Exodus7
1RAMPAUBE Moses dage rangdi, “Pielo, Pharaoh dwade Ih ncu tinggwang ge nzwa teibeu dida. Aaron n sinabe ngu caihakecibe zieda.2Ih ncu rang lulo aja kai kebeu pelane nang rang zie. Aaron n sinabe Pharaoh de mpau zie, iciude pa Israelme de peu pe deu gade tet luzie.3Dede Ih Pharaoh mlung tei hung dizie, nah Ih a kengking gade marehidung kekieege, miswakegah batadung kekieege Egyptme deu gage teilia zie.4Dede Pharaoh n sam kingnei lak, cine Ih a ba Egypt gage kai zie, nah saja batadung kedi teigai eh Ih a reugwa maame, a minadung, Israel leuhmedung de Egyptme deu gade ngngwa mpet dizie.5Ih a ba hwa pwa Egyptme dage kaigai nah Israelme de penui kakgade ngngwa mpet kecudau Egyptme Ih RAMPAUBE lie kecu ci luzie.”6Moses penai Aaron cinzwa eh teilu; RAMPAUBE penaide aja kai kebeube nzwa penai teilu.7Moses mmi riakheset di, nah Aaron mmi riakhesetekecum di penai Pharaoh de kempau kecudau.8RAMPAUBE Moses penai Aaron dage rangdi,9“Pharaoh nnai dage, ‘Miswakegah bata tei gailo’ de kerang dau, nang Aaron dage rang beulu, ‘Ngu hetui keulwe Pharaoh dwa gage cide kelien mie gailo, iciu eh cide henei mmi lu kerane.’”10Pecai Moses penai Aaron Pharaoh da gwang, nah RAMPAUBE aja kai kebeu nzwa penai teilu. Aaron pe tui pwa Pharaoh nah pe kilame dwa gage kelien mie gai, nah cide henei mmi di.11Ge Pharaoh de pe gu makecime nah rekamedung de qugai. Ge penui reka le cide kesiakke penui teilu.12Penui hangge ge kecu penui gu hetuidung kelien mie gai, nah hetuidung heneidung mmi di. Dede Aaron hetui ne penui gu heneidung de mnwa pwadi.13Pharaoh mlung hung di, nah RAMPAUBE mrai rang kebeu nzwa, pa kingnei tadi.14RAMPAUBE Moses dage rangdi, “Pharaoh mlung hung dida, nah pa minadung de peu tet mei dida.15Pharaoh da mie culo tingcang pa dui lebie tetpet keladau. Nile reuki kungga pecu redau kerane saplu, nah n ba ga henei mmi kelu hetui cide keu lalu.16Pe dage rang beulu, ‘RAMPAUBE, Hebrewme Tinggwang, n dage aide rangbeu lo acu langgai beula, “Peu a minadung de tet lulo, iciude penui hetaideu gade acu reca lu kerane. Cu kecang nang kingnei beuma.”17RAMPAUBE ainzwa rang: “Ma aide gade Ih RAMPAUBE lie kecu nang ci luzie. Ih a ba ga kebam hetui aide le Nile dui Reuki dapgai zie da, iciu eh kereuki cide hejai mmi dizie.18Kereuki ga heka kebambe tsai kapdi zie, nah kereuki cide perim nnam sia dizie. Egyptme kereuki gade dui sak daulak dizie.”’”19Pecai RAMPAUBE Moses dage rangdi, “Aaron dage rang beulu, ‘Ngu hetui keulu nah Egypt duidung reu ga nah penui kereukidung reu, reuceudung, rejaaidung, nah penui tekwa leune gage n ba ketwa petlo, iciude penui dui hejai mmi ciak di kerane. Aide teilu iciude Egyptme deu leune ga hejai le puih di kerane, tsingbung nah tangtsubung dung kecang de.’” 20Moses nah Aaron RAMPAUBE aja kai kebeu nzwa teilu. Aaron hetui keucuh delwe Pharaoh nah pe kedimedung dwa gade kereuki dui gage dapgai. Kereuki ga dui pelane hejai mmi di.21Kereuki ga hekadung tsaidi, nah kereuki perim nnam cuhdi. Egyptme kereuki gade dui sakgai lakti, nah Egyptme deu pelane ga hejai ladi.22Dede Egypt ga kerekame penui reka gade cide nzwa tei ludi. Cine Pharaoh mlung hung di, nah RAMPAUBE cinzwa kera rang kebeu nzwa, pa Moses penai Aaron sam kingnei meidi.23Pecai Pharaoh nreu caili eh pe ki ga nlütdi. Pa aide gage pelung kai tadi.24Egyptme pelane kereuki kungga dui sak kerane kui, dede penui kereuki dui cide sak dau lakti.25RAMPAUBE kereuki de dap kegai cai lang henane gwangdi.
Bridge Connectivity Solutions Pvt. Ltd.