James1
1James, Tinggwang nah Rampaube Jisu Khrista kilabe ne raupwa zangra la kedi heleuh kereiekena dage kekai: Kelum gaila!2A sinamedung, kenaang ketsamtsam nnui da kegwang dau, cidungde pelane suiyi ge lie cet lulo,3kedanemene nnui kenlum kedak pie kecu gade helungketie petlu kela nnui cibam lu.4Dede peu helungketie de de peta teicanglu, iciu de nnui magede cang kemak tei mene, yicang siak nah canglu kerane.5Cu nnui keheibe de maci gahcai, peu pecu Tinggwang, mbang süt eh nah kesiu mene pelane de pwapeu kelabe dade kie lulo, iciude pecu cide pwapeu zie.6Dede peu pecu magede lunghau di mene, kenlum gade kielu, kedanemene lunghau kelabe au jaaidi ga dui nswak, tingkai ne lule ailam gui gwangkelade nzwa da.7Cine peu mina cipaude de Rampaube dade magede ngaulu kera cet so,8mina lungna kecume, pa ketei leune gade ntiplu lama.9Dede siname ma gah kelame de peu pecu teucuh kebeu ziemne pesui lu,10nah ma heikelame de peu pecu tei henah kegai ziemne pesui lu, kedanemene pa renaam mapa ge nzwa huidi zielu.11Kedanemene tingnaimiak lum süt eh cuh tsehei puki dila, nah pe pa hui dila, nah hezu keyi cide gah dila. Cinzwa eh, makeheibe de pa peta tei keladau hui nggah dizie. 12Mdakkepie liakelube samlam pungtu. Kedanemene pa cikenzwa kedei kecu kah gwang lucai, pa Tinggwang pecu ku kelame dage sampet kai kebeu kering peurwa de ngau luzie.13Peu migede de mdakkepie pe da kegwang dau, “Acu Tinggwang ne kedakpie zeu,” de eh rang so, kedanemene Tinggwang de makesiabe ne kedakpie gailak, nah pa migede de kedak lama lu.14Dede mige ge kecu pekatei pe pumteih lungning ne pecu teuswa mdei nah keulu eh mdakkepie gage kai dila.15Pecai pumteih lungning tetlak luge, kemau mna beula, nah kemau, lung cuh luge, ketsai mna beula.16Kehung a sinamedung, nnuide cwa diso.17Mapeu keyi leune nah mtamapeu yicangsiak kecu leune nreule de gwang, cide kebaabe Peibe, lidai dila kemakpe mede mimie nzwa nreu dila kemakbe dade gwangla.18Pe lungning gade pa anuide kesang sam gade tei mlung gaibeu, iciu eh pa damkegai ma pelane kakde anuide peu raitume ge teilu kerane.19Kehung a sinamedung, aide cilu: Peu mileune de kingnei mzetlu, marang zette so, nah rata zette so.20Kedanemene mina rata au Tinggwang masangbe pwa peula melu.21Ciziemne, kemau kehera nah hezai kesia pelane keugi dilu, delwe lingkegai samde hena eh luulu, cidene nnui rabe de kelilu bui.22Dede nnuikatei nnuide cwa teu eh kekingneime rünne teidi mene sambe tei kemzaime tei lulo.23Kedanemene keheibe de sam kekingneibe dede teikemzaibe ge mecai, pa au mige miakpiebung gade pekatei pe zu pie kegai nzwa da.24Kedanemene pa pekatei pemie piegai eh tetti la nah zette perehi dainzwa bi kecu nsungta dila.25Dede mide lung mpetlu kela hezai yicangsiak kecude pie sünne gai eh cide tei jüja bam kelabe, kingnei gai eh nsungta dila kemakpe, dede cide tei mzai kelabe, aipaude de pe bata peureu gage samlam beuzie.26Mige pe mleu ketip mene, dede pe lung cwateu eh pekatei pecule pwa renet lam mcok lie cetla cai, pe renet au kemta.27Tinggwang nah Peibe dwa de renet mci nah herakemakbe au aide: nggianadung nah hemipuidung keherei kebam ga ngha kera, nah mikatei mide kideube dade tei heradi mene kaipwa bamlu kera deda.
Bridge Connectivity Solutions Pvt. Ltd.