Jeremiah38
1Tingnai ge, Mattan napei Shephatiah, Pashhur napei Gedaliah, Shelemiah napei Jehukal, nah Malkijah napei Pashhur penui Jeremiah minadung dage rang kegai samdung de siulu. Pa ainzwa eh rangbam,2“RAMPAUBE aide rangla: Keheibe de Jerusalem namdi aide ga lungh kebamme kingtie, herakum, nah mateei gade tsai zie. Dede caugamme Babylonme da mpet bi cidungde ringlu zie. Pa tsai di kera gade pak luzie, nah ringlu zie.3RAMPAUBE aide rangla: Namdi aide Babylon gwangpei reugwamedung ba gage kai dizie, nah pane cide tui luzie.”4Cine kedimedung hegwangpei Zedekiah dage ranggai, “Peu aipau pei de de tsai dilu, kedanemene ainzwa eh pa namdi aika kebam hereu keteime badung tei mnei bam kecune, nah mina leune ba. Pa sam aidungde rangbam, kedanemene mipei aide mina aidungde de peu kwaklu kerane heta tei ma, dede kekap.”5Cine hegwangpei Zedekiah ranggai, “Pielo, pa au n kengking kangga bam kedanemene hegwang keda migede ncu renia kera gah kecune.”6Pecai penui Jeremiah de tuilu nah pecu Malkijah gu tekwa gage heling gaidi, hegwangpei napei. Duibung cide kekwabe kigu ga bam. Jeremiah de heria gade peu nghung. Tekwa cide ga dui gah, dede cide niaksai ge, nah pa tangdei kangga nlwetdi.7Ebed-Melek Cushiteme ge hegwangpei ki ga eunuchme ge. Penui Jeremiah de tekwa gage kai kedi pa siulu. Hegwangpei Benjamin Kirie ga ntumbam.8Cine Ebed-Melek hegwangpei ki gade tetpet nah hegwangpei de resiu. Pa ranggai,9“A mpaubo hegwangpei, Jeremiah caihakecibe dage penui tei kegai gade penui kemau tei dida. Penui pecu tekwa gage heling gai di peu pecu mzeu eh tsai di kerane, kedanemene namdi be ga taktyeipok gah kedine.”10Pecai hegwangpei Cushiteme Ebed-Melek de aja ge peu. Pa ranggai, “Aikade mipei hang camrei ge reu aja teulu nah Jeremiah tsaidi kemakne pecu duibung gade keu mpetdi lu.”11Cine Ebed-Melek cipaume reu kengking teulu nah hegwangpei ki ga mie di, heki kangga paiheni ziemne kibung ge ga. Cikade pa rosopaidung nah paiheni sia kedibedung keulu nah cidungde heria ge le tekwa lungga Jeremiah dage kaigai beu.12Cushiteme pei Ebed-Melek Jeremiah dage ranggai, “Rosopaidung nah sia kedi paihenidung de n hejak kangga kaigai lu nah heria reu gage kailu.” Cine Jeremiah cinzwa lu.13Pecai penui Jeremiah de heria le teu ncuh. Aiciu eh penui pecu tekwa gade teu nghanglu. Cine Jeremiah kekwabe kigu ga bam di.14Pecai Hegwangpei Zedekiah sam langgai nah caihakecibe Jeremiah de pe da ngngwa gwang, RAMPAUBE kerecaki kimui pekecumbe ga. Hegwangpei, Jeremiah dage ranggai, “Ih n dage mage keteu gai neu lei. A sam keli tadi helo.”15Jeremiah Zedekiah dage ranggai, “Magade Ih n sam keligai cai, nang acu teitset bi di lakni? Dede magade Ih ncu maranglia cai, nang a sam kingnei lak.”16Dede hegwangpei Zedekiah, Jeremiah dage ngkim eh pe sam petgai nah ranggai, “RAMPAUBE lungh kebamtane, anuide teigai kebeube, Ih ncu teitset dilak mede ncu teitset dizie lie eh peei kelame ba gage kai dilak.”17Cine Jeremiah Zedekiah dage ranggai, “RAMPAUBE, tinggim reugwame reu Tinggwang, Israel Tinggwang, aide rangla: Magade nang Babylon gwangpei gu kedime da mie cai iciu cai nang ringlu zie, nah namdi aide de ru dilak. Nang nah n kelak ringlu zie.18Dede magade nang Babylon gwangpei kedime da mie mecai, namdi aide Babylonme ba gage kai dizie. Penui cide ru dizie, nah nang penui ba gade pak gailak.”19Hegwangpei Zedekiah Jeremiah dage ranggai, “Dede Ih Judahme Chaldeame da pakgai kedime de hing lie, kedanemene acu penui ba gage kaidi lubui lu, penuide peu acu teikeherei süt kerane.”20Jeremiah ranggai, “Penui ncu penui ba gage kai dilak. Ih ncu RAMPAUBE sam rang kebeu de mzailu, iciu eh mapelane de n ziemne yilu kerane, nah iciu eh nang ringlu kerane.21Dede magade nang mpet kera mlai dicai, aide RAMPAUBE acu keulia gaida.22Pielo! Mipui pelane Judah gwangpei, n kiga püt kedi, Babylon gwangpei kangga kedime da ngngwa mpetdi zie. Aipau puidung de n dage rang zie, ‘N zangmedung ne ncu cwa dida; penui ncu tei ngkap dida. N pi nyiasai ga sum pwa dida, nah n zangmedung pak dizie.’23N naudung de nah henamedung de Babylonme ba gage kaibeu dizie, nah nang penui ba gade pak gailak dizie. Babylon gwangpei ne ncu tui luzie, nah namdi aide ru dizie.”24Pecai Zedekiah Jeremiah dage ranggai, “Sam aidungde mi dage ranglia so, nang tsai melu kerane.25Magade kedimedung Ih ncu resiu delie kecu siu lucai, nah magade penui gwang eh n dage, ‘Hegwangpei dage nang daipai rang no nah anui dage cide hebai so, mecai anui ncu teitsetti zie,’ de eh keteu cai,26nang penui dage ainzwa ranglu, ‘Acu peu tsaidi kera Jonathan leuhme dage kaidi helo de eh Ih hegwangpei dage a nggia kie gai.’”27Pecai kedimedung Jeremiah da gwang nah pecu keteu gai, cine hegwangpei pe dage ranglia kegai de nzwa eh penui sam keligai. Cine penui pecu resiu tadi, kedanemene penui Jeremiah nah hegwangpei kempau kecude siu kemakne.28Cine Jerusalem de tui di kemaktane Jeremiah kekwabe kigu ga bamdi.
Bridge Connectivity Solutions Pvt. Ltd.