Lamentations5
1O RAMPAUBO, nsung gailo, anui da ge teigai kedi de; pielo delwe anui ngngam de ngau gailo.2Anui mabam ci kemakme ba gage kaibeu dida; anui kidung sangme dage.3Anui ngianadung tei dida, anui pei kegahme, nah anui puime au hemipuidung nzwa dida.4Anui rangkanggeu peu maisia anui dui kesak de ziemne, nah anui rangkanggeu peu maisia anui katei gu tsingdiak ngaulu kerane.5Anuide cai zui kelame anui cai ga mna la dida; anui leeu dida nah anui kemtak ngaulu ma.6Anui anui katei de Egypt nah Assyria de peu dida ketyeipok kennung ngaulu kerane.7Anui paume kemau tei dida, nah penui au gah da, nah anui penui maudung ziemne keherei bam dida.8Hebaangme anui reu kedi teibam dida, nah penui kengkieng gade migede anuide kelilu kera gah da.9Anui teilung kengngi gage kaigai sangne anui taktyei ngaulu, kedanemene mide teiketsetme hetaideu ga kelane.10Anui geu mimang ge lum kecu nzwa lum dida mzeu sütdi kecu de ziemne.11Mipuime de Zion gade teuhdi, nah Judah namdidung gade leitingdung de.12Hegwangnadung de penui badung gade kezu tset dida, nah kecingme de herüt peu meda.13Rehangme de peu ketang eh mei keniak tsukang le peu mei niakbam dida, nah mipeinadung tsinglwa kerütdung kangga mbeu bam dida.14Kecingme namdi rieki de püt dida, nah rehangme penui lei nah leibung de gi dida.15Anui mlung suiyi gah da nah anui helim kelim au lungrei ge dida16Hegwangpeurwa de anui peu gade nhai mie dida; co anui, anui kemau tei kedine!17Aide ziemne anui mlung mnei bam dida, ma aidungde ziemne anui miak mangau mci meda18kedanemene Zion Deutuh mta mrwa bam dida, maiserungdung ne cika rwala dida.19Dede nang, O RAMPAUBO, kelungta hegwang, nah nang n hegwangbam ga ceheu ge cai ceheu ge eh hegwang tei zie.20Nang daitei anui de kelungta nsungta dino? Nang daitei anui de peting ketie ge gidi dino?21Anuide n da ge ngngwang dailo, O RAMPAUBO, nah anui ngwanglu zie. Ndaa nzwa anui tingbadung teiheci beulo,22nang anuide mlai cangsiakdi mecai nah nang anuide n rata penlih gahdi mecai.
Bridge Connectivity Solutions Pvt. Ltd.