ndu sütbeu nah pecu hezi keheibe swade diki kecu zi peu.10Cine Jisu zi gade tinggim ga kelame, kideu ga kelame nah kideu kangga kelame pelane koktung mie zie,11nah keheibe de Jisu Khrista au Rampaube lie rang zie, Peibe Tinggwang kendu ziemne.12Cine, a kumedung, nnui samzai teimui kela nzwa, Ih kebam dau rünne mene, Ih bam kemakdau au mtingki maisia. Ngngi nah mbeu eh nnuide kelikelu ta tei canglu.13Kedanemene Tinggwang peu nnuide pe lungningbe tei neu nah peu tei kerane nnuida peta tei bamlu.14Ma pelane ncam mede kesamlim mene teilu,15iciude nnui mzui nah mci nah kemau gah eh Tinggwang name tei eh kengkoi nah kemaume ceheu kakga lunghlu kerane, penui kakga nnui kideu kebaabe nzwa baalu,16kering sambe kerak teu eh, iciude Khrista tingba benai Ih kemta gage laikai tei mede bata kemta ge teidi kemakne Ih hegie luzie.17Iciude nnui kenlum reca nah ratak bam gage reca ge tei eh acu ruigai liede, Ih au a suiyi bam nah nnui pelane de ngngwa a suiyi nsam bam.18Cinzwa eh nnuide nnui sui yilu nah acu ngngwa nnui sui yilu.19Ih Rampaube Jisu lungning liecai Timothy de nnui dage lang kelwa gai kera regui bam, iciu eh Ih nnui ha cilu eh acude kecung silu kerane.20Ih nnui ziemne migede pa kenzwame helungnei kesang kelame gahlu.21Kedanemene penui pelane Jisu Khrista gudung be mene, penui ziuyidung rünne peeila.22Dede nnui pe keyi cibam, kedanemene pe na pe peide ngngwa kela nzwa, pa acu ngngwa samliakeyi dega heta tei.23Ciziemne, a ziemne dainzwa gwangzie bi kecu Ih cilu herizi pecu nnui dage langgai kera Ih regui bam.24Nah Ih de Rampaube gade de nnuida kelwa gwanglu kera Ih nlum bam.25Epaphroditus, a sinabe acu ngngwa bata tei kelabe, nah acu ngngwa reugwa tei kelabe, nah nnui samgwabe acu ngha kelame de Ih nnui dage langgai maikesia cetlu,26kedanemene pa nnui pelane da gwangneu bam dida nah nnui pa nra kebam siu kelune pa pelung keherei bam dida.27Kedanemene pa nra süt eh tsai nage da. Dede Tinggwang pecu ngaunggia beu, nah pecu rünne mene acude, iciu eh Ih alung keherei kecu reude keherei melu kerane.28Ciziemne Ih nnui dage pecu langgai neuki bam, iciu eh nnui pecu ngaudai lude nnui sui yilu kerane, nah a lungrei tei ncam dilu kerane.29Cine nnui sui yisüt eh Rampaube gade pecu ngngwalu delwe pa kenzwa mede herüt peulo.30Kedanemene pa nnui a dage teigai kelak ta tei eh Khrista gwa ketei ziemne pe teilung kerehim gage kailwe tsaidi nage delu.
Bridge Connectivity Solutions Pvt. Ltd.