2 Samuel1
1Saul tsai kedicai, David Amalekme de regi lwe cailigwang nah Ziglag ga langnane bamdi.2Lang cumne benai, mipeige Saul ramzeuki gade gwang pe nia kehak ge kailu nah pe peu gage rebui pwagai. Pa David da gwang kecudau pa hangdeu ga keumie nah ngkumpung eh zeu miedi.3David pe dage rang eh, “Nang dai gade gwang lano?” Pa keli eh, “Ih Israelme ramzeuki gade pak mbai luda.”4David pe dage rang eh, “Kehereide, dainzwa di bi kecu de ada ranglia lo.” Pa sam keligai, “Minadung hereu gade pak dida. Mina kekieege kau dida nah kekieege tsai dida. Saul nah pe napei Jonathan de tsai dida.”5David rehangpei da ranggai, “Nang dainzwa Saul nah pe napei Jonathan tsaidi kecu cilu dino?”6Rehangpei keligai, “Ih mning mezing eh Gilboa Deutu ga lage, cika Saul pe hengei ga ngngei lwe bam, nah hekwen bagidung nah cide teukelame pecu gwa canglu lai eh la.7Saul nreu gwanggai nah acu ngaulu delwe acu qugai. Ih keligai, ‘Ih aika bam.’8Pa a dage rang, ‘Nang cau no?’ Ih pecu keligai, ‘Ih au Amalekme.’9Pa a dage rang, ‘Nang a reuga sap lwe acu teitsetdi lo, kedanemene keherei süt kecu ada gwang bam dida, dede keringria ada bamreu.’10Cine Ih pereu ga sap lwe pecu teitsetdi, kedanemene pa kaukedi cai ringdai gai kelak Ih ci kedine. Pecai Ih pe peu ga pe hegwangpeurwa kebamde keulu nah pe ba ga kebam pe tah de, nah cidungde nda pwa gwang la delie, a kedibo.”11Cidau David pe gunia teuhak di, nah pecu ngngwa kebamme pelane pa nzwa teidi.12Penui suisia sütdi, hap, nah tinghegi kecang mmwang bamdi, Saul nah pe napei Jonathan ziemne, RAMPAUBE minadung ziemne, nah Israel leuhme ziemne kedanemene penui kingtie gade kau kedine.13David rehangbe dage rang, “Nang dai gade gwang lano?” Pa keligai, “Ih au aipau deu ga, Amalekme sangme napei ge.”14David pe dage rang, “Dai ziemne nang RAMPAUBE ne keniak kelu hegwangpei de n ba le teitset kera hingdi meno?”15David rehangme ge de qu lwe rangdi, “Mie delwe pecu teitsetdi lu.” Cine cipau pei de mie delwe pecu teitsetdi, nah Amalekme pei tsaidi.16Pecai David Amalekme pei tsai paau dage rang, “N jai n peu ga bam kedanemene nkatei n mui le zierang tei eh ncu mmau eh, ‘Ih RAMPAUBE ne keniak kelu hegwangpei de teitset dida,’” de eh kerang ne.17Pecai David Saul nah pe napei Jonathan de kensung lei aide tei gai.18Pa minadung de Lakpi Lei aide Judah namedung de ledeu beulo aja kaigai, Jashar Laisiukwak ga rauteu kela de.19“Israel, N kendube,tsaidi da, n bam kehudung gade teitset dida!Kengkiengme dainzwa kau dino!20Gath gade cide rang helo, cide sah heloAshkelon lampui gade,iciude Philistinme napuidungsuiyi teikelak ne,iciude hegeurum kemak napuidung depeu hengyi kelakne.21Gilboa Lamlwadung,cika peu nreu ga hezin mede tingrui so,mede luhdung de peu recadung ziemne mei buibeu so,kedanemene cika kengkieng reunet de tei herah dida.Saul reunet de maca le keniak si meda.22Teitset kedime jai gade,kengkieng me paudung gade,Jonathan lakpi caili dailu meda, nah Saul Kingtie mta cailigwang ma.23Saul nah Jonathan penai teilung ga keku nah ngaugia puila, nah penai ketsai daude kerepüt ma. Penai au helie swade mzet, penai au hinghodung swade ngkieng.24Nnui Israel napuimedung, Saul reuga haplo, nnuide hepai kegie nah jeweldung le nnui pwa tei kebeube de, nah kecak hetaniadung nnui nia ga kai kebeube de.25Dainzwa kengkiengme hereu gade kaudi bi! Jonathan de n kengkieng bamdung gade teitsetdi.26Ih n ziemne hapla, a sinabe Jonathan. Nang au adade pemi hunglie. N keku au a ziemne disüt lie, mipui keku swade yiki.27Kengkiengme dainzwa kaudi no, nah hereunetdung gah dino!”
Bridge Connectivity Solutions Pvt. Ltd.