Daniel7
1Babylonia gwangpei Belshazzar hegwang teikelu raitube kum, Daniel pe zeu ga zip kebam dau pa hemang ge mmi nah marengei ge ngau. Ge pa pemang lede dai ngaubi cide raulu. Pa ma kenlang bedung rau lu:2Daniel ranggai, “Tingmui a mang lede tinggim ga tingkai tu mdai gade jaaidi ga guilwa kebam Ih ngau.3Makau kedi ketsamtsam mdai jaaidi gade mpet.4Raitube kau de au hingho nzwa dede helie nzwa pe hesiudung pung. Ih pie kebam dau, pe hesiudung hietdi nah kideu gade cide de teucuh di nah mina nzwa pe pi kena le peu sap. Cipaude de mina lungcet peu.5Makau pekenabe de cika bam, cide hegum nzwa, cide keumie delwe bam; cide pemui ga pegei kak gage hetupakra kecum ngki lwe bam. Cipau de dage, ‘Cuhlu iciu eh mina kekie gede tyeilu,’ de rangbeu.6Aipau cai Ih piedai gai. Cika makau keda ge bam dai, cide kaudau na kenzwa ge. Pe gim ga cide nruine hesiu nzwa pe hesiudung mdai bam, nah pe peudung de mdai bam. Pecu hegwang teu kera kengkieng peu nzeu.7Aipau cai de tingmui a mang gade makau pe mdaibe ngau, cide nretkei, ngau kehing, nah ngking süt kecuge. Pe gei hegeu gei disüt kecu ge; bang kenzeu pelane de cide ne tyeilu, ngki kecai, nah pe pidau tei di. Cide keda kaunedung swa de cam, nah cide pekiidung kereei bam.8Ih pekiidung pie mcet kebam dau, Ih piegai nah penui kak gade pekii keda ge pwakcuh kedi Ih ngau, keceuna ge. Pekiidung keraibe kecum de pema gade keriak mpetdi. Pekii aide ga pemiak mina miak nzwa nah hegie nah ngang süt eh kwadi kwa kecu mui ge kebam Ih ngau.9Ih pie gaige, hegwang bamdung pebam siak ga bam lu, nah Ringbammui kelabe pe bam ga bamlu. Pe painidung de ha pwa buising nzwa di, nah pe tam meurün mai kemcibe nzwa di. Pe hegwangbam miheudung nzwa, nah pe pitadung au mi heu kebam ge.10Pe dwa gade mi reuki lwa pet bam; mina pe cang cang pegwa teibam, nah mina nia haige pe dwa sap bam. Tutiakki ngkwa eh kempau bam, nah laisiukwakdung let pwabam. 11Ih pie jüja bam kedanemene pekii cide sam kedidung rang kebam ne. Makaune de teitset kebam Ih pie bam, nah pepum ngkapdi, nah cide ru kera ziemne peudi.12Nah makau keda mdaidung dade au, penui hegwang tei kera kengkieng penui dade keuteudi, dede penui teilung tingkak ge ziemne tei mtie pwapeu.13A mang lede cipau ziu, mige mina nabe nzwa tinggim ga hemwa de ngngwa gwangkela Ih ngau; pa Ringbammui kelabe da gwang nah pe dwa gage pecu kailu.14Hegwang tei kera kengkieng nah kendu nah kehu kengkieng pecu pwapeu iciu eh mina pelane, heleuhdung, nah helet leune de pe gwatei zie. Pecu hegwang tei kera kengkieng kepeu cide au kelungta bam kerabe cide au bammui zie, nah pe hegwangram au madaude ngkapdi gai kelak ge.15Nah Ih, Daniel, a rabe au a lung gade hap bamdi, nah hemang Ih ngau kegai de acu kebwak bamdi.16Cika sap kebam mi hangge da Ih gwang eh ma aidungde pekie acu liagai lo Ih keteu.17‘Makau kedi mdai aidungde au, hegwang mdai kideu gade cuh kerabe da.18Dede Hutube gu minadung ne hegwangram de luulu zie, nah penui ne kelungta nah kelungta penui gu tei dizie.’19Ge Ih makau pemdai be ha cisi neu di, cide keda kaunedung swade camceu nah ngau hingsüt kecuge, pegei hegeu gei nah pe nceu hetageu nceu; cipaude bang kenzeudung tyeilu, teipang pwa teikecai di, nah pe pi le caiketet.20Ih pe peu ga kii kereei ha de de, nah kii kedage pwak cuh, nah cipau kii dwa gade pe kii kecum nghai kedi ha de de Ih cineu di. Ih cipau kii de pe miakdung kebam nah sam kedidung rangpwa pecu ngngwa kebam medung swade di eh samdung rangkebam mui ha de de Ih cineu di.21Ih pie kebam dau, pe kii aide kemci minadung de hereu regi delwe penuide ngamlu bamdi22Ringbammui kelabe gwang kemaktane, nah Hutube gu kemci minadung mzeu pwapeu kemaktane. Ge kemci minadung hegwangram luu kelu ting gwanglu.23Ge cika sap kebambe de ainzwa ranggai, ‘Makau pe mdaibe de au, cide kideu ga hegwangram pe mdaibe zie iciu eh cide hegwangram kedabedung pelane swade tsam zie. Cide kideu pelane de tuityei zie, nah cide pidau dizie nah teipang kecai dizie.24Nah pe kii kereidung de au, hegwangram aide gade hegwang kereei cuh zie, nah penui cai ga kedage cuh zie. Pedwa medung swade pa au tsam zie, nah pa hegwangdung kecum de ngamlu dizie.25Pa Hutube de sam kesia teu eh rang zie nah Hutube Tinggwang gu kemci minadung de teikeherei zie. Pa hengyidung nah hezaidung teili kera tei zie. Ma aidungde pe ba gage kaipwa peu zie tingkum ge, tingkum kena, nah tingkum pempie ge ziemne.26Dede tinggim tutiakki ga kempau bam zie, nah penui pe dade pe kengkieng keuteu dizie kamtube ga pecu ngamlu nah ngkapdi kerane.27Pe hegwangram nah pa gum keludung, nah tinggim pekiene kangga pe hegwangramdung kendu, cide pwa minadung Hutube gu kemci minadung de peu dizie. Pe hegwangram au kelungta bam kera hegwangram, nah hegwangram kedadung pelane de pe gwatei nah pe sam mzai zie.’28Aide hemang penlibe da. Ih, Daniel, a ziemne au, a kecetdung acu keheu süt nah a swa gahdi. Dede Ih aide akatei aziemne kai nzeu luda.”
Bridge Connectivity Solutions Pvt. Ltd.