Tutiakme8
1Ephraimmedung ne Gideon dage keteu, “Nang anui dage daipai teigai dino, nang Midianme de regi kecudau anuide qugai mene?” Penui pecu cisüt eh mmaudi.2Gideon penui dage keligai, “Nnui kecet gade Ih cu daipai tei dino? Ephraim gade kubetsi pahekwa kecu swa Abiezer luh gade kubetsi luhlüt kelube yiki meni?3Tinggwang ne Midianme hegwangna de nnui ba gage kai beu dida, Oreb penai Zeeb! Cine nnuide rang keda kegai Ih daipai teilu dino?” Pa sam aide rang kegaidau penui zai henah miedi.4Pecai Gideon Jordan Reuki ga gwanglu, delwe pa nah pecu ngngwa kela mina hai cum de, kahpetlu. Penui leudi, dede penui ngauraume de zui, jüja miedi.5Pecai pa Succoth nam ga minadung dage rangdi, “Acu ngngwa kelamedung de kehereide tangkukwak kenggwabedung peulo, penui leu kedine, iciude Ih Midianme gwangpei kena Zebah penai Zalmunna de gwa zui zie reulu.”6Succoth gwangnadung sam keligai, “Zebah penai Zalmunna badeu cu n ba ga bamdi deni anui n reugwame de tangku peu maisia kedi?”7Cine Gideon mdugai, “Kesang RAMPAUBE Zebah penai Zalmunna de a ba gage kai kebeu dau, Ih hetaideu ga hetudung nah hetuhwadung le tsingriadung tei zie cidung de teu ncu dap kerane.”8Pecai penui cikade tet pwa Penuel nam ga gwangdi nah ainzwa eh penui dage de rangdi, dede Penuel nam ga minadung Succoth nam ga minadung nzwasiak kelidi.9Cine pa Peniel nam ga minadung dage de rangdi, “Ih kezuyi teu caili kegwangdau, Ih reketbam aide teukau dizie.”10Cu Zebah penai Zalmunna Karkor namdi ga la nah penai reugwamedung penai de ngngwa la, cang kereimengei kenzwage, naimiak kepetle leuhmedung ramzeuki gwale kela kebangbe pelane, reugwame tsai kedime 120,000.11Pecai Gideon paikidung ga lungh kebammedung lampui ga hangdi, Nobah nam penai Jogbehah nam gade naimiak kepetle. Pa ramzeuki de gwaketang, ramzeuki be kwak kebam dau.12Zebah penai Zalmunna pakdi, dede pa penai de zuimie delwe Midianme gwangpei kena Zebah penai Zalmunna de tuilu. Iciu eh pa ramzeuki pelane de peu hing eh mbeudi.13Pecai Gideon, Joash napei, hereu gade cailidi, Heres ga kehang lampui de pwa eh.14Pa Succoth gade rehangme ge de tuilu nah pa pecu keteu. Pa pe ziemne Succoth gwangnadung nah cika hangkiamedung zi rau beu, mina riak hena-hena.15Pecai pa Succoth ga minadung da gwanglwe rangdi, “Zebah penai Zalmunna de pie gailo, penai ha rang eh nnui acu henuitei, ‘Zebah penai Zalmunna badeu cu n ba ga bam deni anui n reugwame leu eh kelame de tangku peu kera.’”16Pa namdibe hangkiamedung de nah hetaideu ga hetudung nah hetuhwadung keulu, delwe pa Succoth ga minadung de cidung de teu tei kehereigai.17Pecai pa Peniel reketbam de tei kau di nah pa namdi ga minadung de teitsetdi.18Pecai pa Zebah penai Zalmunna dage rangdi, “Nnui Tabor deutu gade teitset kedimedung daikenzwa kaudung geno?” Penui keligai, “Penuide nang nzwa lei. Hange ge kecu hegwangpei namedung nzwa.”19Cine pa rangdi, “Penui au a sinamedung, apui napeidung lei. RAMPAUBE ring kela nzwa, nnui peu penuide ringla lie cai Ih nnuide teitset dilak nage.”20Pecai pa peneraibe Jether dage ranggai, “Cuhlu, penuide teitsetdi!” Dede rehangbe pe kingtie zütmpet ma pa ngngi kedine, pa au rehangna ge reu kecune.21Pecai Zebah penai Zalmunna rangdi, “Nang nkatei cuhlwe anui reuga kaumie culo! Mige pe katei pe kengkieng bam kesang kecume ge nzwa.” Cine Gideon cuhlu delwe Zebah penai Zalmunna de teitsetdi. Pa hekeipetrwana-rehi kenzwa henetdungde penai utdung ngwang ga kebam dung de keulu.22Pecai Israelmedung Gideon dage rangdi, “Anui reu kedi tei lulo, nang nah n napei hangna na, nah n napei kecangde, nang anuide Midianme ba gade kelibeu kecune.”23Dede Gideon penai dage rangdi, “Ih nnui reu kedi teilak, a napei de nnui reu di lak, RAMPAUBE ne nnui reu dizie.”24Pecai Gideon penui dage rangdi, “Acu peu nnui dade mage kie lo, nnui hange ge kecu hema tui kelu gade nli ge ramcau acu peu lo.” Penui au Ishmael leuhme kecune kecak nlidung teula.25Penui sam keligai, “Anui cidungde peu bi zie.” Cine penui pai kamlu delwe hangge ge kecu cikage pe matui kelu gade nli keliengai beu.26Pa kie kegai kecak nlidung perüt cang ge haihena, hekeipetrwa-rehi netdung, teizudung, nah Midianme gwangpeidung teu kela swa gie kelu paidung de si, nah pecaide penui utdung ngwang ga kela heteiriadung de si.27Pecai Gideon cide teu hekeutupai ge teilu delwe cide pe namdi Ophrah gage kailu, ge Israelme pelane cide de cikade gwang reca di. Cide Gideon nah pe kelak ziemne hetak ge di.28Cine Israel namedung ne Midianme de gwalu nah penui au gwazuilu tadi. Cine penui deu ga Gideon ting mmi riakdai ge lungciep bamlu.29Jerubbaal, Joash napei mie pe ki ga lunghdi.30Gideon pe napei peda de lunggwang kelume riakhena bam, pa pe nau kekiee ge kebamne.31Pe nauseupui, Shechem ga kebam de, pecu mipeina ge mna beu, nah pa pezi Abimelech msiaklu.32Gideon, Joash napei, hecing süt eh tsaidi nah pecu pe pei Joash rau gage kungdi, cide Abiezer pautsa deu Ophrah ga bam.33Gideon tsaidi ge, Israelme baaldung de reca eh RAMPAUBE dage kemau teigai daidi. Penui Baal Berith de pwa penui rabe ge teidi.34Israel namedung RAMPAUBE, penui Tinggwang de nsungtadi, penuide twagwa pung kebam penui ngauraume pelane ba gade penuide kelikebeube de.35Penui Jerubbaal, Gideon, kelak dage kesamsang lialu tadi, pa Israel lungga heta keyi tei kegai nzwa.
Bridge Connectivity Solutions Pvt. Ltd.