Corinthiame Kenabe9
1Jerusalem ga kenlumme ziemne heta tei kegai ha Ih nnui dage raugai mede yida.2Kedanemene nnui ngha neu kebam Ih cibam, nah Macedoniame dade Ih nnui ha ziemne ngang eh, “Achaiame nziekum de ngha kera mtei pwa bam dida,” de rangbeu. Nah nnui siering kebam dene penui kekiee gede kecung silu.3Dede Ih sinamedung de lang gai dida iciu eh nnui ziemne anui hegie kelade peu kemta teidi melu kerane, iciu eh Ih nnui dage kerang nzwa nnui mteilu kerane.4Maige, magade Macedoniame mikang ge acu ngngwa gwang eh nnui mteilu mene bam eh ngau cai, anui hengam ngau zie—nnui ngam meliene, nnuide mning mmi süt kecune.5Cine Ih sinamedung de kecung gai mai kesia cetlu ciude penui gwang nswa eh nnui sampet kebeu mapeu aide mtei nswalu kerane. Iciu eh cide tei maisia lu de mene neungga eh mtei mzeulu kerane.6Cu Ih aide ranggaila, gi cam kegaibe, rum cam de zie, nah samlam ngaulu kerane gi kegaibe samlam cide rum dai zie.7Keheibe de peu pe lung gade riem kelu nzwa peulo, raungga mene mede maisia lu de mene, kedanemene Tinggwang pe suiyi eh peu kelame de pe suila.8Nah Tinggwang ngaugia pelane pwa ncu peulu kebui bam, ciu eh ma pelane gade, kehei daude, nang teu maikesia leune bam eh, heta keyi leune ga nda kepui bamlu kerane.9Kesanglaisiu ga rauteukela nzwa: “Pa mbang süt eh peula, pa kegahme de peula;pe masang kelungta la muizie.”10Heleuh gi kera peu kelabe nah taktyei ziemne tangku peu kelabe, nnui gi kera heleuh peu nah tei ngkiee beuzie, nah nnui kesamsang tsi tei ngkiee beuzie.11Maleune ga nnuide peu mbang bamlu kerane tei mahei beuzie, nah cide ziemne anui Tinggwang de ketwa peu luzie.12Kedanemene heta aide tei kebam ga kemcime rünne de ngha kelu rünne ma, dede Tinggwang de ketwa kekiee ge petsi lula.13Heta aide tei kegai ziemne, nnui Khrista samliakeyi zierang ketei ga samzai tei nah nnui mbang eh mapeu penuide nah mileune de ngngwa mzi kegai ziemne penui Tinggwang de twala.14Nah penui kekie au nnui ziemne, Tinggwang ngaugia kedi nnui da kebamne nnui gwang kera de reguibam.15Tinggwang mapeu rangkap gai kelak de ziemne pecu twalo.
Bridge Connectivity Solutions Pvt. Ltd.