Exodus5
1Ma aidungde tei kedi cai, Moses penai Aaron Pharaoh da mie nah rangdi, “RAMPAUBE, Israelme Tinggwang ainzwa eh rangzeu: ‘Peu a minadung de tet lulo, iciu eh penui hetaideu gade a ziemne hengyi lu kerane.’”2Pharaoh rangdi, “RAMPAUBE cauno? Dai ziemne Ih pe kwa kingnei eh Israelme de peu tet kera no? Ih RAMPAUBE de cima; cipaureude, Ih Israelme de tet kera peulak.”3Penai rangdi, “Hebrewme Tinggwang anai de peu pecu redau gaida. Hetaideu gage lang cumne beuzie tei eh peu anuide mie RAMPAUBE anui Tinggwang dage ratak teilu kerane peu tet lo, iciu eh pa anuide mateei nah kingtie le ketang di kelakne.”4Dede Egypt ga hegwangpei penai dage rangdi, “Moses nah Aaron, nnai daitei minadung de penui tahdung gade keuteu zeu no? Nnai tah ga cailigwang culo.”5Egypt gwangpei rangsi di, “Anui deu ga cu au mina kekieege bam dida, nah nnai ne penui tah tei mtakti lai zeu da.”6Cipau benai de, Pharaoh Egyptme kila mpaume nah Israelme muiteume dage aja kaigai. Pa rangdi,7“Ndaa nzwa nnui minadung de tsurukang tei kerane reigau pwapeu si lakta. Peu penuide mie eh reigau penuikatei pwa hekwalu.8Ciuliede, nnui penui dade tsurukang ndaa daikiee ge tei labi cikieege kie lumai sia. Ceuna gede camsi kera mnei so, kedanemene, penui nghet kecune. Cide ziemne penui a dade keteu eh keteu dai bam, ‘Anuide peu tet lo nah anui Tinggwang dage ratak teigai lu kerane.’9Mina aidungde hetapüt tei nkiee sibeu lulo iciu eh penuide peu cika nang bam di eh kecwa samdung gage penui lung kai si tadi kerane.”10Cine kila mpaume nah muiteume tetpet eh minadung dage ranglia beu. Penui rangdi, “Pharaoh ainzwa eh rangzeu: ‘Ih nnui dage reigau pwapeu si lakta.11Nnuikatei mie eh reigau nnui dai gade ngaulu ziebi cikade mie pwalu maisia, dede nnui hetapüt au camsi swalak.’”12Cine Israel minadung Egyptme deu pelane ga reigau hekwa kerane zangra ladi.13Egyptme kila mpaume penuide kecung jüja eh ranggai, “Nnuide reigau pwapeu keladau nzwa, nnui tah tei canglu.”14Pharaoh gu kila mpaume heta keteime de pie rengei kera penui ne nlum gai kebeu Israelme muiteume de dap. Kila mpaume penui dade keteu jüja eh, “Nnui tsurukang tei mpet kera nnui nsam de daitei luge nziene de nah henai de ndaa nnui teilu kela nzwa teilu meno?”15Cine Israel muiteume gwang Pharaoh dage mra gai, Penui rangdi, “Daitei n kilamedung dage nang ainzwa teigai bam no?16N kilamedung dage reigau pwapeu si meda, dede penui anui dage cude rangzeu reu, ‘Tsurukang teilu!’ Cu au anui n kilamedung dede dap zeu da, dede cide nkatei n minadung mau da.”17Dede Pharaoh rangdi, “Nnui nghet zeu! Nnui nghet zeu! Nnui rangla, ‘RAMPAUBE dage ratak tei kerane anuide peu tetlo.’18Cine cu au nnui tah ga cailigwang cu. Reigau au nnuide peusi lakta, dede tsurukang tei kela kieege nnui teilu bi maisia.”19Israelme muiteume penui keherei la di kecu ngaulu penui dage ainzwa rang kebeu dau, “Nnui tingba ramsangne teilu kela tsurukang kette tei ncam silak zing.”20Penui Pharaoh dade tet mpet keladau, Moses penai Aaron hegwangki kisie ga sapbam eh penai de redau lu.21Penui Moses penai Aaron dage rangdi, “Peu RAMPAUBE de nnai de piegai eh saja peu lo, kedanemene nnai Pharaoh nah pe kilamedung dwade peu anui de ngkau kera tei kebeune. Nnai penui ba gage anuide teitset kera kingtie kaibeu dida.”22Moses RAMPAUBE da cailigwang delwe rangdi, “Rampaubo, nang daitei mina aidungde de teikeherei gai no? Dai ziemne nang acu raitu gade langgai no?23Ih n zi teu delwe Pharaoh de resiu kera gwang keludau gade, pa mina aidungde de teikeherei bam dida, nah nang n minadung de de lungmpet beu swa ma.”
Bridge Connectivity Solutions Pvt. Ltd.