Hosea11
1RAMPAUBE ranggai, “Israel hena dau Ih pecu hung gwang, nah Ih a napei de Egypt gade qu mpet lu.2Penuide qu reuge, penui a dade ndei tet di. Penui Baaldung dage ratak teigai nah mamiedung dage kehengui rugai.3Dede Ih ne Ephraim de tetlu kera ledeu beu. Ih ne penui ba teucuh lu dede Ih penui mapie kela penui ci lama.4Ih mina ria teu eh penui puisau tei, Kehung riadung teu eh. Ih au penui dade penui geijara ga penui ngwanggai tei relui beu kelabe nzwa, nah Ih kwaktungmie penui pok tei.5Penui Egypt deu ga cailigwang lakni? Assyria penui reu hegwang tei lakni penui ada cailigwang rau kedine?6Kiengtie penui namdidung reuga cakmie zie nah penui herieki tsiadung de teimsia dizie; delwe penuide ngkap dizie penui katei penui ciem ziemne.7A minadung a dade nreu di kera mninglu. Penui Hutube de qugai liede, migede penuide ngha lak.8Ih dainzwa ncu püt lulai, Ephraim? Ih dainzwa ncu mide pwapeu di lulai, Israel? Ih dainzwa ncu Admah nam nzwa teilu lai? Ih dainzwa ncu Zeboyim de nzwa tei lulai? A lung ga a mlung pelane de kenwakcu gaida.9Ih a rata kecude teu matei lak; Ih Ephraim de ngkap dailak da. Ih au Tinggwang kecune nah mina melu. Ih nnui kakga Kemcibe, nah Ih a lunghop gade gwang lak.10Penui RAMPAUBE caisui zie; nah hingho ge nzwa mra gaizie. Pa mra gaide, pe namedung mbeu eh naimiak kenlütle de gwang zie.11Penui mbeu eh nruine ge nzwa Egypt gade gwang zie, tamhau ge nzwa eh Assyria deu gade gwang zie. Ih penuide peu penui kidung ga lung zie, aide RAMPAUBE ndu kegai deda.12Ephraim ne kenretle, nah Israel kelak de kecwa teu acu twagwalu. Dede Judah au Tinggwang samzai teila, nah pa au Ih, Kemcibe dade masangla.”
Bridge Connectivity Solutions Pvt. Ltd.