1 Samuel20
1Pecai David Ramah ga Naioth gade pakpwa Jonathan da gwang nah Jonathan dage rangdi, “Ih daipai teidi di no? Ih teimau kedi de dai no? N pei dwaga a mau dai no, pa acu teitset zielie kera?”2Jonathan David dage keligai, “Nang cikade ndei dilu, nang tsaidi lak. A pei a dage rang mene kedige mede keceu nage de tei lama. Daitei a pei aidungde a dade mbai lai? Cide kesang ma.”3Dede David sampet dai nah rangdi, “Daikenzwa ge n miak dwa gade nang acu n sui bi n pei ci hemi sütbam. Pa rangdi, ‘Jonathan de peu aide ci so, mecai pa pelung keherei sütdi zielu.’ Dede RAMPAUBE ring kela nzwa, nah nang ring kela nzwa, cika au dede pikiet ge bam ketsai anai kakga.”4Cidau Jonathan David dage keligai, “Nang kerang keheileu, Ih teibeu zie.”5David Jonathan dage rangdi, “Ncünne au hekei keheci, nah Ih hegwangpei de ngngwa bam eh matyei maisia. Dede peu acu tet lo, iciu eh Ih luh ga lang pekecum benai tinghegi kecang akatei acu mbai nzeu lu kerane.6N pei Ih bam kemak ngaulu cai, ainzwa ranglu, ‘David pe namdi Bethlehem gage pakgai lu kera a dade kiebi di; kedanemene cide mmi ramsangkum reca teibam kela pautsa pelane ziemne kecune.’7Pa, ‘Petau da’ de rang cai, n kilabe da kezuyi bam luzie. Dede pa pe rata sütdi cai, pa acu tei keherei gai kera riempwa kebam nang cilu zie.8Ciziemne n kilabe ma pie teune lulo. Kedanemene nang n kila bede RAMPAUBE kemci samkak kelu de nda teugwang lu delu. Dede Ih mau liecai, nang acu teitset di lulo; Daitei eh acu n pei da ngngwa gwang lai no?”9Jonathan rangdi, “Cikenzwa be au mning di helo! A pei ncu tei keherei gai kera cetpwa kebam cicai ge, Ih n dage rangbeu lak luini?”10Cidau David Jonathan dage rangdi, “N pei pe rata eh ncu sam kelikegai cai caune a dage cide paubeu zieno?”11Jonathan David dage rangdi, “Gwanglu, anai luh ga mie go.” Cine penai hangnana luh ga mie di.12Jonathan David dage rangdi, “Peu RAMPAUBE, Israel Tinggwang de, zierang teilu. Ih ncünne a pei de aikenzwa tingdau keteu kegai dau, mede lang pekecum benai, ainie, David da makeyi ge bam liecai, Ih n dage langgai eh peu ncu cide lak ni?13Magade a pei ncu tei rejam neu lacai, peu RAMPAUBE de Jonathan dage tei gailu, nah cipau reude magade peu ncu cilak liecai peu ncu langgai dilu, ciude nda kezuyi bam luzie. Magade a pei ncu tei rejam neu lacai, peu RAMPAUBE de Jonathan de tei rejam dilu nah ciswa de tei kiee kigailu magade ncu peu cide cigai meliecai nah ncu kezuyi gade langgai di meliecai. Peu RAMPAUBE de ncu ngngwa lalu, a pei de ngngwala kecu nzwa.14Ih cude ringbam cai, nang acu RAMPAUBE gu samkakkelu masang de acu keulia lak ni, iciu eh Ih tsaidi melu kerane?15N samkakkelu masang de a kilungme dage kelunghta peu bam lo, kideube zu gade RAMPAUBE David de ngau keraume leune de ngkap di lie de.”16Cine Jonathan David kilungme dage sampet gai nah pa rangdi, “Peu RAMPAUBE de David ngauraume de saja peulo.”17Jonathan David de peu sampet gaidai kedanemene pe keku David da kebam ziemne, kedanemene Jonathan pekatei pecu kehung nzwa eh David de hungla kedine.18Cidau Jonathan pe dage rangdi, “Ncünne au hekei keheci ngyi da. Apei nang bam kemak ngau luzie, kedanemene n bam mta di zielu.19Nang langcumne bamlu sangne, zette nghung nang ndaa kembai bam ga, nah Ezel lie eh qu kela tsukwa ga bamlu.20Ih cika ge lakpitsi kecum kapgai zie, Ih