1 Thessolonians5
1Cu sinamedung, peting nah pehidung ziemne, anui nnui dage magede raugai maikesia ge meda.2Kedanemene Rampaube caili kegwang tingba au keregame ge tingmui ne gwang kela nzwa gwang kera nnui ci hemisüt bam.3Minadung, “Kezuyi nah lungciep bam,” de rang kebamdau, zette kengkap, mipui tetlak kelame hena tedteei teei gwang kela nzwa penuida gwang zie. Nah penui madaude pak gailak.4Dede sinamedung, nnui au cipau tingba de de peu keregame kegwang nzwa nnuide keheu kera kemui ga bam meda.5Kedanemene nnui peciakne kebaabe name nah ting kebaabe name kecune. Anui tingmui gu mede kemuibe gu ma.6Cine, anui kedame nzwa zip kerabe ma. Meliene, anui mrak nah mcing bam lugo.7Zip kelame, tingmui zip la, nah sakmie kelame, tingmui mie bamla.8Dede anui au tingkebaa gu kecu ziemne, anui mcing bam eh kenlum nah keku hekarakcum de kailu maisia nah kelikelu keregui dele anui peurwa teilwe bam maisia.9Kedanemene Tinggwang anuide lunghop ziemne kedet luma, dede anui Rampaube Jisu Khrista gade kelikelu ngaulu kerane.10Anui ziemne pa delie, iciu eh anui ringbam mede tsaidi liede, anui pecu ngngwa lunghlu kerane.11Cine nnui teibam kela nzwa, hange ge lung taumla nah ket ket de ngha bam lulo.12Dede sinamedung, nnui kakga mata tei kelamedung de nah Rampaube gade nnui reuga kebamme nah nnuide ledeu kelamede rüt lulo eh, anui nnui dade kiela,13nah penui batadung ziemne penuide kusüt eh kerüt peu lulo. Nnui kakga kezuyi eh bamlu.14Nah sinamedung, petau teikemakme de rang mriaklu, pelung kesiame lung teingkuu lu, kemneime de nghalu, nah mileune dade helungtie lulo, anui nnuide kecung gaila.15Migede petau kemakpe ziemne petau kemakpe le tei gwa melu kerane mriaklu, dede hangge ge dage nah pelane dage keyibe tei kera peei muilu.16Nnui suiyi lamui lulo.17Mtak mene kielu.18Maleune gade Tinggwang de hetwa peulu. Kedanemene aide Khrista Jisu gade nnui ziemne Tinggwang lungning kecune.19Kemci Rabe de tei mmüt diso.20Caihakecisamdung de mlai diso.21Ma pelane kedakpie lu. Keyibe kerak teu bamlu.22Makesia leune gade mbai dilu.23Lungciep Tinggwang depeu nnuide tei mci cangbeu kelube teilo; nah nnui rabe, nah keringria, nah mipum de peu yicangsiak nah kemau gede gah eh anui Rampaube Jisu Khrista cailikegwang dau bam kelube tei lulo.24Nnuide qu kelabe au samsang, nah pa cide tei beuzie.25Sinamedung, anui ziemne de kielu.26Siname pelane de kemci hemam teu kelum gailo.27Ih laisiu aide kenlummedung pelane dage peilia gailo de nnuide Rampaube zi gade nlum sünne gaila.28Anui Rampaube Jisu Khrista ngaugia depeu nnuida bamlu lo.
Bridge Connectivity Solutions Pvt. Ltd.