Joshua6
1Cu Jericho namdi kirie de kadi, Israel namedung ziemne. Migede hegwale mpet nah migede helungle nlüt ma.2RAMPAUBE Joshua dage rangdi, “Pielo, Ih Jericho, pe hegwang nah pe kengkieng reugwame de n ba gage kaibeula.3Nang nah n reugwame Jericho namdi tet twagwa maisia, reugwame pelane namdi de piage tet twagwalu. Aide lang herokne tei maisia.4Cingkumedung hanghena meurünseu kii teluidung hena pwalwe samkakbung dwaga tet maisia. Pecai lang henane benai, nang namdi de pia hena tet twagwa maisia, nah cingkumedung telui kwa ngkiengsüt maisia.5Pecai ainzwa zie penui meurünseu kii de kwa ngkieng nah kwa tiesüt gailu de, nnui telui kwa siu kegai dau, mina pelane sahbak eh sahgai maisia, ciciude namdi rie kau mie dizie. Minadung, keheibe de nzuizang eh nghang dizie.”6Cine Nun napei Joshua cingkumedung de qulu delwe penui dade rangdi, “Samkak bung de pwalu, nah peu cingkumedung hang hena de meurünseu kii teluidung hena RAMPAUBE samkak bung dwa ga pwalu.”7Pecai pa minadung dade rangdi, “Mie delwe namdibe ga tet twagwalu, nah reugwame RAMPAUBE samkakbung dwaga tet zie.”8Joshua minadung dage rang kebeu de nzwa eh, cingkumedung hang hena meurünseu telui qidung hena pwalu eh RAMPAUBE samkakbung dwa tet rai lwe telui kwa, nah RAMPAUBE samkakbung pwa kelame de peu penui cai suilu.9Cingkume dwaga reugwame tetla, nah penui gu teluidung kwagai, nah pecai kekwamedung samkakbung caiga tetla, tet jüja teluidung kwa eh.10Dede Joshua minadung dage aja kai gai, “Masa so mede nnui kwa peu mide siuso, mede nnui mui gade samtie gede peu pet so Ih nnuide sah lulo de beu kemaktane. Iciude nnui sahlu maisia.”11Cine pa RAMPAUBE samkakbung de peu namdi twagwalu, piage hui twagwa eh. Pecai penui penui ramzeuki ga nlütlu, nah penui cipau ziu ramzeuki ga bamlu.12Pecai Joshua tingcang nuge cuhlu, nah cingkumedung RAMPAUBE samkakbung de pwa cuhlu.13Cingkume hang hena meurünseu telui qidung hena pwa kelamedung RAMPAUBE samkakbung dwaga tet jüja la, nah teluidung kwala. Reugwame penui dwa ga tetla, dede pecai kekwame RAMPAUBE Samkakbung caiga tetla, penui teluidung kwa jüja la.14Lang pekenane benai penui namdi piage tet twagwa dailu nah ramzeuki ga caili gwanglu. Penui aide lang herokne teilu.15Cinzwa eh lang henane benai nuge tingba luge Israelme cuhlu, nah keda dau nzwa penui namdi de pia hena tet twagwalu, cipau nai rünne penui namdi de pia hena tet twagwa.16Cu cinzwa eh pe henabe pia, cingkume teluidung kwagai, nah Joshua minadung dade rangdi, “Sahgai! Kedanemene RAMPAUBE nnuide namdi de peu dida lu.17Namdi de, cide nah cika kebam leune de, tei msiadi kerane RAMPAUBE ziemne keu ntsam dida. Helipui Rahab rünne ringlu zie, pa nah peki ga pecu ngngwalung kebamme leune, kedanemene pa anui langkegai reketme de kebai kebeune.18Dede nnui ziemne au, maniadung tei msiadi kera keu ntsam pwa kebam gade nnui keu so, tei msiadi kera ziemne nnui keu ntsam kecu dau, nnui keu ntsam pwa kebam gade keu melu kerane, nah ciciu eh Israel ramzeuki de tei msiadi kera ziemne keu ntsam nah cika ge keherei teugwang gai melu kerane.19Rangkanggeu nah kecak, nah hetageu nah hegeu le tei keludung peciakne, cidungde RAMPAUBE dage keu ntsam gailu. Cidung de RAMPAUBE mabam gage kaibi maisia.”20Cine minadung sahgai nah penui teluidung kwagai. Cinzwa eh minadung telui kwa siulu ge, penui sahbak eh sahgai, ge namdi kirie de kau miedi, nah minadung namdi ga nghangdi, mileune de penui dwaga nzui jüja, nah penui namdi de tuilu.21Penui namdi ga kebam peciakne de kingtie le teitset ciak dedi, mipei gade mipui kecang, hena gade hecing kecang, hetumseu, meurün, nah gada de de.22Pecai Joshua hangdeu reket kebam kena dade rangdi, “Helipui ki ga lüt cu, nah cikade mipuibe de nah peda kebamme pelane de ngngwa mpetlu, nnai pe dage sampet kebeu nzwa.”23Cine reket ketei rehang kena de lütlu delwe Rahab, nah pepei, pepui, pe siname nah peda kebammedung pelane de ngngwa mpetlu, nah penui pe kibaume pelane de ngngwa mpetlu delwe penuide Israelme ramzeuki gwale ge kailu.24Penui namdi nah cika kebam peciakne mi le rudi. Kecak, rangkanggeu, hetageu nah hegeu lidung rünne, penui RAMPAUBE kerecaki mabam gage kailu.25Dede Joshua helipui Rahab nah pepei kibaume, nah peda kebam peciakne de peu ringlu. Pa Israelme kakga henai kecang de lunghla, kedanemene pa reketme Joshua ne Jericho de ncet kera lang kegai kena de kebai kebeune.26Ge Joshua cipau tingdau penuide peu sampet eh ranggai, “Jericho, namdi aide teu cuh nah retak dai kecume de peu RAMPAUBE dwa gade reset pung kelube teilo. Pe bangdwa kecube pe neraibe pei de hiak zie, nah pe kiriedung tei cuh kecube pena henatube de hiak dizie.”27Cine RAMPAUBE au Joshua de ngngwala nah pe kendu de Canaan deudi leune ga zangra ladi.
Bridge Connectivity Solutions Pvt. Ltd.