2 Kings20
1Cipau tingdau Hezekiah mra eh tsaidi laidi. Cine caihakecibe Amoz napei Isaiah peda gwang, nah pe dage rangdi, “RAMPAUBE rang zeu, ‘N kilung lamlui teune lulo; kedanemene nang ringgai lakta nah tsai dizie da.’”2Cidau Hezekiah linggule pezu pung nreugwang delwe RAMPAUBE dade kekie tei eh, ranggai,3Ge Hezekiah hap mteisüt eh cu, “Ngaunggia eh nsung gailo, RAMPAUBO, Ih n dwa gade a mlung pelane teu masang eh tet gwang kecu, nah n miakngau gade dai yi labi Ih tei kegwang tei delu.”4Isaiah hegwangki sum ga tetkah di kemak dwa, RAMPAUBE sam ge pe dage gwang eh, ranggai,5“A gu mina muiteube Hezekiah da caili lüt eh rang beulo, ‘Aide RAMPAUBE n pau David Tinggwang ne rang lie eh: “Ih n kekie siu luda, nah n miakdui ngau luda. Ih n mateei langcumne benai tei hemi beuzie, nah nang RAMPAUBE ki ga hang luzie.6Ih n teilungh mmi kereiehmengei peu si zie, nah Ih ncu nah namdi aide Assyria gwangpei ba gade kelibeu zie, nah Ih namdi aide gum luzie akatei a ziemne nah a kilabe David ziemne.”’”7Cine Isaiah rangdi, “Tangzüttsi le tei kelu kangge keulu.” Ge penui kerang nzwa tei eh cide reteei zam gage kaigai, nah pa yilu.8Hezekiah Isaiah dage rangdi, “Daipai rehi ge zie no RAMPAUBE a mateei tei hemi beu kera, nah Ih RAMPAUBE kerecaki ga langcumne benai hang kera de?”9Isaiah keli eh, “RAMPAUBE dade n ziemne ma rehi aide zie, cide RAMPAUBE pa rang kedi be teicang zie. Peu tingkaumie de pikiet kerei tetpet ziemi, mi pikiet kerei tet caisim zie no?”10Hezekiah keli eh cu, “Tingkaumie ziemne pikiet kerei tetpet kecube au la zie. Peu tingkaumie de pikiet kerei tet caisim dilu.”11Cine caihakecibe Isaiah RAMPAUBE dage mra gai, ge pa tingkaumie de peu Ahaz ne teipwa kebam, takswa de gade pikiet kerei keu caisinlu.12Cipau tingdau Baladan napei Babylon gwangpei Marduk-Baladan Hezekiah mateei kebam ha siulu, cine pa Hezekiah de laisiudung nah mtamapeu ge lang gaibeu.13Hezekiah laisiu cidungde ga rau kenzeudung pei kegai kingnei siakte lu, nah ciciu eh samgwamedung de pe hegwangki nah pe mabam pemi kewhungdung pelane, rangkanggeu, kecak, mosala, nah maca pemi kewhung, nah pe reugwanet kekai kidung, nah mabam kekai kidung ga kebam pelane keu liagai. Pe hegwangki, mede pe hegwangram ga kebamdung magede Hezekiah penuide keu lia kemak gah.14Pecai caihakecibe Isaiah Hegwangpei Hezekiah da gwang nah peda keteu, “Mina aidungde n dage daipai rang no? Dai gade penui gwang la no?” Hezekiah rangdi, “Penui mdei süt kecu Babylon deudi gade gwangla,” de beu.15Isaiah keteu gai, “Daipai penui n ki gade pie no?” Hezekiah keli eh cu, “Penui a ki gade ma pelane pie luda. Agu ma pemi kewhung niadung kakgade Ih keulia kemak magede gah da.”16Cine Isaiah Hezekiah dage rangdi, “RAMPAUBE sam kingnei lulo:17‘Pielo, n hegwangki ga maleune, n paume henai kecang hekwa kelu leune, Babylon gage pung gaidi kera tingbadung ge gwang lauda. RAMPAUBE rang zeu, magede bang nzeu beulak.18N dade lunghkegwang mipeinadung, n teih n jai gade lungh kelumedung, penui penuide ngngwa tetti zie, nah Babylon gwangpei hegwangki ga eunuchme tei dizie.’”19Pecai Hezekiah Isaiah dage rangdi, “Nang rang kegai RAMPAUBE sam au yilie.” Kedanemene pa cetdi, “A teilung tingdau kezuyi nah kwak kecu bamlak deni?”20Hezekiah tei kegai leune, pe kengkieng pelane, nah pa duibau nah helaudung teilu dibi, nah dainzwa pa namdi ga duiria teu gwang lubi, Cidungde Judah gwangpeidung hakwak gage raupwa la meni?21Hezekiah pe paumedung nzwa tsaidi, nah pe napei Manasseh ne pebam leu eh hegwang teidi.
Bridge Connectivity Solutions Pvt. Ltd.