1 Kings10
1RAMPAUBE zi de hetwa teu gwang kegai ne, Sheba ga hegwangpui Solomon kemdu de siu keludau, Pa Sam kecukdung mteilwe pecu kedei kera gwang.2Pa Jerusalem ga gwang hemaa keyi nzang eh, mosala, kecak kekieege, nah tangtsu pemi kehungdung kekieege, utdung püt teilwe mie. Pa cika gwang keludau, pa Solomon dage pe mlung ga kebam leune ranggai.3Pa keteu kegai sam leune Solomon keligai beu. Pa keteu kegai magede hegwangpei pesam keli kemak gahdi.4Sheba gwangpui Solomon maci pelane, nah pa hegwangki tei pwa kebam de ngaulu sang ge,5pe taktyei bam ga taktyeidung, pe kangga kedime ntum kebamdung, pegwa keteime ta nah penui nia teu, pecai de pe piak kepwame, nah pa RAMPAUBE ki ga keru reca ketei zaidung ngaulu ge, pa pe swa gah sütdi.6Pa hegwangpei dage rangdi, “Ih n samdung nah n maci ha a deu gade siu kecude kesangda.7Ih nlum luma Ih siu keludung heni aide ga Ih gwang kemaktane, nah cu cide a miak le ngau luda. Sam pempie gede acu pau beu ma n maci nah n mabam ha! Nang au Ih siu kecu de swa de mdu pet gwa bam.8N naume samlam daipung pung no, n gwa keteime samlam dai kie ge pung no penui n dwaga sap mui kela, kedanemene penui n macisamdung kingneila lu. 9Peu RAMPAUBE n Tinggwang de hetwa peulu, pa n dade pe suiyi ngaulu, Israel hegwangbam ga ncu kai kebeube de. Kedanemene RAMPAUBE kelungta Israel de kula, pa ncu hegwang teibeu da, ncu peu matei nsam nah masanglu kerane!”10Pa hegwangpei de talent 120 kecak nah mosala kekieege nah tangtsu pemi kehungdung pwabeu. Sheba gwangpui Hegwangpei Solomon de mosala aikenzwa kekieege kepeu nzwa migede pecu peusi daima.11Hiram limdung ne, Ophir gade kecak punggwang, nah Ophir gade almug tsing kekieege nah tangtsu pemi kehungdung si eh pungsüt gwang.12Hegwangpei almug tsing cia teilu RAMPAUBE kerecaki ziemne nah hegwangpei ki ziemne, nah harps nah lyres leiketeimedung ziemne. Cikenzwa almug tsing madaude gwang dai mah mede henai kecang de ngau dai ma.13Hegwangpei Solomon Sheba ga hegwangpui de pa kie kegai leune pwa peugai, pa pecu pe ramzai gade peu kela madung peu kecu caide. Cine pa pe kilame de ngngwa pe deu ga cailigwangdi.14Mmi ge ga kecak perüt 666 talents Solomon da gwanglu,15ma kezwame nah heliketeime kecak punggwang kecu rünne mene. Arabia ga hegwangme pelane nah deudi ga deuceudidung de kecak nah rangkanggeu Solomon da punggwang.16Hegwangpei Solomon kecak deu mpiak le hegeu kedi haina teilu. Kecak haiherok shekel ket ga lütti.17Pa de kecak deu mpiak kelu hegeu haicum teilu. Kecak mina kecum ge hegeu ket ga lütti; hegwangpei cidung de Lebanon hegung ga hegwangki ga kaidi.18Pecai hegwangpei ivory le pe hegwangbam kedige teilu nah cide kecak yitube le kemailu.19Cika peset herok pe hegwangbam ga bam, nah pecai ga ngoi eh petwang tei. Cika heba nggei kera bam teibam ga tunana lwe bam, nah hingho kena sap eh heba mtak bam ga bam.20Hingho kereiekena pesetdung ga sapbam, petu pelane ga peset herok ga. Cikenzwa hegwangbam madaude mi keda hegwangram ga tei mah.21Hegwangpei Solomon kesak piakdung pelane kecak, nah kesak piakdung Lebanon hegung hegwangki ga kecak kesangbe le tei. Cidung de kette rangkang geu le tei mah kedanemene Solomon tingdau rangkang geu cide de pwa pemi kehungbe tei la kemakne.22Hegwangpei duikedi ga kemie liemdung jaaidi ga bamla, Hiram liemdung de de si eh. Mmi kecum gade piage kecak, rangkanggeu, nah hepwangeu, hezwa, nah ziangbeidung de si eh liem gade pung gwang beula.23Cine hegwangpei Solomon kideu gade hegwangme pelane swade yi camceu di mahei nah macidung gade.24Kideu pelane ga Solomon de ngngwa gwang neu di pe macisamdung kingnei kerane, Tinggwang ne pelung ga kai kebeube.25Peda kegwang leu pecu mapeu, rangkanggeu nah kecak lidung, nah hepai nia, reunet, nah marim kepungbedung, hekwen nah gada nadung desi eh, mmi ge cai mmi ge punggwang beula.26Hegwangpei Solomon bagidung nah hekwen kepungme de teu hekwalu. Pa 1,400 bagidung nah hekwen kepungme cang kereiekena de bagi namdidung ga peu kwalu nah pekatei pe dage de Jerusalem ga kainzeulu.27Hegwangpei gu rangkanggeu Jerusalem ga, hangdeu ga tangtsu bam kecu kiee ge bam. Pa cedar tsingdung peu kekieege sycamore tangzüttsi bang hangdeu kehena lwe kebam kiee ge teilu.28Solomon gu hekündung Egypt gade ngngwa gwang, delwe Kue nah hegwangpei li teikelamedung Kue gade cidungde lui.29Bagidung Egypt gade rangkanggeu shekel haiherok le pumge luilu, nah hekwen 150 shekel le. Ma aidung kekieege Hittitme nah Aram hegwangme pelane dage zwadi.
Bridge Connectivity Solutions Pvt. Ltd.