Isaiah49
1A kwa kingnei lu, nnui jaaidikung deudung! Cu a dage nnui lung kailu, nnui kemdei ga lungh kela minadung.RAMPAUBE acu nna kelu gade a zi teu qu luda, a pui acu kideu aika nna gai kebeu gade. 2Pa a mui kingtie kenzaube nzwa teibeu; pa pe ba mie kangga ge acu kebai pwabam;pa acu lakpitsi teimdui kelu ge nzwa teibeu; pe lakpitsibung gage acu kebai pwabam.3Pa a da rangdi, “Nang au a kilabe, Israel, Ih a kendu keulia kelabe.”4Dede Ih keligai, “Ih kemta gage mri kegai de Ih cetgai liede, Ih magede kemak gage a ziepum ngkap dida,ciuliede a mzeu au RAMPAUBE da bam, nah a ziehi au Tinggwang da bam.”5Cu RAMPAUBE ranggai dida, pa pe kila tei kerane nna kelu gade acu teigai,Jacob de peda ngngwa cailigwang dailu kerane, ciu eh Israel pe da gwang ngkwa lu kera ziemne,kedanemene RAMPAUBE miakngau gade Ih au hetwapung, nah a Tinggwang au a kengkingbe dida,6RAMPAUBE ada ge rang, “N ziemne a kila tei eh Jacob leuhme de teu ncuh dai kera au keceu nage lie,nah bangkelu Israelme de teingkei beu kera. Gentileme dade Ih ncu kebaa ge teibeu zie,kideube cang kecu dau nang a kelikelube teilu kerane.” 7RAMPAUBE ainzwa ranggai, Israel de Kelikelube, penui gu Kemci Tinggwang,pe teilungh de ngkau kelame, heleuhdung ne ngkau, nah kedime baang keteime,“Hegwangmedung ncu ngau nah cuh sap zie, nah hegwangnadung ncu ngau nah keumie zie,RAMPAUBE samsang kecu ziemne, Israel gu Kemcibe, ncu kedet kelube liede.”8RAMPAUBE ainzwa ranggai,“Ih ncu a sui eh keulia kera ting dau Ih ncu keli beuzie, nah kelikelu tingba kegwang dau Ih ncu ngha beuzie;Ih ncu gum beuzie, nah minadung ziemne samkak ge nzwa ncu peu zie,hangdeu de teucuh dailu kerane, gi kedi mapwa de peu dailu kerane. 9Nang hebaangme dungde rang zie, ‘Mpet lu;’ kemui baangki ga kebamme de, ‘Nnuikatei nnuide keulia gai.’Penui lampuidung gade mapeei tyei zie, nah kwak kebam lamlwa de penui taktyeibam zie. 10Israel langgi kedi gade caili kegwang dau penui mzeu mede hereu di lak; meliede tingnaimiak mede tingcie ne penui de teimnei dilak,kedanemene penui da ngaugia kebambe ne penui de teuswa zie; pa penui de duipwakdung ga ngngwa gai zie.11Ciu eh Ih a lamlwadung pelane lampui ge tei dizie, nah a puidiki kehu ga bamzie.”12Pielo, aidungde kemdei gade gwang zie, kesa tingpeule de nah kenlwetle de; nah kedadung Sinim deu gade gwang zie.13Lei teigai, tinggimdung, nah nnui suiyi lu, kideube; lei tei sahbak lu, nnui lamlwadung!Kedanemene RAMPAUBE pe minadung de tei relui beula, nah pe mina rei kelame de ngau ngngia zie. 14Dede Zion rang eh, “RAMPAUBE acu gi dida, nah Rampaube acu nsungta dida.”15“Mipui ge pe na de nsung tadi lubui ni, pe tung gade tungbam kecudau, cine pa ne nna kelu pe na da ngaugia bam meni?Yeo, penui nsung tadi lubui, dede Ih au ncu nsung tadi lak.16Pielo, Ih a badeu gage n zi rau pwabam; n kiriedung de a dwaga bammui la.17N namedung caili kelwa gwangla dida, ncu teingkap kedimedung be mdei tetti zeu.18Pie tegwa gailo, penui pelane gwang ngkwa lwe n da gwangla.Ih ring kebamtane, RAMPAUBE aide ndugai, nang hetei hetah nzwa cidungde keu eh rwa luzie, nah nang lakciubepui nzwa cidungde kailu zie.19Nang piage ngkapdi nah gidi eh bam liede, hangdeu kaudi eh kebam de,cu nang au ceu ham dizie da lunghbam kerame ziemne, nah ncu teingkau kedime au mdei süt ladi zieda.20N sui kesia tingdau nna kelu henamedung nang kesiu gade rang zie,‘Aipau ni de au anui ziemne nrum ham dilei, anui ziemne kibung teigai lo, ciu eh anui aika lungh kerane.’21Pecai nang nkatei ncu keteu zie, ‘Cau ne hena aidungde de acu nna beu no?Ih au a suisia la nah hena lung ma, gwadi nah ngngwa lungh tadi. Cau ne hena aidungde de nkwet beu no?Pielo, mileune acu gidi eh Ih akatei bam; dai gade aidungde gwang no?’”22RAMPAUBE Tinggwang ainzwa ranggai,“Pielo, Ih heleuhdung dage a ba hwacuh gai zie; Ih minadung dage pailim keucuh a rehi teilia zie.Penui n napei dungde penui bapum gade pwa gwang zie nah n napuidung de penui hekeutu gade.23Hegwangmedung ncu kengha peidung zie, nah hegwangpuidung n ma kepieme tei zie;penui nda keumie penui zudung hangdeu tung zie nah n pi ga rebui de mniak zie;nah Ih RAMPAUBE lie kecu nnui cilu zie; acu kwa eh kebamme de peu hengam teidi lak.” 24Reugwame gade tui kelu mabamdung de süt lubui ni, mede lunghop gade hebaangme de kelilu bui ni?25Dede RAMPAUBE ainzwa ranggai,Yeo, reugwame dade hebaangme de keumpet dilu bui, nah tui kelu mabamdung de keli lubui;kedanemene nang renia kelame de Ih renia nah n namedung de keli beuzie.26Ih ncu teikeherei kelame de penuikatei penui teih tyei zie; nah penuikatei penui jai sak mie zie, cide hezau nzwa eh.Ciu eh mina leune Ih, RAMPAUBE, nnui gu Kelikelube nah nnuide Kelikebeube, Jacob Ngkiengtube Tinggwang lie kecu ci luzie.”
Bridge Connectivity Solutions Pvt. Ltd.