cide de kah lwe kap kebam nzwa.21Ih rehangpei gede langgai zie nah peda rangbeu zie, ‘Mie lakpitsidung de peeilu’. Magade Ih rehangpei da rang eh, ‘Pielo, lakpitsidung ntaiga cika bam; cidungde keulu,’ decai cidau gwanglu; kedanemene madedu meda nziemne, RAMPAUBE ringkela gade.22Dede magade Ih rehangpei dage rang eh, ‘Pielo, Lakpitsidung keda lambie bam’, degai cai nang tetdilu, kedanemene RAMPAUBE ne ncu lang gidi zeu delu.23Anai hangge ge sampet kegai de, ainie, RAMPAUBE ne anai kakga lamui zie.”24Cine David luh ga mbai bamdi. Hekei keheci gwang ge, hegwangpei matyei kera ntum bamlu.25Hegwangpei pe bam ga, bam kela nzwa tangdeu taiga bamlu. Jonathan pecu kencwa ga bamlu, nah Abner Saul taiga bamlu. Dede David bam de mta di.26Dede Saul cipaunai magede rang ma, kedanemene pa, “Pe dage mage teigai dida, nah pa mci meda; pa mci mezing da,” de cet kedine.27Dede lang pekena benai, hekei keheci cai benai de, David bam mtadi. Saul pe napei Jonathan dage rang, “Daitei eh Jesse napei nziene mede henai de matyei kecu ga gwang meno?”28Jonathan Saul de keligai, “David Bethlehem ga mie kera a dade penggia kiedi.29Pa rangdi, ‘Kehereide acu peu mielo. Kedanemene anui kibaume namdi gade ratakngyi ge bamlau lu, nah a siname acu cika gwanglo di. Cu, magade nang acu nsui liecai, kehereide peu a siname da mielo.’ Aide ziemne pa hegwangpei bam ga gwang meda,”30Cidau Saul Jonathan de perata sütdi, nah pa pe dage rangdi, “Nang hekakna, kehebwak pui napei ge! Nang Jesse napei de nkatei n ngngam nah n pui ngngam ziemne kedet kelude de Ih cimene bamni?31Jesse napei kideu ga lungh kebamtane, nang renam aide reu hegwang tei gailak. Cine pecu mie ngngwa lwe ada gwanglu, pa tsai bi maisia”32Jonathan pe pei Saul sam keligai, “Daipai kie gade pecu peu tsai lai no? Pa daitei di no?”33Cidau Saul pecu teitset di kerane pe ngei hiagai. Cine Jonathan pe pei David de teitset di kera mning teula kedi cilu.34Jonathan pe rata eh taktyeibam gade cuhlu, nah pa hekei keheci langnane benai magede tyei ma, pa David ha cetpwa pe lung keherei sütdi, kedanemene pe pei David de herüt peulu ta kedine.35Pecai benai tingcang Jonathan David de redau kerane luh ga mie, nah pa rehang nage de ngngwa mie.36Pa rehangna ge dage rang, “Pakmie Ih lakpitsi kap kegaide peei teugwang lu.” Rehangna de pakmiedi ge, pa lakpitsi ge peswa gage kapgai.37Henana be lakpitsi Jonathan ne kap kegai de cakmie kedi ga gwangcang luge, Jonathan henana de qu eh rangdi, “Lakpitsi nswa ga bam meni?”38Pecai Jonathan henanabe de qugai, “Kelwa lu, cika sap so!” Cine henana be lakpitsi keu hekwalwe pe mpaube Jonathan da cailigwang.39Dede henana be pekie daibi kecu magede cima. Jonathan penai David rünne cibam.40Jonathan pe reunetdung henana bepei de peudi nah pe dage rangdi, “Miecu, delwe cidun de Gibeah namdibe ga teugwang culo.”41Henana bede tet kedicai, David tsubau cai gade cuhlwe kwaktunglu delwe pe zu ngkum lwe hangdeu ga piacum keumie. Penai hangge gede kemam nah penai ngngwa hap bamdi, David be hap nteiki.42Jonathan David dage rangdi, “Lungciep peu nda lalu, kedanemene anai RAMPAUBE zi gade sampetlu delu nah rangdi, ‘Peu RAMPAUBE de anai kakga bamlu, a leuhme nah n leuhme kakga, kelunghta.’” Pecai David cuhlu nah tetdi, nah Jonathan namdibe ga cailigwang di.
Bridge Connectivity Solutions Pvt. Ltd.