Tutiakme9
1Aipaucai Abimelech, Jerubbaal napei Shechem ga mie pe pui heimedung nah pa pe pui kibaume kelak pelane dage marang eh ranggai,2“Shechem ga deuketme pelane kwen gage ngaungia eh ranggai beulo, ‘Daide be nnui ziemne yino, Jerubbaal napeidung pelane, mina riakhena nnui reu keditei kecube mi, mi hangge nnui reu keditei bam kecube beno?’ Ih au nnui ra nah nnui teihjai lie kecu nsung lulo.”3Pe pui heimedung pe keleu gade ma aidungde pelane pwa Shechem deuketme pelane dage ranggai, nah penui nlungdung Abimelech da nreu gwang eh penui rangdi, “Pa au anui sinabe.”4Pecai penui Baal Berith kerecaki gade pecu rangkanggeu riakhena peugai, nah Abimelech cide teu kemta nah samzai kegahme de lilu, cine penui pe caisui gwang.5Pecai pa Ophrah ga pe pei kelak da mie di, nah pa pe sinamedung, Jerubbaal namedung de teitsetdi, tangtsukang ge reu gage mipei riakhena de. Dede Jotham de bangbeu, Jerubbaal napei henatube, pa mbai kedine.6Pecai Shechem ga deuketme pelane nah Beth Millo ga mina pelane gwang ngkwalu nah penui mie Shechem ga tsusum ge taiga mhu bang pi gade Abimelech de hegwangpei kedetlu.7Jotham cipau ha de siu luge, pa Gerizim deutu twang ga saplu. Pa pekwa sahbak eh nah hap eh penui dage rangdi, “A kwa kingnei gailo, Shechem ga deuketme, iciude Tinggwang nnui kwa kingnei luzie.8Piage tsingbangdung penui reu hegwangpei ge keniaklu kerane mlaicu. Cine penui Olive bang dage rangdi, ‘Anui gwangpei lulo.’9Dede Olive bang penui dage keligai, ‘Ih a ca capet mede ni, cidau acu teu penui herabedung de nah mina rüt gwang, Ih mie tsingbang reu ga ruigai maisia dini?’10Cine tsingbangdung tangzüttsi bang dage rangdi, ‘Nang gwanglu! Anui gwangpei lulo.’11Dede tangzüttsi bang penui dage rangdi, ‘Ih a kekum nah a tsi keyi bui beu mede ni, iciu eh Ih mie tsingbang reu gui maisia di deni?’12Pecai tsingbangdung kubebang dage rangdi, ‘Nang gwanglu! Anui gwangpei lulo.’13Pecai kubebang penui dage rangdi, ‘Ih a zauci, cide herabedung nah mina suiyi teibeu kelade bui mtak deni Ih mie tsingbang reu gui maisia di deni?’14Pecai tsingbang pelane hetuziu dage rangdi, ‘Nang gwanglu, anui gwangpei lulo.’15Hetuziu tsingbangdung dage rangdi, ‘Magade nnui acu nnui reu gwangpei kera keniak kesang cai, gwanglu, a mie kang ga kemsiu peeilu. Dede magade mecai, hetupui gade peu mi heu pet eh Lebanon ga cedar bangdung de ru dilo.’16Ciziemne, cu nnui kesangbe nah lungsang gade Abimelech de hegwang kelang kelu tei luda cai nah nnui Jerubbaal ziemne nah pe kelak ha de petau lie lacai, nah pe bata tei kegai rehi nzwa nnui pe dage tei gai lie lacai,17a pei nnui keleu gade regi, nah pe teilung hedwa kecang gage de kaibeu, pa nnuide Midianme ba gade kelilu kebeu dau,18dede henai nnui a pei kelak de renia cuh dida nah pe napeidungde, mipei riakhena de, tangtsukang ket reu gage teitset dida. Pecai nnui Abimelech, pe kilapui napei gede, Shechem ga deuketme gwangpei kelang luda, pa au nnui sinabe kecune.19Cu Henai nnui Jerubbaal dade nah pe kelak dade