Daniel8
1Hegwangpei Belshazzar hegwang tei kelu mmi pekecum bekum, Ih Daniel, hemang ge ngau (hemang keraibe ngau kelu cai).2Ih pie kebam dau, Ih Elam deuceu ga rietegwa kelu Susa namga bam eh amang gade ngau. Ih Ulai Reuki tai ga bam eh amang gade Ih ngau.3Ih ngang piegai, ge a dwaga meurünseu pekii kena kebam hereuki mbie ga bam eh Ih ngau. Kii ket swa kedabe tieki, dede ketie de kedui de swade pemmi nneu nah kedui dene ketie de petie mmi kah di.4Meurünseu cide naimiak kenlütle, tingtünle, tingbangle ntau eh kebam Ih ngau; makau keda gede pedwa de ngkieng luma. Penui migene de pe ba gade mige de de kelilu ma. Pa tei keneu leu teilu, nah pa mdu petdi.5Ih aide cet eh kebam dau, naimiak kenlütle de hemeuseu ge gwang kela Ih ngau, cide pak nzet süt eh, hangdeu tung cu ci mene kideu peureu pelane kah gwangdi. Hemeu cide pe miak kena kakga pekii kedi ge bam.6Pa meurünseu pekii kena kebam da gwang, Ih meurünseu cide kereuki kung ga sap kebam Ih ngau, nah hemeuseu cide meurünseu lamge kengkieng kailwe pak gwang di.7Hemeuseu meurünseu da nna gwang kedi Ih ngau. Pa meurünseu de de pe rata süt eh la, iciu eh pa meurünseu de ntau gai eh pekii kena teicumdi. Meurünseu cide pedwa ga saplu kera pe kengkieng gahdi. Hemeuseu cide pecu ntau mie hangdeu gage kai eh pecu caiketet. Migede pe kengkieng gade meurünseu de kelilu kera kau gahdi.8Ge hemeuseu cide di süt di. Dede pa ngkieng kelu dau, pe kii kedi de cumdi, nah cipau bam gade pekii mdai pwakcuh di, cide tinggimdung ga tingkai mdai lambie ge saugai.9Penui kakga pekii ket gade pekii kedage pwakcuh dai, kerai dau cide keceuna ge, dede cide tingbangle, naimiak kepetle, nah hezu keyi deu le pwakcuh eh disüt di.10Cide disüt cupwa tinggim reugwame de regi kera mtei lu. Cipau reugwame kangge de nah hegidung kesabedung kelien mie kideu gage kaidi, nah cide ne cipaume de caiketet.11Cide pekatei pecu tei ndu pwa reugwame reu muibe ge teilu. Cide pe dade keru ratak teibam kelade keuteu di, nah pe gu kemci bam tei heradi.12Kengaurau eh kerenia kedine, reugwame de pwa hemeuseu kii dage peu dizie, nah keru ratak cide mtak dizie. Pe kii cide makesangbe kelien pwa hangdeu gage kai dizie, nah pa tei keladung teicang luzie.13Ge Ih kemcime ge marang nah kemcime kedage pe sam keli eh siu, “Keru ratak, kengkap teu kegwang kemau, Tinggim reugwame nah kemcibam pwa mi pidau ketei marengei aidungde daitie ge tei bam zie no?”14Pa a dage ranggai, “Ma cide tinghegi nah tingcang 2,300 kecu tingtie ge keu zie. Cipau caine kemci bam petau tei eh teu dai luzie.”15Ih, Daniel, hemang rengei cide ngau kegai dau, Ih cide pekie cilu kera tei. Ge mige mipei rehi kenzwa ge a dwaga saplu.16Ulai reuki kung kakga mige kequ kwa Ih siu. Pa rangdi, “Gabriel, mina aipaude de hemang rengei kie cilu kera rang beulo.”17Iciu ge pa Ih sap kebam ga gwang nna lu. Pa nna gwang kegai dau, Ih ngngidi nah keumie hangdeu ga bamdi. Pa a dage rangdi, “Cilulo, mina nabo, hemang rengei cide peting kekam dau ziemne delie.”18Pa acu mpau kebam dau, Ih zip zing bam eh hangdeu ga kaumiedi. Ge pa acu deu gai nah acu teucuh saplu.19Pa rangdi, “Pielo, pecai Tinggwang lunghop tingdau daitei diziebi kecu ncu pwalia zie, kedanemene hemang cide kekamle ting rietkelu ha ge kecune.20Meurünseu pekii kena pung delwe bam eh nang ngau kegai de, cide au Mediame penai Persiame hegwangpei da.21Hemeuseu be cai Greeceme hegwangpei da. Pemiak kena kakga pekii kedi de hegwangpei raitube da.22Pekii cum kedi de, nah pebam gade pekii mdai pwakcuh kelu de cai, pe leuh gade hegwangram mdai cuh zie, dede pe kengkieng kendu nzwa lak.23Nah cipau hegwangramdung peting kekamle, hezai gikah pwa penli hangcang kedi dau, hegwang pezu kuu nah mriak süt kecu ge cuh zie.24Pe kengkieng di nah ndu süt zie, dede cide pekatei pe kengkieng gade lak. Pa ngkap kegaidung mimacang dizie; pa bata tei kegaide teicang luzie. Pa mina kengkiengdung de ngkap dizie, kemcime kakga minadung de.25Pa pekang gade pe mriak kesia lepwa kecwabedung pui pet dizie. Pekatei pe lung gade pa ndu pet dizie. Pa cet mning mezing delwe mina kekieege de ngkap dizie. Pa Tinggwang hegwangdung reu hegwang de renia cuh dizie, iciu eh pecu teipang teipop dizie, dede cide mina ba ne lak.26Tinghegidung nah tingcangdung ha rang kebeu hemang rengei de kesangbe da. Dede hemang cide ngkim nzeu lu, kedanemene cide gwang kera mmi kekiee ge caine zielu.”27Ge Ih, Daniel, acu ngamdi nah tingbaziedung kekieege Ih mnei eh zeu kaudi. Pecai Ih cuh lu, nah Ih hegwangpei gwatei bamdi. Dede hemang rengei cide ne acu kebwak nah keheudi, nah cika migede cide cilu kera gahdi.
Bridge Connectivity Solutions Pvt. Ltd.