1 Samuel31
1Cinzwa kebamdau Philistinme reugwame Israelme de ngngwa hereu tei. Israel minadung pakdi Philistinme dwade nah Gilboa deutu gade mina kekie de teitsetdi.2Dede Philistinme Saul nah pe napeidung zuimie. Philistinme pe napeidung de tuilu Jonathan, Abinadab, nah Malki-Shua de teitsetdi.3Saul de ngngwa regi sütdi, nah pecu ngauraume lakpitsidung ne kapdi nah penui ziemne pa rejam nsiasütdi.4Ge Saul pe reunet pwakelabe dage rangdi, “N kiengtie zütlwe acu reutset dilu. Mecai hegeurum kemakme ne gwang acu zaira teidi zielu.” Dede pe reunet pwa kelabe cide tei raudi kedanemene pa ngngi süt kedine. Cine Saul pekatei pe kiengtie zütlwe cipau reu gage kaugai.5Pe reunet pwakelabe Saul tsaikedi ngau luge, pade cinzwa eh pekatei pe kingtie reu gage kaugai eh Saul de ngngwa tsaidi.6Cinzwa eh Saul pe napeidung hangcum nah pe reunet pwakelabe tsaidi, mina aidungde pelane langnai gage tsai ncütdi.7Israelme Jezreel langkam kedalebie nah Jordan reu kahpet le lungh kebamme Israel minadung pakkedi ngau luge, nah Saul nah pe namedung de tsaikedi ha siu luge, penui namdidung gidi eh pakdi, nah Philistinme gwang eh cika lungh di.8Hereu teikecu pecia benai Philistinme ketsai paaudung de lamlui kera gwang, ge penui Saul nah pe napei hangcum paaudung Gilboa deutu gade ngaulu.9Penui Saul peu danglu, pe reunet keulu, delwe Philistinme deu pelane gage samliakeyi penui gu reca mamie kibung dung ga nah penui minadung dage paubeu kera samgwame de langgai.10Penui pe reunet niadung Ashtoreth rabe de mamie kerecaki gage kailu, nah penui pe paau Beth Shan namdi kirie gage giagim eh retlu.11Gilead Jabesh namdi ga kelung minadung Philistinme Saul dage teikegai ha siu luge,12mina regi kerame pelane cuhlwe nah tingmui pelane Beth Shan gage tetgai, Saul nah pe napeime paaudung namdi kirie gade pwa nghunglu. Penui Jabesh ga pwa cailigwanglu delwe penuide cikage rudi.13Pecai penui radung pwalwe Jabesh ga tamarisk bang kang gage penuide kungdi, delwe lang hena ne hap ge mmwang bamdi.
Bridge Connectivity Solutions Pvt. Ltd.