1 Kings3
1Solomon laktak gade Egypt gwangpei Pharaoh de ngngwa zangna teilu. Pa Pharaoh napui de pe naulu delwe pa peki, RAMPAUBE ki, nah Jerusalem rie twagwapung kebam de tei canglu kemaktane pecu ngngwa David namdi ga gwang bamlu.2Minadung recabamdung gade ratak teibam, kedanemene RAMPAUBE ziemne ki gede tei lu mereu kecune.3Solomon pe pei David ledeu kebeu ga tet eh RAMPAUBE de pe kehung liagai, dede reca bamdung ga pa ratak teigai nah kehengui rugai.4Hegwangpei Gibeon miedi cikade ratak tei kerane, kedanemene cide au matu kecehu kemlang ge. Solomon recabam cika gage keru recadung cangge pwa peu gai.5Tingmui Gibeon gade RAMPAUBE hemanglede Solomon da gwang; pa rang, “Kielu! Ih ncu daipwa peulai?”6Cine Solomon rangdi, “Nang apei David, n kilabe de samkakkelu samsang kedi pwa liagai da, kedanemene pa ndwa tetgwang nlumlu kebui ga, mci mzui, nah masang kecu ga. Nang pe ziemne samkak kesamsang kedi aide kai nzeu nah henai pecu mipei ge pwa peu pe hegwangbam leu kera.7Cu RAMPAUBE a Tinggwang, nang a pei David bam ga n kilabe de hegwang tei beu, Ih au hena keceuna ge gwale mereu liede. Ih au dainzwa tetmpet mede nlüt ziebi cima.8N kilabe nang ne kedet kelu minadung kakga la, minadung kekiee ge, kiee zu eh pei kap gai kelak ge ga.9Cine n minadung de tiaklu kerane n kilabe de kecikecet lung peulo, iciude Ih keyi kesia cintsamlu kerane. Maige caune n mina aipau kieege reu kedi teilu laino?”10Solomon aide kie kecu Rampaube pesui di.11Cine Tinggwang pe dage rangdi, “Kedanemene nang ma aide kie nah nziemne ringtielu kera mede mahei mede n ngauraume de teisetlu kera kiema, dede nziemne kecikecet kie ma teukensam cintsamlu kera.12Pielo, cu Ih nang a dade kie kegai leune tei beuzie nang ada kiegaide. Ih ncu kemteu nah kecikecet lung peugai la, iciude migede nang nzwa bamlak n dwade, nah migede nang nzwa cuh silak n dwade nah n caide.13Ih nang kiegai kemakbe de ncu peu, mahei nah herüt ai kenade, iciude nang nzwa mi gede hegwangdung kakga bam melu kerane nang kelungta.14Nang a lampuidung ga mzui eh a zaidung nah a ajadung de mzailu cai, n pei David nzwa mzui eh, ciucai Ih nteilung tei mtie beu zie.”15Ge Solomon mraklu, nah ainie, cide pemang lede. Pa Jerusalem ga gwang lu nah Rampaube samkakbung dwa ga saplu. Pa keru recadung nah kezuyi recadung tei gai, nah pe kedimedung pelane ziemne taktyei ngyi telei gaibeu.16Cipaucai helipui hangna, ge hegwangpei da gwang eh pe dwaga saplu.17Hangge pui rangdi, “Oh, a kedibo, aipau pui de nah Ih ki ge ga lung bamla, nah Ih pecu ngngwa kebam ki de gade hena na gede mnalu.18Cinzwa eh Ih mna kelu cai langcumne benai mipui aide de hena mnalu. Anai lung ncüt bamla. Ki cika anaide ngngwa mi kedame gede bam ma, dede ki ga anai hangna rünne bamla.19Ge zeuziu ge mipui aide napei tsaidi, kedanemene pa pecu ngkum kedine.20Cine pa tingmuisum ge cuhlu delwe a mbie gade a napei de pwalu, n kilabe zip kebam dau, delwe pecu pe hekarak gage kai zeulu, nah pe napei tsai kedi de a hekarak gage kai zeudi.21Ih tingcang ana puk tei zielie cuh ge, pa tsai bam. Dede tingcang Ih pecu pie sünne gai ge, pa au Ih ne mna kelube a napei mah.”22Pecai keda pui de rangdi, “Mah, ring kebam de a napei, nah tsai kedibe de n napei.” Keraibe pui rangdi, “Mah, tsai kedibe de n napei, nah ring kebam de a napei.” Ainzwa penai hegwangpei dwa gade marangdi.23Ge hegwangpei rangdi, “Hangge pau rang, ‘Ring kebam aide a napei, nah n napei au tsai dida,’ nah keda de rang, ‘Mah, tsai kedibe de n napei, nah ring kebam de be a napei.’”24Hegwangpei rangdi, “Acu kingtie teu gwang beu.” Cine penui hegwangpei dwa kingtie teu gwang beu.25Pecai hegwangpei rangdi, “Ring kebam henana de de zina tei mzilu, nah pempie mipui aide de peulu nah pempie kedabe pui de.”26Ge mipui pe napei ring kebambe de hegwangpei da marang, kedanemene pe nlung pe napei de keku le puipung kecune, nah pa rangdi, “Oh, a mpaubo, ring kebam henana de pecu peu dilu, nah kehei teide pecu teitset diso.” Dede mipui keda de rangdi, “Pa au agu delak mede ngu delak. Pecu mzilu.”27Pecai hegwangpei samkeli nah rangdi, “Keraibe pui de de ring kebam henana de peudi lu, nah kehei tei de pecu teitset di lak. Pa au pe pui da.”28Israelme pelane hegwangpei tiak kegai tutiak de siulu ge, penui hegwangpei de rüt sütdi, kedanemene tutiakdung nzanglu kera Tinggwang maci peda kebam penui ngau kelune.
Bridge Connectivity Solutions Pvt. Ltd.