Matthew16
1Phariseeme kangge nah Sadduceeme Jisu da gwang nah penuide tingkam gade marehi ge teilia gailo kie eh Jisu de kedei.2Dede pa penuide keligai, [“Tinghegi gwang ge, nnui rangla, ‘Ting yizie da, kedanemene ting gie zeulu.’3Tingcang dige, nnui rangla, ‘Ting yilak da, kedanemene ting gie nah remang zeulu.’ Nnui ting pie eh ting zu rangci la dede peting rehi dungde rangci gailak.]4Kesia nah nlumkemak ceheu marehi peeila, dede marehi gede peulak, Jonah marehi de gwale.” Ge Jisu penuide gidi eh tetdi.5Ledeukelume rejaai kedale bie gwang keludau, penui tangku keupung kera nsung tadi.6Jisu penui dage rangdi, “Sünne lu nah Phariseemedung nah Sadduceeme gu cehi gade mriak lulo.”7Penui katei penui kakgade mpau eh ranggai, “Anui tangku keugwang kemakne da.”8Dede Jisu penui kerang de cilu eh rangdi, “Nnui kenlum kecammedung, daitei eh nnui kakgade nnui tangku bam kemakne lie reki lano?9Nnui cude cilu mereu ni? Tangkukwak mengei le mina cang mengei pok teikelude, nah bangkelu hebie nnui hekwa kelude nsung meni?10Mede tangku hena le mina cang mdai pok teikelude nah bangkelu hebie kekiee ge nnui hekwa kelude?11Ih nnui dage tangku ha rang melie kecu nnui daitei cilu meno? Phariseeme penai Sadduceeme gu cehi gade mriak lulo.”12Pecai penui pa penuide tangku cehi gade mriak kecube mene, Phariseeme penai Sadduceeme keledeu gade mriak lulo kerang de cilu.13Cu Jisu tetpwa Caesarea Philippi kemna cuikui ga gwang luge, pa ledeukelumedung de keteugai “Minadung Mina Nabe de caulie lano?”14Ge penui rangdi, “Midungge Duipumketeibe John liela; kangge, Elijah; nah kedamedung, Jeremiah, mede caihakecime ge liela.”15Pa penui dage rangdi, “Dede nnui a cule caulie lano?”16Ge Simon Peter keli eh rangdi, “Nang au Khrista, ringkela Tinggwang Nabe.”17Jisu pe sam keligai, “Jonah napei Simon, nang samlam punglie, kedanemene pumteih nah mijai gade ncu aide peu ci luma, dede tinggim ga kebam a Pei ne ncu peu cigai.18Nah Ih n dage rangla, nang au Peter, nah aipau tsurareu gage Ih a ngqwaki teizie. Hades riekidung cide reu ngkieng dilak.19Ih tinggim hegwangram cabidung de ncu peuzie. Nang kideu ga ma keheibe de ngkui kedibe tinggim gade ngkuidi zie, nah nang kideu ga ma keheibede ngkei kebeube tinggim gade ngkeibeu zie.”20Pecai Jisu ledeukelume dage pa Khrista lie kecu midage de ranglia helo penuide aja kaigai.21Cipau ting gade Jisu pa ledeukelume dage pa Jerusalem ga hang delwe hangkiamedung, cingku kedime, nah laisiukecime ba gade keherei süt maikesia, nah mide peu pecu daptset nah langcumne benai ringcuh dai kera rang ladi.22Peter pecu ngngwa ntsam mpetlwe pecu kesiu cuh eh ranggai, “Tinggwang peu ciciu lak Rampaubo; peu madaude aide nda aide teidi helo.”23Dede Jisu nreugwang eh Peter dade rangdi, “A caile gwangdi, Satan! Nang au a lampui ga puikam ge, kedanemene nang Tinggwang zai gade mene mina zai gade cet kelane.”24Cipaucai Jisu pa ledeukelume dage rangdi, “Mina keheibe de a caisui neucai, pekatei pecu mlaidi maisia, pe krus pwalu, delwe acai suilu.25Kedanemene keheibe de pe teilung kelilu neu kelabe cide tei nggah dizie, nah keheibe de a ziemne pe teilung tei nggah kedibe, cide ngau luzie.26Kedanemene mige kideu pelane pwa pegu teilu liede pe teilung tei nggah dicai daipai kemmi ge bamno? Mige pe teilung ngau dailu kerane daipai ge pwapeu lubui no?27Kedanemene Mina Nabe pe tinggimgwame de ngngwalwe pe Pei kendu gade gwangzie. Pecai pa mina leune ziehi pe bata nsam rip gade teibeu zie.28Ih nnui dage rangsiakte gaila, nnui kakga mina kangge Nabe pe hegwangram ga kegwang dwa ketsai msi kelakdung ge sap bam.”
Bridge Connectivity Solutions Pvt. Ltd.