Isaiah26
1Cipaunai Judah deuga aipau lei de teigai zie:Anuida namdi kengkieng ge bam; Tinggwang ne tangdeu dungde kelikelu teilu.2Kiriedung ngkeilu, iciu eh kenlum kaineu kela masang kela heleuhbe lütlu kerane.3RAMPAUBO, helung n da kaipwa kebambe de, nang pecu lungciep yicangsiak kecu kai luzie, kedanemene pa ncu nlum kelane.4Kelungta RAMPAUBE de nlumlu; kedanemene RAMPAUBE au kelungta tsurabe da.5Kedanemene pa ngang eh lungh kelame de tei henah dizie; riekelu namdi depa teungkau dizie, pa hangdeu gage teungkau dizie; pa cide rebui nsam gage tei dizie.6Cide kegahme pi ne nah teumai kesiame pikiet ne daucim dizie.7Masang kelame lampui au mzui, Masang kela RAMPAUBO; nang masang kelame lampui tei mzuila.8Yeo, n tutiak lampui ga, RAMPAUBO, anui ncu kwabam;n zi nah n kendu de au anui hengin da.9Ih tingmuidau ncu reguila; yeo, a lungga a rabe ncu lungsang gade peeila.Kedanemene n tutiakdung kideu ga kegwangdau, kideu ga kelunghme n masang ci lula.10Tinggwang kesiame dage ngaugia keulia la, dede pa masangbe ci gailak. Pa samsang kecu deuga pa peta sia sütlanah RAMPAUBE kendu kedide ngau lama.11RAMPAUBO, n ba au hwacuh bam, dede penui ngau lama.Dede n ngauraume n minadung ziemne leu dila kemak zaide ngau zie nah ngngam dizie, kedanemene n ngauraume miheu dene penuide mnua luzie. 12RAMPAUBO, anui ziemne nang kezuyibe teugwang beuzie; kedanemene, nang au anui ziemne heta leune teicang beu delu.13RAMPAUBE anui Tinggwang, nang kemak keda mpaume ne anui reu kedi teigwang; dede anui n zi rünne twala.14Penui au tsai dida, penui au ring gailak; penui au tsai kedime, penui au cuh dailak.Kesang, nang tutiak teigwang nah penuide ngkapdi, nah penuide nsungkela leune teingah dida.15Nang heleuhbe de teingkiee gai, RAMPAUBO, nang heleube de teingkiee gai; ncu herüt peula;nang hangdeube rai leune teimdi gai beuda.16RAMPAUBO, keherei kecudau penui ncu piegai; nang penuide ledeu kegaidau penui kekie teila.17Telak kela puige mna kera tingba gwang nna dige,pa keherei kecudau nah kemna tet teei tei eh hap dila,cinzwa eh Rampaubo, anuide n dwaga bam.18Anui tetlakla dida, anui kehereila dida, dede anui tingkai de nna gai kecuge gwale sima. Anui kideu gage kelikelu teugwang gaima,nah kideu ga kelunghme kau dima.19N mina tsai kedime ring luzie; penui ketsaipaaudung ringcuh luzie. Rebui ga lungh kebammedung, mraklu nah suiyi lei teilu;kedanemene n hezin au kebaa zin, nah kideube ketsaime de teucuh luzie.20Miecu, a minadung, nnui kibungdung ga lütlu eh nnui caiga kikamdung ngkui di;tingkakge mbailu, RAMPAUBE rata kahdi kemaktane. 21Kedanemene, pielo, RAMPAUBE pe bam gade tetpet eh kideu ga kelunghme de penui kesia ziemne saja peulai eh gwangla dida;kideube hejai lwa kegaide peei mpet gaizie, nah daptset kedime de kebai nzeu sita dizie.
Bridge Connectivity Solutions Pvt. Ltd.