1 Kings9
1Solomon RAMPAUBE ki nah hegwangki teicang kelu cai, nah pa teikeneube pelane teicang kelu cai,2RAMPAUBE Solomon de pia pekenabe laigai dai, pa Gibeon gade pecu laigai kecu nzwa.3Pecai RAMPAUBE pe dage rangdi, “Ih n kekie nah nang adwa gade kie kegaide siu luda. Ih nang a ziemne, ki tei kebeu aide, a zi peu cika kelungta bamlu kerane, teimci luda. A miak nah a mlung cika bam mui zie.4Nah ziemne au, nang n pei David nzwa masang nah samsang eh a dwaga tet lucai, Ih ncu samkai kebeudung pelane mzailu nah a zaidung nah ajadung mnei lucai,5iciulu cai Ih n hegwangram ga hegwangbam Israelme reu kelungta tei ngkieng beuzie, Ih n pei David dage sampet beu nzwa, ‘N leuhme madaude Israel hegwangbam ga bamlu ta kedi tei lak,’ de eh rang kegai nzwa.6Dede magade nang nreutet dicai, nang nah n name, mede ajadung nah a zaidung Ih nnui dwa gage kai kebeudung mzailu tadicai, nah nnui mie delwe hera kedadung de reca nah penuida keumie liecai,7iciucai Ih Israel de Ih penuide kepeu deu gade keugi dizie; nah ki aide a zi gade keu mpet ntsam kelu de, Ih cide adwa gade keu gi dizie, delwe Israel de le pwane mina pelane kakga henui ketei ge nah rang kemsia ge dizie.8Kerecaki aide kemta nia lamtu ge dizie, nah cika tetkah kegwang pelane de keheu dizie nah nra dizie. Penui keteu zie, ‘Dai ziemne RAMPAUBE aikenzwa ta hangdeu nah ki aide dage tei gai no?’9Kedame sam keli eh rang zie, ‘Kedanemene penui RAMPAUBE, penui Tinggwang de pütdi, penui paume de Egyptme deu gade ngngwa gwang kebeube de, nah penui hera kedadungde heraklu delwe penui dage keu mie recadi, cine RAMPAUBE penui dage kekap aidungde teugwang beu.’”10Mmi ngkai ge gwang cang kedi dau Solomon ki kena de tei canglu, RAMPAUBE de kerecaki nah hegwangki.11Cu Tyre ga hegwangpei, Hiram, Solomon hengin kela leune, Cedar nah cypress nah kecak pecu peu, cine Hegwangpei Solomon Galilee deu ga namdidung ngkai ge Hiram de peudi.12Hiram tyre gade Solomon ne pecu kepeu namdidung de pie kera mie, dede cidungde pesuiyi tei luma.13Cine Hiram rangdi, “A sinabo nang acu kepeu aidungde daikenzwa namdidung no?” Hiram cidungde de Kabul Deu de qulu, henai kecang de cinzwa qula.14Hiram hegwangpei da kecak talent 120 langgai beu.15Aide Hegwangpei Solomon ne ketang eh, heta ketei ha, delwe RAMPAUBE de kerecaki nah pekatei pe hegwangki, Millo, Jerusalem kirie, Hazor, Megiddo nah Gezer tei kerane.16Pharaoh Egypt gwangpei nghang lwe Gezer keuteudi. Pa cide rudi nah namdi ga Canaanme de teitsetdi. Pecai Pharaoh namdi de pe napui, Solomon nau de nautak mapeu tei beudi.17Cine Solomon Gezer teicu dailu nah Beth Horon ngkangbe,18Baalath nah Tamar Judahme deu renaamkang ga,19nah mahekwa kebam namdi pelane pa gum kebam ga, nah namdidung pe bagidung ziemne nah namdi pe hekwen keteume ziemne, nah pa luu keneu leu pe renga ziemne Jerusalem ga teilu, Lebanon ga, nah hangdeu pelane pe hegwang kangga kebamdung.20Amorme, Hittime, Perizzme, Hivitme, nah Jebusme bang kebammedung, Israelme kemakme dungde ciak,21penui leuhmedung penui cai hangdeube ga lungh kebamme, Israelme tei ngkapdi ciolu kemakme, Solomon penui kemei tei eh peu bata tei, henai kecang penui mibaang teila.22Ciuliede, Solomon Israelme de peu hebaang tei eh mata teima. Meliene, penui pe reugwame, pe kedime, pe peuketeume, nah pe reugwame reu, nah pe bagi keteume nah pe hekwen kepungme reu muibedung.23Mina aidungde tsai kedi kengkiengme ma pie rengei kecumedung Solomon ta keteimedung, penui 550 ge, minadung mata ketei pie kerengeime.24Pharaoh napui David namdi gade Solomon pe ziemne teipwa bam kecu kiga tetdi. Pecai, Solomon Millo teilu.25Mmi ge gade pia cum Solomon keru recadung nah kezuyi recadung pwa racabam gage reca tei beula RAMPAUBE ziemne pane teikelu de gage, marim kehenguidung ru eh racabam cide RAMPAUBE dwaga kebam. Cine pa kerecaki teicang lu delwe cide cu teubam dida.26Hegwangpei Solomon heliem kekiee ge teilu Ezion Geber ga, cide Elath taiga Jaaidi kegie kungga, Edomme deu ga.27Hiram pe gwaketeime de Solomon liemdung ga langgai beu, heliem keteume duikedi zai kecime, Solomon gwa keteime de si eh.28Penui Solomon gwaketeime de ngngwa lwe Ophir ga mie. Cikade penui talent kecak 420 Hegwangpei Solomon ziemne pung cailigwang.
Bridge Connectivity Solutions Pvt. Ltd.