2 Kings19
1Hegwangpei Hezekiah penui pau kegai sam siu luge, pa pe paini hietti, roso pai bahlu, delwe RAMPAUBE ki ga lütdi.2Pa Eliakim hegwangki pie kerengei be, nah keraube Shebna, nah cingkume kecingmedung de lang gai, pelane roso pai bahlu eh caihakecibe Amoz napei Isaiah da gwang.3Penui pe dage rangdi, “Hezekiah ranggai, ‘Henai lungrei tingba ge, kesiu kecu nah hengam tingba ge, kedanemene mipui hena mna kera tingdau nnei ham eh mna gailak eh kebam pui nzwa dida.4Ciciu eh RAMPAUBE nnui Tinggwang reugwamui ditube samdung siu bam zie, pecu lang gai eh pe mpaube Assyria gwangpei ringkela Tinggwang de ncau kecu, nah RAMPAUBE nnui Tinggwang siu kebam samdung de mmau beu bi zie. Hemaa keceu aika kebamme ziemne cu nnui kie lulo.’”5Cine hegwangpei Hezekiah kilame Isaiah da gwang,6nah Isaiah penui dage rangdi, “Nnui mpaube dage rang beulo: ‘RAMPAUBE ranggai, “Nang siukelu samdung de ne ncu keheu diso, cide ne Assyria gwangpei kilamedung acu rangmsia dida.7Pielo, Ih rabe ge peda kaigai zie, nah pa letkiee samdung siu zie, nah pekatei pedeu ga caili gwang dizie. Ih pekatei pedeu gage pecu teitsetdi zie.”’”8Pecai reugwamui ditube cailigwang eh Assyria gwangpei Libnah de ngngwa keregi bam lie kecu cilu, kedanemene Lachish gade hegwangpei tetti delie kecu pa siu kelune.9Pecai Sennacherib pecu ngngwa keregi kerane Cush gwangpei Tirhakah nah Egypt, reugwamedung de qu hekwa kebam cide siulu, cine pa samgwame de Hezekiah da sam teugwang kera langgai dai.10“Judah gwangpei Hezekiah dage rang beulo, ‘Nang nlum kebam n Tinggwang de peu ncu cwa diso, “Jerusalem de Assyria gwangpei ba gage kai dilak,” de rang eh.11Ainie, nang Assyria gwangpeime hangdeudung pelane ga penuide tei ngkap cangsiak eh dai teigai bi ci nah ngau bam. Ncu daitei kelibeu lai?12Gozan, Haran, Rezeph, nah Eden minadung Tel Assar ga kelunghme: A paume ne ngkap kedi heleuhdung, heleuhdung rabedung penuide kelibeu ni?13Hamath gwangpei, Arpad gwangpei, Sepharvaim namdidung gwangpei, Hena, nah Ivvah gwangpeidung dai ga bam no?’”14Hezekiah samgwame dade laisiu aide ngau lwe peilu. Pecai pa RAMPAUBE ki ga nghang lwe pedwa gage kai gailu.15Pecai Hezekiah RAMPAUBE dwa gade kekie tei nah rangdi “Reugwame reu RAMPAUBO, Israel Tinggwang, nang Cherubim reu kebambe, nang rünne Tinggwang kideu ga hegwangram pelane reu. Nang tinggimdung nah kideu damgai.16RAMPAUBO, n kwen nreugwang nah kingnei lulo. RAMPAUBO, n miak ngkei gai eh pie gailo, nah Sennacherib lang kegai samdung de, pa ring kela Tinggwang sam teu henui ketei kingnei gailo.17RAMPAUBO, Assyria gwangpei heleuhdung nah penui deudung ngkap kesang dida.18Penui rabedung de penui mi gage ru dida, kedanemene cide rabedung ma, dede tsing nah tangtsu mina bane teikelu ge. Cine Assyriame cidungde tei msiadi.19Ciucai cu, RAMPAUBO anui Tinggwang, Ih nda de kiela, anuide pe kengkieng gade keli beulo, ciciude kideu ga hegwangram pelane nang