1 Samuel19
1Saul pe napei Jonathan nah pe kilame pelane dage David de teitset dilo eh rangdi. Dede Saul napei, Jonathan David de pe sui yisütla.2Cine Jonathan David de rangbeu, “Saul a pei ncu teitset di kera peeila. Cine tingcang mriak bamlu nah heni kengkim ge ga ncu kebailu.3Ih nang mbai kebam ni ga a pei taiga sap lwe Ih pe dage n ha ranglia beuzie. Ih magede ci lucai, Ih ncu ranglia zie.”4Jonathan pe pei Saul dage David ha rang hemi nah pa rangdi, “Peu hegwangpei de pe kilabe David dage kemau teigai helo. Kedanemene pa n dage kemau gede teigai melu, nah pe ta teikegai leune au ncu nghasüt kegai ge.5Pa pe pum kaibeu nah Philistinme de teitsetlu. RAMPAUBE Israel de ngkiengkelu kedige peu. Nang cide ngaulu ge n sui yilu da. Nang daitei kemau kegah ge dage kemau teigai neula no, pekie gahzing kecu gade David de teitset gai kera?”6Jonathan kerangde Saul kingnei lu. Saul sampet gai, “RAMPAUBE ringkela nzwa, pecu teitsetdi lak.”7Cidau Jonathan David de qu gai, nah Jonathan aidung de pelane pecu ranglia. Jonathan David de Saul da ngngwa gwang lu, nah pa ndaa nzwa pedwa ga bamlu.8Hereu ge teidai, nah David tet pet Philistinmedung de regi nah mina kekiee gede gidi eh penui ngkieng lu. Nah penui pe dwa de pak di.9Saul pe ki ga pe ngei pe ba ga pwa lwe kebam dau herakesiabe ge RAMPAUBE dade Saul reuga gwang, nah David pe leibung kwa bam.10Saul pe ngei pwa David de tangdeu gage hiagim di kera teicu, dede pa Saul dwa gade mliak di, iciu eh Saul hengei de tangdeu gage hiadi. David cipau ziu pak mbai tetdi.11Saul midung gede David ki kwa lwe pecai benai tingcang teitsetdi kerane langgai. Michal, David nau, pecu rangbeu, “Nang heziu n teilung keli lumai, ncünne ncu teitsetdi zie da.”12Cine Michal peu David de hebaki ge gade nghung lu, nah pa pakmie mbaidi.13Michal kilungme reca kela mamie ge pwa zeulie gage kailu, pecai pa pe peu gage hemeu mai le tei kelu biangkum ge kailu, nah cide paidung le teu hadi.14Saul David de ngngwa kerane samgwame lang kegaidau, pa rangdi, “Pa au teeinei bam.”15Cidau Saul David de pie kera samgwame de langgai; pa rang eh, “Pe zeu gade pecu aika pwa gwanglu, iciu de Ih pecu teitset dizie.”16Samgwamedung de lwetlu ge, ainie, kilungme reca kela mamie de nah hemeu mai le tei kelu biangkum de zeu ga cipau peu ga kebam ngau lu.17Saul Michal dage rangdi, “Nang daitei acu kedak nah a ngauraube de peu paktet di no?” Michal Saul sam keligai, “Pa a dage rangdi, ‘Acu peu tetlo. Ih ncu daitei teitset laino?’”18Cu David pak pwa Ramah nam ga Samuel da gwang di nah Saul pe dage tei kegai leune paubeu. Ge Samuel nah pa Naioth qu kela ni ga mie bamdi.19Saul dage aide paubeu, “Pielo, David au Ramah nam ga Naioth qu kela ni ga bam.”20Cidau Saul samgwame de David de tuikera langgai. Penui caihakecime maage cairasam rang kebam ngau ge, nah Samuel penui reu muiteu ge tei sap kebam, Tinggwang Rabe Saul samgwame reu gwangdi, nah penui de cairasam rangdi.21Saul de aide ranglia beuge, pa samgwame kedamedung de langgai, nah penui de cairasam rangdi. Cine Saul samgwame pe kecumbe langgai dai, nah penui de cairasam rangdi.22Pecai pa de Ramah ga mie nah Seku nam ga tekwa kecok dega gwanglu. “Samuel nah David daiga lano?” Pa keteu. Mige rang eh, “Pielo, penai Ramah ga Naioth ga bam.”23Saul Naioth, Ramah ga mie. Pecai Tinggwang Rabe pe reu ga gwangdi, nah pa mie la ge Naioth ga Ramah ga gwang lu kemak ta cairasam rangdi.24Pa pe paini ra di nah Samuel dwaga de cairasam rangdi. Pa cipau nai nah cipau ziu de pelane paaula eh bamdi. Aide ziemne penui keteu di, “Saul de caihakecime kakga bamni?”
Bridge Connectivity Solutions Pvt. Ltd.