Jeremiah6
1“Benjamin leuhme mina, kwaklu kerane peeilu, Jerusalem gade paklu eh. Tekoa namdi gade telui kwagai lu. Beth Hakkerem nam gade saulia pwacuh gailu, kesiabe au tingpeule bie de gwangla; ma kengkap kedi ge gwangla da.2Zion namdi, hezukeyi nah nnwa kebam de tei msia dizie.3Hegwangmedung pe reugwame de ngngwa cika ramzeu zie; penui ramzeukidung le namdi de tei twagwa zie; nah hangge ge kecu penui sui ga ramzeuki teizie.”4“Jerusalem gwaketang kera mteilu. Cuhlu, tingna dauge gwaketang zie. Ri ham dida, tingbazie cangdi lauda, iciu eh tinghegi ting kaumie gwangdi zeuda.5Dede anui tingmui gwaketang mie pe kengking reketbam tei msia dizie.”6Kedanemene reugwame reu RAMPAUBE aide rangla: “Pegu tsingbangdung bilu, delwe Jerusalem de twagwa eh gwaketang kerane mteilu. Aipau namdide gwa kera petau, kedanemene cide au mide ngaukerau kecu le puidi delu.7Tekwa ge dui kemci lwa bam kela nzwa, ciu eh aipau namdi de gade ma kesiabe mpet bammui la. Kehebwak nah petaukemak pelung ga pui; kemra nah rejamdung a dwaga lamui dida.8Hezaikeyibe luulu, Jerusalem, meliecai Ih n dade nreu tet dizie nah Ih ncu kengkap ge tei dizie, mina lungh kemak deu ge dizie.”9Reugwame reu RAMPAUBE aide rangla, “Penui kubeluh ga bang kenzeu de nzwa Israel ga bang kenzeume de tui hekwa luzie. N ba ketwa pet dai eh kubeluh gade kubetsi rai lulo.10Caugame dage Ih rangbeu nah mriak lulo beu de penui kingneilu zie no? Pielo! Penui kwendung au hegeurum ma; penui kingneilu tadi! Pielo! RAMPAUBE sam gwang penui de ledeu kera gwang, dede penui cide luneu tadi.”11Dede a da RAMPAUBE rata de bam dida. Ih cide pung leubam dida. Pa a dage rang, “Lampuiki ga henamedung reu gage ruigai di nah heluibwamedung dage. Kedanemene mina pelane de penau de si eh keuteu dizie; nah kecingme pemmi kiee kedime de si.12Penui kidung kedame da gwang dizie, penui luhdung de nah penui naudung de ncüt eh. Kedanemene Ih a bale hangdeu aide ga lungh kebamme de gwaketang zie—aide RAMPAUBE ne ndukegai.13RAMPAUBE ndukegai penui keceu gade ditume pelane masangkemak mahei de hengim. Caihakecibe gade cingkube kecang, pelane mide kecwa tah teila.14Pe zi nage gade penui a minadung zamdung tei ngkei gai, rang eh, ‘Kezuyi, Kezuyi,’ cika kezuyi gah kebam dau.15Penui kemneu tei kedi dau ngngam la ni? Penui au ngngam lama; penui dainzwa eh mizu gie dila bi ci lama! Cine penui de kau kedime kakga kau dizie; penuide saja kepeu dau penui de de teu nghung dizie, RAMPAUBE ranggai.”16RAMPAUBE aide rangla, “Puihai ga saplwe pielo; puigwadung daiga bambi keteu lo. ‘Lampui keyi daiga no?’ Cika mie eh nnui ziemne kemtak bam ge peeilu. Dede minadung cu, ‘Anui mie lak,’ dedi.17Ih nnui ziemne telui kwa kingnei kera reketme de kedet pwabam. Dede penui keligai, ‘Anui kingnei lak.’18Cine, heleuhdung, kingneilu! Pielu, nnui zierangmedung, penuide dai nzwa di zie bi.19Siulu, kideube! Pielo, Ih mina aidungde dage kengkap teugwang beu zie da—aide penui kecet ziehi. Penui a sam nah hezai mnei ma, meliene penui cide mlai dida.”20“Sheba cuikui gade perim kehengui aide a ziemne pekie dai zieno? Mede kideu kemdei gade kegwang marim kehengui? Nnui keru ratakdung Ih lulak, mede nnui recadung de lu gailak.21Cine RAMPAUBE aide rang, ‘Pielu, Ih aipau Judah minadung de puikam kaibeu zie. Penui cipau reu gade kau mie zie—pe peime nah pe napeidung. Lungh kebamme nah penui kidame liede gah dizie.’22Cine RAMPAUBE aide rang, ‘Pielu, tingpeule deu gade mina gwangla da, kideu kemdei gade heleuh kengking hereu mtei bam dida.23Penui lakpidung nah hengeidung keu ncuh luzie. Penui au zaisia nah keku kehung gah. Penui kwa duidi kemra nzwa, nah penui hekündung gade tetla, ncu regi kerane, penui ngngwa hereu tei kera mtei luda, Zion napui.’”24Anui penui ha de siu da nah anui badung ziakte dida. Lungrei ne anuide hena tedteei nzwa gumpwa dida.25Luhdung ga mie so, nah lampuidung ga tet so, kedanemene ngauraume kingtiedung nah kehing le twagwa pwa bam dida.26A leuhmedung, rosopai ba lu nah mimüt ga mlak lu; kepumlibe ziemne suisiet kehap nzwa keteei kwa kwalu, kedanemene ngaurau kengkapbe anui da zette gwang zie delu.27“Ih ne ncu teilu, Jeremiah, a mina de kedak pielo, nang hegeu kedakpie kera nzwa, ciu eh nang penui lampuidung pie nah kedak pie zie.28Penui au minadung kakgade penui lungh taktume, mi ha kenretpe rang rwapwa kelame. Penui pelane hetageu nah hegeu nzwa tak delwe samsang kemak tah teila.29Mimütpingdung mi ne ru lum swet dida; mi ne hegeu de ru nggah dida. Penui de tei mci bam de kemta da, kedanemene kesiabe keu mpet di melu.30Penuide le pwa rangkanggeu mlai kedibe de eh qu zie, kedanemene RAMPAUBE penuide mlai di delu.”
Bridge Connectivity Solutions Pvt. Ltd.