Lamentations4
1Kecak de hamdi zeu da; dainzwa kecak yitu de kedi dino! Tinggwang kerecaki tsukangdung puidikidung mbie leune ga zangrala dida.2Zion kehung napeidung au kecak yitube nzwa penui miwhung, dede cu au penui tangdeilidung swa de whung swa mada, li keteibe ne teikelu.3Maiserung kecang de pe nah de nküt la, dede a minadung napui penui zaisia dida, kideu ketsai ga ruitiedung nzwa.4Hereu eh ngiena mleu pe ngngak ga kop lwe bam dida; hename ketyeipok kie, dede penui ziemne magede gah da.5Ndaa taktyei yitube tyei kelame cu au puidikidung ga mzeu eh bam dida. Paini yitube kai eh lung cuh kecume cu au mimüt hekwa kelu ga zeu bam dida.6A minadung napui de saja kepeu au Sodom de saja kepeu swa de kieeki, cidung de kau zette dida nah pecu ngha kera badung kette gah. 7Zion muiteumedung au buising swade mci, tungdui swade ha, penui pumdung hega swa yiki, penui rehi au sapphire nzwa rebaha di.8Penui zu cu au miceu swade tiak dida; penui de puidikidung gade cilu meda. Penui geu au penui radung ga kihkop dida. Cide au tsing kecang nzwa cang dida.9Kingtie le hereu gade teitset kedimebe kemzeu gade tsai kedime swa penui suiyi ki dida. Luh gade magede luhlütlu mene mzeu eh, mitmit eh gah kedimedung.10Hungkela puime badung penuikatei penui name de taktyei ziemne swa dida; a minadung napui de tei kengkap ting dau penui name de penui ketyeipok teidi.11RAMPAUBE pe lungka pelane liagai; pa pe rata süt kecu lungmpet gai. Pa Zion gage mi twagai ciu eh pe bangdwadung de ru kaudi.12Kideu hegwangme de nlumlu ma, mede kideu ga kelung keheibe de nlumlu ma, ngauraume mede renia kelamedung Jerusalem kiriedung ga lütlu bui lie kecu.13Aide ciciu dida kedanemene pe caihakecime maudung nah pe cingkumedung maudung ziemne penui kemzeume de Jerusalem gade teitset kedine.14Penui miakciet eh, puidikidung ga huii la dida. Penui hejai le penui de teihera sütdi eh migede penui niadung tunggai lakdi.15Minadung penui de sahbak eh cu, “Tettilu! Keherame!” “Tettilu! Tettilu! Tung so!” Cine penui huii ladi; mina heleuhdung kak gade rangdi, “Penui aika bamsi gai lakta.”16RAMPAUBE ne penuide tei zang dida; pa penui ma pie sita dida. Penui cingkume de rüt ma, nah penui hecingme dade penui zai keyi ge de liagai ma.17Anui miakdung sia dida, kengha ngaulu mene peei pwa eh; anui gu reketbahm gade anui pie bam anuide keligai kelak heleuh gede.18Penui anui lampuidung suidi, cine anui anui puidikidung ga tetgai lakdi. Anui penlihbe au nna dida nah anui tingbadung cangla dida, anui penlihbe gwang dida.19Anui de zui kelame au ting ga lingriedung swade mzet. Penui anuide lamlwatudung gage zui mie nah hetaideu gade anuide mie eh kwabam.20Anui teilung bangbe, RAMPAUBE ne kedetkelu gwangpei de, penui biahdung gade tui kelube de pa da; pe ha ainzwa rang, pe mie kangga gade anui heleuhdung kakga lung zie.21N suiyi sütlu, Edom napoi, nang Uz deu ga kelungbe de. Dede n da keherei gwang zie; nang sak miedi zie nah n katei nnia lwak paula zie22Zion napoi, n saja de cangdi zie; pa ncu langgi ga peu lasi lakta Dede Edom napoi, pa saja peu zie; pa n maudung pwaliagai zie
Bridge Connectivity Solutions Pvt. Ltd.