James2
1A sinamedung, anui Rampaube Jisu Khrista kendu de nlum kelame heneuherüt tei kerabe ma. 2Kedanemene mige kecak bakap nah pai keyi teulwe nnui ngqwa ga lütcai, nah kegahme gede pai kesia teulwe lütcai,3nah nnui pai keyi teu kelabe de piegai delwe, “Nang bam keyi aika bamlu,” de rangcai, nah makegahbe dage nnui, “Nang cika saplu” mede “A pi bam ga bamlu,” de rangcai,4iciu cai nnuikatei nnui kakde teuntsam kecu tei nah lungning kesia teu eh tutiakme teidi de meni?5Kiengnei lu, kehung sinamedung, Tinggwang kideu ga kegahme de peu kenlum ga heilu kerane nah pecu hung kelame de pa sampet kebeu hegwangram de gumlu kerane kedetlu meni?6Dede nnui kegahme de teu hengam tei dida! Keheime ne nnuide teikeherei nah penui ne nnuide tutiakbam ga teugwang meni?7Penui nnuide qukelu hezi keyi de rangmsia ladi de meni?8Ciciu liede, kesanglaisiu ga raupwa kela nzwa nnui hezai kedi de, “Nang nkatei ncu keku nzwa n kidabe de kuzie,” de kecu de teicang lucai, nnui teihemi da.9Dede nnui heneu herüt teicai, nnui kemau tei dida, nah hezaibe ne hezaigikah kecume lie mmaula.10Kedanemene keheibe de hezai pelane mzailu dede ket gade kaudi liecai, hezai pelane gade mau dida.11Kedanemene, “Mmha so,” de rangkelabe, “Mide daptset so,” de eh de rang delu. Cine, nnui mmha meliede, nnui mide daptset cai, nnui hezaigikah kecume ge dida. 12Cine teumpet kebeu zaide ne tiak lai eh kebammedung nzwa eh rang nah tei lulo.13Kedanemene mide ngaungia la kemakpe de ngaugia si mene pe tutiak zie. Ngaugia au tutiak reu ngkieng lula.14A sinamedung, mi kangge pe kenlum bamlie rangla liede pe bata gah cai cide pe kemmi daipai no? Kenlum cide pecu kelilu buini?15Magade mi sinapei ge mede mi tipui ge paiheni kesia teu nah tingnai ramsang ne taktyei bam ma,16nah nnui mige penai dage, “Nnai lung nciep eh gwanglu, lumlu nah tyei nggeilu,” de eh rang de penai pumteihbe ziemne teu mai kesiadung peu mecai, cide pekeyi daipai no?17Cine kenlum rünne au, cide bata si mecai, ketsai lie.18Dede mikangge, “Nang n kenlum bam, nah Ih a bata bam,” de eh rang zie. Bata si mene n kenlum pwa acu lia lo, iciude Ih a bata gade a kenlum pwa ncu liazie.19Nang Tinggwang au ket rünne lie kecu nlumla. Nang tei dau da. Herakesiabedung de nlumla, nah penui mbeu bamla.20Dede, nang kemiebo, kenlum au bata simai kemta lie kecu nang cilu neu lani? 21Anui pei Abraham pe bata le pecu tei masanglu meni, pe napei Isaac de recabam reu gage reca kegai dau?22Nang kenlum pe bata sila kecu, nah bata gade kenlum teicang beu kela ci lulo.23Kesanglaisiu rang kelade teicanglu, “Nah Abraham Tinggwang de nlumlu, nah cide ne pecu masang lie luulu,” nah pecu Tinggwang zangnabe lie qulu.24Cine nnui kenlum rünne gade mene bata le mide tei masanglu kela ci lulo.25Nah cinzwa eh helipui Rahab de pe bata le pecu tei masanglu meni, pa samgwamedung de hegialwe penuide lampui kedale de langgi kedidau?26Kedanemene mi pumbe au rabe simai ketsai kecu nzwa, cinzwa eh kenlum de bata simai ketsai lie.
Bridge Connectivity Solutions Pvt. Ltd.