Joshua5
1Cidau Amorme gwangpeidung pelane, Jordan naimiak kenlütle kebammedung nah Canaanme gwangpeidung pelane, Jaaidi ga kebamme RAMPAUBE ne Israel namedung ziemne Jordan ga duidi de penui kahpetlu kemaktane teicang beukedi siulu penui mlung tuiidi, nah rabe penuida bamsi tadi Israel namedung ziemne.2Cipau tingdau RAMPAUBE Joshua da rangdi, “Nkatei nziemne kieceudung teilwe pia kenabe tei eh Israel namedung geurumlu kemakme geurum lu.”3Ge Joshua pa kieceudung pe ziemne teilwe Gibeath Haaraloth deutu gade Israel namedung geurumlu.4Egypt gade mina mpetkelu leu mipeinadung hereu keteimedung, penui gwang kela hetaideu kecuk lampui ga tsai kedime; penui Egypt gade mpet kelu cai aipau kie de ziemne Joshua penui geurumlu.5Kedanemene Cika de mpetkelu leu hegeurum ludi, dede Egypt gade mpetlu eh hetaideu ga kela tingdau mnakelu leune hegeurum ma.6Israel namedung hetaideu ga mmi riakdai tetgwang, Egypt gade mpet kelu heleuh pelane gade mipei hereu teilu kebuime de ngkap ciakdi kemaktane, kedanemene penui RAMPAUBE sam kingnei lu kemakne. RAMPAUBE penui paume dage hangdeu tungdui nah heliadui lwa kebam de anuide peu zielie sampet kebeu de peu penuide ngau lak lie penui dage sampetdi.7Dede pa penui nding ga penui napeidung Joshua ne hegeurum kelume de teu ncuhlu, hegeurumlu meliede, kedanemene penui hetaideu ga keladau hegeurumlu kemakne.8Cinzwa gwang heleuh pelane hegeurum cang kelucai, penui jamdung laidi kemakta Israelme pelane ramzeuki ga bamdi.9Ge RAMPAUBE Joshua da rangdi, “Henai nnui dade Ih Egyptme gu hengamdung de keukezia dida.” Cine, henai kecang de heni zi cide Gilgal lie qula.10Cine Israel namedung Gilgal ga ramzeuki teilu nah Kahkegwang ngyi cipaube kei zie ziangreiemdai benai mneilu, tinghegi Jericho langkie gade.11Kahkegwang tingba pecia benai, cipau benai, penui deu gade ngaukelube cehi kaikemak tangku nah ru kelu hebi tyeilu.12Penui deu gade ngau kelu taktyei cai benai gade manna ngausi tadi. Israelme namedung ziemne manna ngausi tadi, dede penui cipau tingkum de Canaan deudi gade ngau kelu de tyeilu.13Cinzwa eh Joshua Jericho tai ga kebam dau, pa ngang cuh eh piegai, ge ainie mige pe ba ga kingtie pwalwe pe dwa sap kebam ngau, Joshua peda mie nah peda rangdi, “Nang anui lambie mi anui ngauraume lambie no?”14Pa rangdi, “Kette ma.” Dede cu Ih RAMPAUBE gu reugwa muibe tei kera gwang la. Ge Joshua hangdeu ga keumie pecu reca eh rangdi, “Pe kilabe de a mpaube dai rang lano?”15RAMPAUBE gu reugwa muibe Joshua dage rangdi, “N picum n pi gade keu mpet dilu, kedanemene nang sap kebam ni de mci lu,” Cine Joshua cide teilu.
Bridge Connectivity Solutions Pvt. Ltd.