Jeremiah37
1Cu Jehoiakim napei Jehoiachin keleu gade Josiah napei Zedekiah ne hegwang teilu. Babylon hegwangpei Nebuchadnezzar Judah deu reuga Zedekiah de hegwang teibeu.2Dede Zedekiah, pekang kedime, nah minadung Jeremiah dade RAMPAUBE samdung rang kegaidung de mzai luma.3Cine hegwangpei Zedekiah, Shelemiah napei Jehukal, nah cingkube Maaseiah napei Zephaniah caihakecibe Jeremiah dage sam ge langgai. Penui ranggai, “Anui mding tei delwe RAMPAUBE anui Tinggwang dage kekie teilo.”4Jeremiah mina kakga kekam gah eh nlüt mpet bam, kedanemene pecu hebaang gage kaidi mereu kecune.5Pharaoh reugwame Egypt gade mpet, nah Babylonia reugwame Jerusalem de gwaketang kebam dau penui ha siulu ge penui Jerusalem gade tetdi.6Pecai RAMPAUBE sam caihakecibe Jeremiah dage gwang eh ranggai,7“RAMPAUBE, Israel Tinggwang, aide rangla: Aide nang Judah hegwangpei dage ranggai beulu, kedanemene pa ncu a dade ma keteu kerane langgai delu, ‘Pielo, Pharaoh reugwame, ncu ngha kera kegwangme, Egypt ga caili mie daidi lau da, pekatei pe deu ga.8Babylonme cailigwang zie. Penui namdi aide de renia zie, aide de tuilu zie, nah ru dizie.’9RAMPAUBE aide rangla: Aide rang eh nnuikatei nnuide cwa so, ‘Babylonme anuide gidi eh tetdi lauda,’ kedanemene penui au tet laklu.10Nnuide renia kela Babylonme pelane de nnui ngam lu eh penui paikidung ga rezam teu kelame katei di liede, penui cuh zie nah namdi aide de ru dizie.”11Cine Pharaoh reugwame gwang kelane Chaldeame reugwame tetdi kecu dau,12Benjamin deu ga mie kerane Jeremiah Jerusalem gade mpetdi. Pa pe minadung kakga hangdeu ge gumlu neu eh la.13Pa Benjamin Rieki ga kebam dau, kekwame kedibe cika bam. Pe zi Irijah, Shelemiah napei Hananiah capei. Pa caihakecibe Jeremiah de tuilu eh ranggai, “Nang au Chaldeame da pakgai la dida.”14Dede Jeremiah ranggai, “Cide au kesang ma. Ih Chaldeame dage pakgai ma.” Dede Irijah pe sam kingnei ma. Pa Jeremiah de ngngwa lu nah kedime dage ngngwa gwang.15Kedime Jeremiah de penui rata di. Penui pecu dap nah hebaangki gage kaidi, cide makeraube Jonathan ki, kedanemene penui cide hebaangki ge tei kedine.16Cine Jeremiah de hangdeukang hebaangki gage baang di, cika pa ketie ge bam di.17Pecai Hegwangpei Zedekiah migede langpwa pecu hegwangki gage ngngwa gwanglu. Pe hegwangki gade, hegwangpei ngkim eh keteu, “RAMPAUBE dade sam ge de lami?” Jeremiah keligai, “Sam ge la: Babylon hegwangpei ba gage ncu kai dizie.”18Pecai Jeremiah Hegwangpei Zedekiah dage ranggai, “Acu pwa hebaangki gage kai kedi Ih n dage, n kedime dage, mede mina aidungde dage daipai kemau Ih teipwa bamno?19Ngu caihakecimedung daiga bamno, ncu caiha ranglia kecume nah Babylon hegwangpei ncu mede hangdeu aide de renia cuh lak lie de eh rang kecume?20Dede cu kingneilo, hegwangpei a mpaubo! A nggia kie kegaide peu ndwa de luulu lo. Acu makeraube Jonathan ki gage ngngwa caili gai helo, meliecai Ih cika de tsai dizie.”21Cine Hegwangpei Zedekiah aja ge kaigai. Pe kilame Jeremiah de tuipwa kekwamebung gage tuigai di. Tingnai ramsangne tangku ru kecume ki gade tangku ge pecu peu mui, namdi be ga tangku cang di kemaktane. Cine Jeremiah kekwame bung ga bamdi.
Bridge Connectivity Solutions Pvt. Ltd.