Matthew17
1Lang herokne cai Jisu Peter, James nah pe caihereibe John, penuide ne ngngwalwe lamlwatu kecehu ga hang penuikatei bamdi.2Penui dwade Jisu tsamceudi. Pe zu tingnaimiak nzwadi, nah pe niadung hapwa kebaa nzwadi.3Ainie, Moses penai Elijah pecu mpau kebam penuide pwalia.4Ge Peter Jisu dage rangdi, “Rampaubo, anui aika ngngwa kebam daikenzwa gede yino! Magade nang nsui liecai, Ih paiki kecum aika ge tei beuzie, ket nziemne, ket Moses ziemne, nah ket Elijah ziemne.”5Pa marang kebamdau, ainie, hemwa kebaa ge gwang penuide sunglu, ge ainie, makwa ge hemwa gade ranggai, “Aide A Na akube da, Ih pecu asui keyibe da. Pe sam kingnei lulo.”6Ledeukelume hangcum sam cide siu luge penui ngngi sütdi nah hangdeu ga keumie ngkumdi.7Ge Jisu gwang penuide deu eh ranggai, “Cuhlu, ngngi diso.”8Cine penui ngangcuh piegai, dede Jisu gwale migede de ngau ma.9Penui lamlwa reu gade nghung keladau Jisu penuide aja kaigai, “Mina Nabe ketsai gade ringcuh dailu kemaktane mige dage de marengei kengau aide rang helo.”10Pa ledeukelumedung pecu keteugai, “Iciucai daitei eh laisiukecime Elijah gwangrai zielie rangla no?”11Jisu keligai, “Elijah gwang kesang zie, nah maleune teihemi dai beuzie.12Dede Ih nnui dage rangla, Elijah ndaa gwang dida, dede penui pecu ci luma. Meliene, penui pecu pwa penui suibe tei dida. Cide nzwa eh penui Mina Nabe de de teikeherei zie.”13Ge ledeukelume pa penui dage Duipumketeibe John ha rangzeu lie kecu cilu.14Penui maadibe da gwang luge, mige peda gwang eh pe dwaga koktungmie,15nah rangdi, “Rampaubo, a na de ngaunggia gailo, kedanemene pa au hekim kecume ge nah keherei sütla dida. Pa mi gage nah dui gage kaugai bamla.16Ih pecu ngngwa nang ledeukelume da gwang, dede penui pecu teimmi gailakdi.”17Ge Jisu keligai, “Nlumkemak nah petau kemak ceheudung, Ih daitie ge nnuide ngngwa bam laino? Ih daitie ge nnuide liabam maisia reuno? Pecu aika ada ngngwa gwanglo.”18Jisu herakesiabe de kesiu gai, ge cide pe dade mpetdi, nah henanabe de cipau ting siakdau yilu.19Pecai ledeukelume ngkim Jisu da gwang rangdi, “Daitei anui herakesiabe de gwa mpet gailak dino?”20Ge Jisu penui dage rangdi, “Nnui kenlum keceune. Ih nnui dage rangsiakte gaila, nnui kenlum ziegitsi hia nage bamcai, nnui lamlwa aide de, ‘Aika de lule mpet dilo,’ degai de cide mpet dizie, nah magede nnui teigai kelak bamlak.”21 [Dede herakesia aikenzwa au kekie nah kemmwang rünne gade gwa mpet lula.]22Penui Galilee deuceu ga kebamdau, Jisu pa ledeukelume dage rangdi, “Mina Nabe de nimpwa miba gage kaidi lai zeuda,23nah penui pecu teitset dizie, dede langcumne benai pecu teu cuh dai luzie.” Ledeukelumedung penui lungsia sütdi.24Jisu nah pa ledeukelume Capernaum nam ga gwang luge, drachma-kena ceha ha kelame gwang Peter dage rangdi, “Nnui keledeube drachma-kena ceha de peula ni?”25Peter keligai, “Yeo.” Peter kilung ga nlüt luge, Jisu peda marang raigai, “Simon, n lungning daino? Cau dade kideu ga hegwangme herahadung hala no? Pe minadung dade mi kedamedung dade no?”26Pa, “Kedamedung dade,” de rang kegai dau, Jisu pe dage rangdi, “Iciucai deuketme dade au ha mede yida”27Dede anui heraha kehame lung tei msiadi melu kerane, rejaai ga miecu, delwe kagwak kelien gailu, nah heka nghang raitube keulo. Nang pe mui nkeigai de, nang shekel ge ngau luzie. Cide keulu delwe anai gu ceha penuide peulu.”
Bridge Connectivity Solutions Pvt. Ltd.