Job9
1Cipaucai Job keligai,2“Ih aide ainzwa kecu kesangsiakpe ci. Dede dainzwa Tinggwang dwa gade mige petau lie eh ranglu lai?3Magade pa Tinggwang de rang repia neula cai, pa pecu pecang gade piage de pe sam keli gailak.4Tinggwang au mteu nah ngkieng; cauge pecu renia eh saplu dino?—5Pa pe rata kegaidau mide mrai rang nswa gai mene lamlwatudung tei mlai nah ngkap dila,6pa hangdeube pe bam gade teu kelai mpet dila nah pe tsiadung de kelui gaila.7Tinggwang tingnaimiak de peu cuh helo de sam kaibeu eh, cide cuh lama, nah hegidung de gum kelabe de da,8pa pekatei tinggimdung teukam la nah jaaidi kenuak kegaidung kam dila,9pa Gibei, Hegikamca, Tialiangkileimena, nah tingpile gidung teigai.10Pa ma kedidung nah pei gai kelakbedung teigai, nah miswakegah batadung pei canggai kelakbe teigai.11Pielo, pa a taiga kah gwangla, nah Ih pecu ngau ma; pa tetkah gwang, dede Ih pecu cilu ma.12Pa mage keuteudi liede, cauge pecu kam lulai? Cauge pe dade, ‘Nang daitei au no?’ de keteu lulai.13Tinggwang pe rata keu nli dilak; Rahab de kenghame pe kangga keumie di.14Dai cam nage Ih pe sam keli lai, pecu rang renia kera Ih samdung kedet lubui ni?15Ih samsang liede, Ih pe sam keli gailak; Ih a tuketiakbe dade a nggia rünne kie lubui.16Ih pecu qugai nah pa a sam keligai liede, pa a kwa kingnei bamlie kecu Ih nlum gailak.17Kedanemene pa acu rahang ge le teipang gai kelane nah pekie kegah gade a rezamdung tei nkiee beula.18Pa acu peu ngngi dai gailakdi; dede pa acu kekaa le kepui teibeu.19Aide kengkieng gu ge liecai, ainie, pa au ngkieng! Aide kemzui gu ge liecai, cauge pecu tutiak ki gage qugai lulai?20Ih mzui nah masang bam liede, Ih kerang de ne acu mmau zie; nah ada kemau ge de bam meliede, a samdung ne acu mmau dizie.21Ih kemau ge de gah, dede Ih akatei a teilung de ku meda; Ih akatei a teilung de ngkau la.22Magede pe kentsam gah, cine Ih rangla Tinggwang mau kemakme nah kesiame de ngngwa ncüt delwe ngkap dila.23Kedap dene zette teitset dige, pa kemzuime rei dede teu henui teila.24Tinggwang kideube pwa kenlienme de peu dida; Tinggwang tutiakme miak kezui dila. Cide Tinggwang ne teigai meliecai, caune teigai no?25A tingbaziedung au pak kela samgwame swade mzet; a tingbaziedung pak tetdi zeu; penui ma kehei gade de ma keyi kette ngauma.26Cidungde au liem mzettube nzwa da, nah lingrie pe taktyei reuga simmie kecu nzwa mzet ge.27Magade Ih a ncamdung de nsungta dizie degai liede, nah Ih a sui kesia de gidi eh a sui yilu zie degai de,28Ih a lungreidung de hing lazie kedanemene nang acu mzui lie de beu kelak Ih ci kebamne.29Acu mmau dizie; cine, daitei, Ih kemta gage a lung naang bam lai?30Magade Ih akatei acu buising dui le duipia nah aba tei mcigi dide,31Tinggwang acu hekwaki kecok gage keliengai dizie, nah akatei a painidung liede acu ngkau dizie.32Kedanemene Tinggwang au Ih nzwa mina ma, Ih pecu pe sam keligailu kera, nah tutiak ki ga anai gwang ncütlu kera.33Anai kakga migede tutiakme gah pe ba anai reu ga kailu kera.34A dade Tinggwang saja keu mpetdi kera tutiakme keda ge de gah, pe ratadung le acu keheu kera gade acu keu mbailu kera.35Iciu lucai Ih pecu hing mene rang zie. Dede cu ainzwa kebam dau, Ih cide tei gailak.
Bridge Connectivity Solutions Pvt. Ltd.