1 Thessolonians4
1Cine kamtube, sinamedung, nnui tei kebam nzwa, nnui dainzwa tetgwang eh Tinggwang suiyi tei maisiabi kecu nnui anui dade cikelu nzwa, ci swade teisi lo, anui nnuide Rampaube Jisu zi gade kecung eh kie gaila.2Kedanemene anui Rampaube Jisu zi gade nnuide daipai ledeu beubi kecu nnui cibam lu.3Kedanemene Tinggwang lungning au peu nnuide mcilu kera nah kemmha gade peu nnuide kezeulu kera;4nnui hangge ge kecu mci nah hetwa pung eh nnui penau teilu kera ci kera,5Tinggwang de ci kemakme Gentileme nzwa kemmha ta kehengin gade mene;6peu migede de makie aide ga hezai gikah, nah pe sinabe de petau kemakdung tei diso. Kedanemene anui nnui dage mrairang beu eh zierang tei kebeu nzwa, Rampaube ma aidungde peciakne kum keteibe kecu ziemne.7Kedanemene Tinggwang anuide mcikemak gage qugai ma, dede kemci gage.8Ciziemne, keheibede aide de mlai kelame mina de mlai bam ma, dede Tinggwang de, nnuide pe Kemci Rabe peu kelabe de.9Dede caihereiswacing kereku kecude, anui nnui dage magede raugai mede yida, kedanemene hangge gede kereku kera Tinggwang ne nnuide ledeubeu dida kecune.10Nnui Macedonia deuceu leune ga kela siname peciakne ziemne aidungde tei kesang gaida. Dede sinamedung, aiswade teisi lo eh anui nnuide kecung gaila,11nah anui nnuide ledeu kebeu nzwa, zingde lungh kera gage ka gailu, nah nnuikatei nnui ta teilu, nah nnui bale matei lulo,12iciude nnui nlumkemakme dwade tet teune lu kerane nah nnui kenaang gede bamta dilu kerane.13Dede sinamedung, anui peu nnuide zip kedimedung ha ci mene peu bamneu ma, ciciu eh keregui kegahme nzwa nnui suisiadi melu kerane.14Kedanemene anui Jisu tsailwe ringcuhdai kedi nlum la, cine Jisu cailigwang kecudau, Tinggwang kenlumme zip kedimedung de pecu ngngwa cailigwang daizie.15Kedanemene anui Rampaube sam gade aide nnui dage rangla, cide anui ring kebamme, Rampaube gwangdai kera ga bang kebamme, zip kedimedung dwarai eh tetlak.16Rampaube tinggim gade nghung zie. Pa ma sahbak gai eh gwang zie, tinggimgwame kedibe aja kai gaizie, nah Tinggwang teluibe kwagai zie, nah Khrista da la eh tsaikedime ringcuh raizie.17Pecai anui ring kebamme, bang kelume, penuide ngngwa nghang hemwa gade keu ncütlwe tingkai gade Rampaube de redau zie. Iciu eh anui Rampaube de ngngwa lamui dizie.18Ciziemne, sam aidungde teu eh hange ge lung taumla lulo.
Bridge Connectivity Solutions Pvt. Ltd.