1 Kings15
1Mmi kereieheset bekum Hegwangpei Nebat napei Jeroboam, Abijah Judah reu hegwang teilu.2Pa Jerusalem ga mmi kecum ge hegwang tei. Pe pui zi cai Maacah. Pa au Abishalom napui.3Pa pe ting dau pe pei kemau keteidung leune teidi; pe pau David ketei nzwa pa RAMPAUBE Tinggwang dage pelung kailu ma.4Iciuliede, David ziemne, RAMPAUBE pe Tinggwang pecu Jerusalem ga mitaubung ge pwa peu pe na de pecai leu eh Jerusalem de tei ngkienglu kerane teucuh beu.5Tinggwang aide tei kedanemene David pe miakngau gade petaube tei; pe teilung tingba zie pelane ga, Pa keheibe gade de nreu tetdi ma pa pecu aja kai kebeu gade, Hittitme pei Uriah ha de gade gwale.6Cu cika Rehoboam nah Jeroboam kak ga Abijah hegwang ting pelane hereu tei ladi.7Abijah heta keda au, pa tei kegai leune, Judah ga hegwangme heta ketei hakwak ga cidung rau teula melui ni? Abijah nah Jeroboam kak ga hereu tei ladi.8Abijah pe paume nzwa tsaidi, nah penui pecu David namdi be gage kungdi. Pe napei Asa pe bam leulu.9Israel gwangpei Jeroboam mmi ngkai bekum, Asa Judah reu hegwang teidi.10Pa Jerusalem ga mmi riakdaieket hegwang tei. Pe pai zi cai Maacah, Abishalom napui.11Asa RAMPAUBE miakngau gade petaube tei, pe pau David ketei, nzwa eh.12Pa helipeidung nlum kemakme rekah ni gade bata tei kebamdung pelane de renam gade gwa mpetdi nah pe paume mamie teikelu pelane keu gidi.13Pa Maacah de de keu mpetdi. Pe pai, hegwangpui ketei gade, kedanemene pa Asherah mie kemneu ge tei kegaine. Asa ne kehera mie de bi ngkaudi nah Kidron langkam gage rudi.14Dede nlum kemak nidung de keu gidi ma. Iciuliede, Asa RAMPAUBE dage pe mlung pelane kai nzeu cangsiaklu pe teilung zie pelane.15Pa pe pei ne maniadung tei mci kelube nah pe gu nia keu ntsam kenzeu rangkanggeu, kecak, nah lidung tei kelude de pwa RAMPAUBE ki ga gwanglu.16Cika Israel gwangpei Baasha nah Asa kakga hereu tei ladi, penai hegwang tei kebam tane.17Israel gwangpei Baasha, Judah de gwalütlu delwe Ramah namceu de tsukwa hekwa cuhlu, iciu eh pa mige de de Judah gwangpei Asa deu ga nlüt mpetdi melu kerane.18Cidau Asa RAMPAUBE ki maniakibungdung ga rangkanggeu nah kecak kebang be pelane keulu, nah hegwangpei ki ga maniakibungdung gade de. Pa pe kilamedung ba gage kai beu nah cide Ben Hadad, Tabrimmon napei Hezion napei, Aram gwangpei, Damuscus ga lungh kebambe dage langgai. Pa rang eh,19“Anai kak ga samkak be peu bamlu go lie, N pei nah a pei kak ga bam kela nzwa. Pielo, Ih n dage rangkanggeu nah kecak mta langgai di. Israel gwangpei Baasha dade n samkak de tei pang di lulo, ciciu eh pa acu püt di beu lu kerane.”20Ben Hadad Hegwangpei Asa kwa kingnei lu nah pe reugwamuibe dungde langgai di, nah penui Israel ga namdidung de gwaketang. Penui Ijon, Dan, Abel Beth Maacah, nah Kinnereth pelane gwaketang, Naphtali deu pelane ncüt eh.21Cinzwa eh Baasha aide siulu ge, pa Ramah tsukwa kwa kecu de mtakdi nah Tirzah ga cailigwangdi.22Pecai Hegwangpei Asa Judah deu pelane ga reci gai. Mige de de pütdi ma. Penui Ramah ga tangtsu nah tsinggetdung pung tetdi Baasha ne namdi be kwa kebam de. Pecai Hegwangpei Asa ki nia cide teu Benjamin nah Mizpah namceu nah Geba namceu kwa cuhlu kerane.23Asa ha kedadung ziemne au, pe kengkieng pelane, Pa tei kegai pelane, nah namdidung pa tei kegai de, cidung de Judah ga Hegwangme heta ketei hakwak gage rau mzeu melui ni? Dede pe cing caine pa pe pi teeidi.24Pecai Asa pe paume nzwa eh tsaidi nah penuide pe pei David namdi gage kungdi. Pe napei Jehoshaphat ne pe bam leu eh hegwang teilu.25Judah gwangpei Asa hegwang tei kelu mmi kena bekum Jeroboam napei Nadab Israel reu hegwang tei cuhdi; Pa Israel reu mmi kena hegwang tei.26Pa RAMPAUBE miakngau gade kemau teidi nah pe paume (peime) lampui ga tet eh, nah pe mau ziemne peu Israel de kemau teidi.27Ahijah napei Baasha, Issachar kilungme, Nadab dage heciem kesia riem gai; Baasha ne pecu teitsetdi Gibbethon Philistinme deu gade, Nadab nah Israelme pelane de Gibbethon gage tui nzeu kecune.28Judah gwangpei Asa mmi kecum bekum, Baasha ne Nadab de teitsetdi eh pebam ga hegwang teilu.29Pa hegwang teidi herizi, Baasha Jeroboam kilungme pelane de teitsetdi. Pa Jeroboam leuhme keringria gede bangbeu ma; aiciu eh pa pe kelak ria de tei ngkapdi, RAMPAUBE pe kilabe Shilonme pei Ahijah dage kerangde nzwa eh,30Jeroboam pa kemau ketei nah pa Israelme de kemau lampui gage ngngwa kegaine, kedanemene pa RAMPAUBE rata tei, Israel Tinggwang, rata ketei ne.31Nadab ha kedabe dung ziemne au, nah pa tei kegai pelane, cidung de Israel ga hegwangme heta ketei hakwak gage rau mzeu melui ni?32Cika Israel gwangpei Baasha nah Judah gwangpei Asa kakga hereu tei ladi, penai hegwang tei kebam tane.33Judah gwangpei Asa hegwang ketei mmi kecum bekum, Ahijah napei Baasha Tirzah gade Israel reu hegwang tei cuhdi nah pa mmi ngkaie-mdai hegwang tei.34Pa RAMPAUBE miakngau gade kemau teidi nah Jeroboam lampui ga tet eh, nah pe mau ziemne peu Israel de kemau teidi.
Bridge Connectivity Solutions Pvt. Ltd.