Jeremiah7
1RAMPAUBE Jeremiah dage sam rang kegai,2“RAMPAUBE kirie ga saplwe sam aide rang lulo! ‘Nnui Judahme pelane, RAMPAUBE de reca zielie pe kirie ga kelwetme, RAMPAUBE sam kingnei lulo.3Reugwame reu RAMPAUBE, Israelme Tinggwang, aide ranggai: Nnui kelungh zai nah nnui teikeladung petau teilu, ciude Ih nnuide peu aipau deu ga lungh bam luzie.4Nnuide kecwa samdung de nlum sita dilu, “RAMPAUBE Kerecaki aika bam! RAMPAUBE Kerecaki aika bam! RAMPAUBE Kerecaki aika bam!” de rang eh.5Kedanemene nnui kelungh zaidung nah teikeladung petau tei lacai; nnui hangge ge dade kemzeube tei lucai,6nnui hangdeu aika lungh kebamme, sangme, nggiana nah hemipui qwadung luteu tadi, mede aika ge kemzeume jai tei lwagai tadi, nah nnui ziemne siadi kera hera kedadung de reca tadi cai,7iciucai Ih nnuide peu aipau heni ga, Ih ndaa nnui paumedung de kelungta teu lungh kera peu kedi deu ga peu lungh zie.8Ainie! Nnui au nnuide nghalu kemak kecwa samdung nlum la.9Ma rega, mide teitset, nah mmha la ni? Nnui kenret sam teu reset nah Baal dage marim kehengui reca teigai beu lani, nah nnui cikemakbe hera kedabe caisui lani?10Pecai nnui a zi teu qukela aipau kerecaki ga gwang saplwe, “Anuide kelilu da,” de eh rang la ni, iciu eh nnui kengkau ta aidungde leune teilu kerane?11Aipau kerecaki, a zi teu qukela de süt ketyeime bam lie nnui cetla ni? Dede ainie, Ih cide ngau dida—aide RAMPAUBE ne ndugai. 12‘Cine Shiloh nam ga kebam a kiga mielo, Ih raitu gade a zi kai kenzeu de ga, nah Ih cika a mina Israelme zaisiet ziemne daipai teibi pielo.13Cine cu, nnui heta kesia tei keladung ziemne, Ih peting peting dau nnui de ranglia, dede nnui kingnei ma. Ih nnuide gwanglo qugai, dede nnui keli beuma—aide RAMPAUBE ndugai.14Cine, Ih Shiloh ga tei kegai nzwa, a zi teu qu kebam aipau kide, nnui nlum kebam ki, Ih nnui paupaime nah nnuide kepeu ki aide gage de teigai zie.15Ih nnui sinamedung, Ephraim leuhmedung pelane de a dwa gade langgi kedi nzwa nnuide de langgi dizie.’16Jeremiah, aipaume ziemne kekie teiso, nah penui nding tei eh hap, mede kekie teiso, nah a dage kiegai helo, kedanemene Ih n kwa kingnei laklu.17Nang penui Judahme namdidung ga nah Jerusalem puidikidung ga penui dai tei labi ngau meni?18Hename tsing peei hekwala, nah mipeime mi tei! Mipuime penui tinggimdung gwangpui lie qu kela rabepui ziemne tangku ru kera tokkui henet bam, nah a rata tei kerane hera kedadung dage zau reca ruigai beula.19Penui a rata tei kesang lani?—aide RAMPAUBE ne ndugai—penuikatei penui rata teibam meni, ciu eh penui reu ga hengam teugwang gai kera?20Cine RAMPAUBE Tinggwang aide rangzeu, ‘Pielo, a rata nah lunghop kerecaki ni aide gage ruigai zie, mina nah makaune da, luhdung ga tsingbang nah hangdeu ga matsi da. Cide heu zie nah madaude tei mmüt gailak dizie.’21Reugwame reu RAMPAUBE, Israel Tinggwang aide rangla, ‘Nnui keru recadung de nnui ratakdung gage kai ncüt lulo nah hetei cidungde tyeilu.22Ih nnui paupaime de Egypt gade ngngwa kempet dau, Ih penui dade magede teu maisia dima. Ih keru reca nah ratakdung ziemne aja gede kai beuma.23Ih penuide aja aide rünne pwapeu, “A kwa kingnei lu, iciude Ih nnui Tinggwang luzie nah nnui a mina luzie. Cine Ih nnuide rang kebeu leune mzailu, ciude nnui ziemne yi luzie.”24Dede penui kingnei ma mede penui lung kaima. Penui lung kesia nah helung ketak lungning de teu eh penui lungh, cine penui yisi meliene sia reureu di.25Nnui paupaime Egypt gade tet mpet kedi benai gade henai kecang, Ih nnui dage a kilame pelane, a caihakecime de nnui dage langgai. Ih penuide langgai daidai gai.26Dede penui a kwa kingnei ma, mede penui lung kaima. Meliene, penui lung takdi. Penui au penui paupaime swade sia kidi.’27Penui dage sam aidungde ranglia lulo, dede penui n sam kingnei lak. Aidungde penui dage ndu gai lulo, dede penui ncu samli peulak.28Penui dage ranglo: Aipau heleuh de au RAMPAUBE penui Tinggwang kwa kingnei la kemakme nah samzai teila kemakme. Kesangbe gah dida nah penui mui ga bamsi meda.29Oh Jerusalemmedung, nnui peutam biet nah taidi eh nnui peutam kelien gi dilu. Hangdeutu gade tsaibai lei teilu. Kedanemene RAMPAUBE heleuh aide de pe rata eh mlaidi nah pütdi delu.30“Judah namedung a miakdwa gade kemau tei dida, a zi teu qukela kerecaki gage penui ngkaukela mamiedung kai eh tei hera dida, de eh RAMPAUBE ranggai.31Pecai penui nlumkemakme recabam Ben Hinnom langkam ga, Topheth gage teilu. Penui aide mipeime nah mipuime mi gage keru reca teibeu kerane teigai—Ih cide teilo samkai beu ma, mede cide a lung gade gwang ma.32Cine pielo, tingbadung gwangla da—aide RAMPAUBE ndugai—Topheth mede Ben Hinnom langkam de eh qu si lakta. Cide Teiketset Langkam dizie; penui Topheth gage ketsai paaudung kung kera pebam gahdi kemaktane kung zie.33Ketsai paaudung de tingkam ruine nah kideu ga makaune taktyei ge dizie, nah migede cidungde de gwa gidi kera gah dizie.34Ih Judah ga namdidung nah Jerusalem ga puidikidung ga suiyi nah renga kecu kwa, lakciubepei nah lakciubepui suiyi kwa peu penli tei dizie, kedanemene hangdeu de mta mrwa dizie.”
Bridge Connectivity Solutions Pvt. Ltd.