Daniel12
1“Cipau ting dau Michael, hegwangnapei kedibe n mina mapie kelabe, cuh luzie. Cidau keherei kecu ting ge zie, heleuhbe lungh cuhkelu gade aipauting de kecang madaude ciciula kemak ge zie. Cipau tingdau n minadungde, laisiukwak ga pe zi rau pwabam eh ngaukelu leune de kelilu zie.2Kideube rebui ga zip kedime ringcuh zie, kangge kelungta kering ga nah kangge hengam ga nah kelungta keherei zie.3Kemteumedung tinggim kebaa nzwa baa zie, nah kekieege lungh tei nreupwa makesang gage kai kelume, cipaume au kelungta nah kelungta hegidung nzwa zie.4Dede nang Daniel, sam aidungde kebai di; laisiukwak ngkuidi peting kekambe cang kemaktane. Mi kekieege luga aika pak gwang pak mie zie, iciu eh maci kieesi luzie.”5Pecai I, Daniel, piegai, nah cika keda hangna sapbam. Hangge hereuki ailam gim kungga sap, nah hangge hereuki lulegim kungga sap.6Penai hangge langcimpai bah eh hereuki nreule lulegim ga kebambe dage rangdi, “Miswakegah ta aidungde kamtu ga gwangcang kera daitie ge zie no?”7Ih minabe langcimpai bah delwe hereuki lulegim nreule kebambe dade siu, pa pe ba zetle nah pe ba hile tinggim gage hwacuh delwe kelungta ring kelabe Tinggwang zi gade reset eh cide mmi ge, mmi kena, mmi pempie ge zie. Kamtube kemci minadung kengkieng cang kedi dau, ma aidung pelane cangdi zie.8Ih siuda, dede Ih cilu ma, Cine Ih keteu, “A mpaubo, aidung pelane dai nzwadi zieno?”9Pa rangdi, “N lampui ga gwangcu, Daniel, kedanemene samdung au kebai dida nah kaudap dap dida kamtube ting cang kemaktane.10Mina kekieege de teiheci luzie, mci luzie, tei heci dizie, dede kesiame au kesiabe bata teizie. Mina kesiame mige de cilak, dede kemteume au ci luzie.11Tei jüja bamkela keru ratak reca de kam kedi ting gade nah kengaurau dene ngkap cangsiakdi kera mteilu, cika tingbazie 1,290 bamzie.12Kamtube tingba ziedung 1,335 de kwa kelume samlam pungtu.13Nah nang, Daniel, n teilung kamtube kecang de kesamsang ga tetla maisia, iciu eh nang mtak luzie. Kamtube tingbaziedung ga, ncu kepeu ni de ga nang cuh dai luzie.”
Bridge Connectivity Solutions Pvt. Ltd.