kesangbe nah lungsang gade aide tei luda cai, Abimelech ha aide nnui suiyi lu, nah pa pekatei de nnui ziemne pe suiyi luzie.20Dede mecai, Abimelech dade mi heupet zie nah cide Shechem nah Beth Millo ga deuketme de rudi zie. Shechem nah Beth Millo ga deuketme dade mi heupet zie nah cide Abimelech de rudi zie.”21Pecai Jotham pakdi, delwe pa Beer namdi ga miedi. Pa pe sinabe Abimelech dade kemdei ga cika lungh ladi.22Cu Abimelech au Israel reu mmi kecum hegwang tei.23Pecai Tinggwang herakesiabe ge langpwa Abimelech penai Shechem ga deuketme kakgage teigai ciu eh shechem ga deuketme Abimelech de cwa lu kerane,24Jerubbaal napei riakhena dage tei gai kedi nah penui sinabe Abimelech, penui de teitset kedibe, nah pe sinamedung de teitset kerane pe ba kena tei ngkieng kebeu Shechem ga deuketme reu gage penui jai kekai zaisiet ta tei kegai de pie cailidai gai.25Cine Shechem ga deuketme kideutu peutwangdung ga mina de kaipwa pe lampui swa lu. Penui lampui ga kah kegwang leune gu sütlu, nah cide Abimelech dage ranggai beudi.26Pecai Gaal, Ebed napei pe sinamedung de nzang eh gwang nah penui Shechem ga mie. Shechem ga deuketme pecu nlumlu.27Penui luh ga tetmie delwe penui luh gade kubetsi railu, nah cide penui tuilu. Penui luhlüt ngyi hengyilu nah penui penui herabedung kerecaki ga mie, pecai penui matei nah penui sak, delwe penui Abimelech de reset.28Pecai, Ebed napei Gaal rangdi, “Abimelech cau no? Nah Shechem cau no, anui pegwa tei kera? Pa Jerubbaal napei me ni nah Zebul pecu kenghabe meni? Shechem namdi bangdwame, Hamor leuhme gwa teilu. Anuikatei daitei anui pegwa tei laino?29Caune mina aidungde pwa a ba gage kaibeu zie no? Iciude Ih Abimelech de langgi dizie. Pa Abimelech dage rangdi, ‘N reugwame tei ngkiee lwe petlu.’”30Zebul, namdibe ga hegwangna, Ebed napei Gaal sam cide siu luge, pe rata sütdi.31Cine pa ngkim eh Abimelech dage samgwame langgai, “Pielo, Ebed napei Gaal nah pe sinamedung Shechem ga gwang lada, nah ainie, penui au ncu mmau eh namdibe lung tei bamdida.32Ciziemne, cu, tingmui gage cuhlu, nang nah mina ncu ngngwa kebamme, delwe mie luh ga mbai eh swalu.33Iciude, cide gwang zie, tingcang, naimiak cuh kecu dau, nang tetpet zi lu delwe zangpet eh namdibe de ketanglu. Pielo, pa nah pecu ngngwa kela minadung nda gwang kela dau, nang pedage n bata nzwa teilu buisiak be tei gailu.”34Cine Abimelech nah pecu ngngwa kelame mina pelane tingmui cuhlu, nah penui shechem lampui swalu. Penui maa mdai teilu.35Ebed napei Gaal tet mpet eh namdibe rieki kelüt ga sap kwalu. Pecai Abimelech nah mina pecu ngngwa kelamedung swa kebam gade cuhlu.36Gaal minadung de ngaulu ge, pa Zebul dage rangdi, “Ainie, minamaadung hangdeutu twang tai gade nghung lada!” Zebul pedage rangdi, “Nang hangdeutudung mie mina nzwa ngaubam.”37Pecai Gaal, rang si eh rangdi, “Ainie, minamaadung hangdeutu twang tai gade nghung lada, nah maa ge au rekame gu mhu bang lampui gade gwang lada.”38Pecai Zebul pedage rangdi, “Iciucai sui daiga n mui bam no, cide teu eh nang rangdi, ‘Abimelech cau no anui pe gwa tei kera?’ Minadung aidungde nang ngaurau kecumedung meni? Kesang, cu tetpet pecu regi lo.”39Cine Gaal Shechem ga deuketme dwaga tetpet di, nah pa Abimelech de ngngwa regi.40Abimelech pecu zuimie, nah pa pe dade pakdi. Mina kekieege namdibe rieki kenlüt ga kecang rezam msia sütdi.41Pecai Abimelech Arumah nam ga lunghdi. Zebul ne Gaal de nah pe sinamedung de Shechem ga lungh kebam gade gwagi di.42Cu cide tei kedi pecai benai minadung luh ga mie pet, delwe penui cide Abimelech dage pau beu.43Cine pa minadung de ngngwalu delwe penuide maa cum teilu. Pecai pa luh ga swalwe kwabam. Pa piegai eh minadung namdibe gade tet pet kezeu ngau luge, pecai pa mbai kebam gade cuhlu delwe penuide renia eh pa penuide teitsetdi.44Abimelech nah hemaa pecu ngngwa kebamdung zangpet eh penui namdibe rieki kelüt ga sap. Dede hemaa kena mina luh ga kebam leune de renia eh penui penuide teitsetdi.45Abimelech cipaunai tingbazie pelane namdibe de ngngwa regi. Pa namdi de tuilu, nah pa minadung cika kebamme de teitsetdi. Pecai pa namdibe teu kaudi delwe cikage mcai tei zang gaidi.46Shechem reketbam mpaumedung pelane siu luge, penui El-Berith kengkieng reketbam ki ga nlütdi.47Pecai Shechem reketbam mpaume pelane gwang ngkwa kelu abimelech dage paubeu.48Cine Abimelech Zalmon Deutu ga nghanglu, pa nah pecu ngngwa kelame leune. Abimelech mreu ge pe ba gage pwalwe tsingbang gade pekiak ge bilu. Pa cide pwa cuhlwe pe hekeutu reu gage kailwe pecu ngngwa kebamme dage rangdi, “Ih tei kegai de nnui kengau leune, kelwalu, Ih nzwa tei lu.”49Cine mina leune tsingkiak ramcau bilu delwe penui Abimelech caisuidi. Pecai penui cidungde hangdeukang bung reu gage keswalu, iciu eh penui ziemne mi pwa hangdeukang bung de rugai. Cine Shechem reketbam ga mina kemlang pelane de tsaidi mipui nah mipei cangge kenzwa ge.50Pecai Abimelech Thebez nam ga miedi, nah pa Thebez nam ga ramzeuki tei twagwalu delwe pa cide tuilu.51Dede namdibe sumga kengkieng reketbam bamla, cine mipei mipui pelane nah namdibe ga kemlangme deuketme pelane cika ge pak gaidi. Penui penuikatei caile de cide ngkuidi delwe penui reketbam reuga hangdi.52Pecai Abimelech renei be lambie gwang nah pa cide ngngwa regi, nah pa cide mi le rudi kerane reketbam kimui ga kecang gwang.53Dede mipui hangge ne keniaktsu ge Abimelech peu gage kelien gai nah cide pepeura teipang di.54Pecai pa pe reunet pwa kela rehangpei dage sah mzet gai, delwe pa pe dage rangdi, “N kingtie zütlwe acu teitset di, mecai penui a ha rang zie, ‘Mipui ge ne pecu teitset dilie eh.’” Cine pe rehangpei ne pecu reutset di.55Israel ga minadung Abimelech tsai kedi ngau luge, penui bamriep ga gwangdi.56Iciu eh Tinggwang Abimelech pe siname riakhena de teitset eh pa pe pei dage kemau tei kegaide ziemne hekum peidi.57Shechemme kemau teikedi pelane ziemne Tinggwang penui reu gage saja peu. Nah, penui reu Jerubbaal napei Jotham reset de tei gwanglu.
Bridge Connectivity Solutions Pvt. Ltd.