Job14
1Mipei, mipui dade lunghgwang kelube, tingkak nage ziemne lunghla nah keherei le pui.2Hangdeu gade mapa ge pwak cuh nah dangtüt di kela nzwa; tingkaumie nzwa pakdi la nah bam tie lama.3Nang ma aidungde keheibe de piegai lani? Nang acu tutiak gage ngngwa gai zieni?4Cauge ma kehera gade ma kemcibe keu mpet lulai? Migede ma.5Mina teilungh au mrai riem pwabam dida. Pa lungh kera keidung riak au n da bam; pa lungh kera nangne riem pwabam nah pa cide nreu kahpet gailak.6Pecu peu ntak gai kerane pecu pie tadi lu, iciu eh pa tei lubui cai liteukelame ge nzwa eh peu pecu pe tingba gade renga eh pesuilu kerane.7Tsingbang ge ziemne keregui ge bam; cide de dang dicai, cide bwa pet dai lubui, iciu eh pe kiak kerenunabe gah di kelakne.8Pe mah hangdeu gade cingdi, nah pemui hangdeu ga tsai zeudi liede,9cide dui nghui gai kecu rünne liede, cide bwacuh zie nah mabang ge nzwa pe kiakdung pet zie.10Dede mina tsaidi ge; pe kengkieng gah dila; kesang, mina tsai dila, nah pecai pa daiga ladi no?11Rejaai gade dui gahdi kela nzwa, nah hereuki ga dui gahdi nah cangdi kela nzwa,12cinzwa mina de tsai dila nah cuh dai lama. Tinggimdung gah di kemaktane, penui nrak cuh dai lakta nah penui zip kezeu gade nrak cuh lakta.13Oh, nang acu kehereidung gade Sheol gage kebai di beu, nah n rata de cangdi kemaktane nang acu kengkim ni gage kebai di kera, nah peting ge rietlu eh cika peu acu bamlu delwe acu nsung dailu lie cai!14Mige tsai dicai, pa ringdai lubui ni? Iciu cai, Ih keherei ting leune de cika kwabam neu lie Ih kerelui ngau kemaktane.15Nang qugai zie, nah Ih ncu keligai zie. Nang n bata de nsui luzie.16Nang a pikietdung peilu eh pie rengei beu zie; nang a maudung nsungbam lak.17A maudung nsung gage baang dizie; nang Ih tei mau kedi leune ha dizie.18Dede lamlwadung kau dila nah cidungde magede tadi la; tsuradung de pe bam gade tei mlai mpet dila;19dui ne tangtsudung de dia gidi la; duinai ne kideu gu rebui dia gidi la. Ainzwa eh, nang mina keregui de ngkap dila.20Nang pe reu ngkieng mui lula, nah pa tetdi la; nang pe zu tei ntsam dila nah pecu tsai kera lang gidi la.21Pe namedung de herüt peu liede, pa cide ci lama; nah penuide de teu henah di liede, pa cide ngau lama.22Pa pe pumteih teei kecude gwale cima, nah pa pekatei pe ziemne hei eh hap la.
Bridge Connectivity Solutions Pvt. Ltd.