Job13
1Pielo, a miak le aidungde ngau ciak da; a kwen le siu da nah cilu da.2Nnui ci kebamde, Ih de cibam; Ih nnui swa sia soma.3Dede, Ngkiengtube Tinggwang de Ih resiu zie; Ih Tinggwang de ngngwa samlim neula.4Dede kesangbe de nnui kenret le ha dila; nnui au pemi kegah mide teikemmime .5Oh, nnui pelane ngngwa ziune bamlu! Cide le nnui maci zie.6A kecet de kingneilo; a nggia kie kegai de kingneilo.7Nang Tinggwang ziemne samsang kemak samdung, nah mide cwa kela samdung pe ziemne rangbeu zieni?8Nnui pe lam pwa zieni? Tinggwang ziemne nnui hetiak tiak beu zieni?9Pa nnuide peei mpet kegaidau nnui ziemne yi zieni? Nnui mina de cwalu kela nzwa pecu cwa lubui ni?10Pa nnuide kesiu bi zie ngkim eh nnui milam kepwa zai tei dicai.11Pe kengkieng le nnuide keheu, nah pe rata nnui reu ga gwang di lakni?12Nnui nsungbam kera samdung au mimüt le tei kelu macisamdung; nnui kiriedung au lidei le tei kelu kiriedung.13Ziune eh peu akatei bamlo, iciu eh Ih maranglu kerane, a da dai gwang zie bi peu gwang lo.14Ih akatei acu kerehim gage kai luzie; Ih a teilung akatei a ba gage kai luzie.15Pielo, Tinggwang acu teitset lie cai, Ih a keregui kette gah dizie; iciuliede, Ih pe dwaga a mzeu rang zie.16Acu kelilu kera kie aide zie da, kedanemene kenlienme migede pe dwaga gwang gailak.17Tinggwang, a samdung kingnei sunne gailo; Ih rang ndu kegaidung de kingnei gailo.18Pielo cu au, Ih a mzeu be rang kera mtei luda; Ih petau lie kecu Ih cibam.19Tutiak bam gade acu ngngwa renia kera cauno? Nang cide tei kera gwang eh, Ih mau delie lucai, iciu cai Ih zingde eh tsaidi luzie.20Tinggwang, a ziemne ma kena ge tei gailo, nah Ih n dade mbai tadi zie:21a dade n rata ba de keu nzia dilu, nah n rata le peu acu tei ngngi tadi lu.22Pecai acu qugai lu, nah Ih keligai zie; mede acu peu ncu resiulo, nah nang a sam keligai lo.23A kesiadung nah a maudung dai kiee ge bam no? Ih teimau kedi be nah a mau peu acu ci gailo.24Daitei nang a dade nreu tetdi lano nah daitei acu n ngauraume ge nzwa pei lano?25Guigi kedi manei nage de nang tei keherei zieni? Reigau kecangh ge de nang gwaketang zieni?26Kedanemene nang kemau hungsüt kecu dungge pwa acu mmaula; nang acu Ih henadau a kesiadung de peu gumdailu.27Nang a pi hegeuria le keulu; a lampuidung nang pie teune bam; nah a pi tet kegai hangdeu de de nang pie teune bam28Ih ma timrim eh gahdi kelabe ge liede, paiheni taklei tyei kedibe ge nzwa.
Bridge Connectivity Solutions Pvt. Ltd.