rünne, RAMPAUBE, Tinggwang lie kecu ci luzie.”20Pecai Amoz napei Isaiah samli ge Hezekiah dage langgai eh ranggai, “RAMPAUBE, Israel Tinggwang rang zeu, ‘Assyria gwangpei Sennacherib n dage lungrei kekai de ziemne nang ada de kie kegai Ih siu luda.21Aide RAMPAUBE ne pe ha rang kegai sam delie: “Zion relei kemci napuimencu mlai nah ncu nui eh henui teibam.Jerusalem napuimenda ge pe peu peungum bam.22Caude nang kii nah mneula no?Caude nang ncau eh n kwa hugai nonah helia eh n miak pie hu di dino?Cide au Israel kemcibe.23N samgwamedung de ngngwanang Rampaube de ncau,eh rangdi,a bagidung peikap gai kelak teu,Ih lamlwatu kehudung ga hang,nah Lebanon deutu hutubedung ga.Ih cedar bang kehudungnah cypress bang yitubedung cika kebam bi dizie.Ih hegung cuktu ga lüt zie,mania keyi builu kela hegung ga.24Ih tekwadung kuilunah sangme duidung saklu.Ih Egypt reukidung pelanea pideu le dau cangh dida.’25Nang siu meni Ih aide ndaaderiempwa la dida,nah ndaa ge teicang dida?Ih cu ncu peu kera pwagwang.Nang namdidung heni aika ngngwa gwangla teimsia bang kebam kidung ga mina kekiee lungh kebamtsukwa teimeu lüt eh.26Mina cika kelunghme mnei,penuide teupang nah hengam teidi.Penui luh gacehei kemdiak,luh ga mede kireu ga cehei lungh kebam,cide bwa cuhlu kemakne rudi.27Dede Ih nang kebam,nang kegwang kemie,nah acu mmau eh n rata kebam cibam.28Acu mmau eh n rata bam,nah n hegie samdung a kwen ga gwang kedine,Ih n nkie gage kegwak ge kaizie,nah n mui gage kekangria ge kai dizie;Ih nang kegwang lampui gadencu peu tet caili dai dizie.”29Aide n ziemne ma rehi ge zie:Hekum nang renaam gade kelungh tyei zie,nah nkikum nang cika de daipai bwa mi.Dede pecai bekum au nang nleuh ling maisia nah luhlüt lubui,nah kubebang linglu eh kubetsi tyei zie.30Bangkelu Judah ga lungh kebamme kanggepe mah him dailu eh petsi bui luzie.31Kedanemene Jerusalem gade bang kelume lungh pet zie,Nah Zion deutu gade de kelikelume gwang zie. Aide Reugwame reu RAMPAUBE tei kera lungning de ne teilu zie.32Cine RAMPAUBE Assyria gwangpei ha aide rang gaila:“Pa namdi aika lütlakMede cide gage lakpitsi gede kapgai lak.Mede pa cide dwa hegeu punglwe gwang gailakMede kekwa mbaiki gede tei gailak.33Pa kegwang lampui de gadepa tet caili dai cu nzwa dizie;pa namdi aika lüt lakaide RAMPAUBE ndu kegai da.”34Kedanemene Ih namdi aide kwa nah gum luzie,a ziemne nah a kilabe David ziemne.’”35Cipau ziu RAMPAUBE gwame ge mie delwe Assyriame ramzeuki gwaketang eh reugwame 185,000 de teitsetdi. Tingcang nuge minadung cuh luge, ketsai paaule kehei leuga puidi.36Cine Assyria gwangpei Sennacherib Israel gade tetti nah kilung cailigwang eh Nineveh ga bamdi.37Pecai, pa pe rabe Nisrok de ki gade reca kebamdau, pe napei kena Adrammelek nah Sharezer ne kiengtie le pecu teitsetdi. Ge penai Ararat deu gage pak gaidi. Iciu eh pe napei Esarhaddon pe bam leu eh hegwang teidi.
Bridge Connectivity Solutions Pvt. Ltd.